Nitter: Canadamut timmisartuussineq iluatsilluarpoq
Nuup Canadamilu illoqarfiup Iqaluit akornanni timmisartumut bilitsit tunisat ilimagisamit amerlanerupput, Air Greenlandimi pisortaaneq Jacob Nitter Sørensen oqarpoq.
Canadamut timmisartuussinissamut billetsit piumaneqarluarnerat Air Greenlandip pisortaanerata Jacob Nitter Sørensenip nuannaarutigaa.
Leiff Josefsen
Canadami Iqalunnut timmisartuussineq juunip 26-ani ammartoq aallartilluarpoq.
- Sapaatip-akunneri pingasut timmisartuussinerup ammarnissaa sioqqullugu angalanissamut inniminniinermik aatsaat tuniniaasinnaalerpugut. Timmisartuussinissamut aqqutit nutaat pineqartillugit piffissaq tamanna sivikitsuararsuuvoq, taamaattumik tunisat naammagisimaarpavut, Jacob Nitter Sørensen oqarpoq.
Maannakkut inissat affaat tuniniarneqarsimasut oqarpoq.
Canadamiut timmisartortitseqatigiiffiat Canadian North suleqatigalugu timmisartuussinerit aaqqissuussaapput, taakkualu Iqalunnit Amerikap avannaata sinneranut timmisartuussisarput.
- Canadian North suleqatigilluarparput, kisiannili angalasut Iqalunnit Canada Northip timmisartuussisarfianut allamut ingerlaqqinniarlutik inniminniiniarnerat eqqarsaatigalugu qarasaasiakkut atortorissaarutivut unammillernarsimapput. Tamannali aaqqinniarneqaleruttorpoq, Air Greenlandimi pisortaaneq oqarpoq.
Oqariartuut pingaaruteqartoq
Jacob Nitter Sørensenilli Amerikamut Avannarlermut angalaniartut immikkut pingaaruteqartumik oqariartuuteqarfigai.
- Akuersissutit assigiinngitsut eqqortumik immersornissaat eqqaamajuk. Ajoraluartumik ilaasut ilaasa allagartaat eqqortumik immersorneqarsimanngitsut pissutigalugit itigartittariaqartarsimavavut, timmisartortitseqatigiiffiup pisortaanera ilisimatitsivoq. Ilaasut tamarmik Nuummit aallannginneranni allagartaat misissorneqartarput, ilaasullu ilaanik Air Greenlandimi sulisut itigartitsisariaqartarsimapput.
Assersuutigalugu nassuiarpaa ateq passimi allassimasutulli eqqortumik allanneqartariaqarnera pingaaruteqarluinnartoq.
- Assersuutigalugu akuersissummik immersuinermi Jacob N. Sørensen allakkukku passimilu Jacob Nitter Sørensen allassimalluni, tamanna ajornartorsiutaalersinnaavoq. Amerikami oqartussaasut sukannersuupput, tamannalu pissutigalugu itigartinneqarneq uggornassaaq, Jacob Nitter Sørensen oqarpoq.
