Nukissiorfinni pisortaagallartussaq toqqarneqarpoq
Maannakkut aningaasaqarnermut pisortaasoq, Johan Danielsen, nukissiornermut pisortaagallartussanngortitaavoq.
Ingerlatseqatigiiffimmi nukimmik pilersuisuusumi pisortaagallartussamik maanna toqqaasoqarpoq.
Leiff Josefsen
Cecilie Senderovitz Nukissiorfinni 2024-mi septembarip 30-at aallarnerfigalugu pisortatut tunuartoq, aggustimi siusinnerusukkut Naalakkersuisut ilisimatitsissutigaat.
Nukissiorfimmi pisortap nutaap atorfinitsinnissaa tikillugu ikaarsaariarfissaq pitsaasoq qularnaarniarlugu pisortaagallartussamik toqqaasoqartoq, ingerlatseqatigiiffik nukimmik pilersuisuusoq maanna ilisimatitsivoq.
Maannakkut aningaasaqarnermut pisortaq Johan Danielsen pisortaagallartussanngortitaavoq.
Ingerlatseqatigiiffimmili aningaasaqarnermut pisortatut atuuffeqaannassasoq, Nukissiorfiit nittartakkaminni ilisimatitsipput.
Juulip naanerani Nukissiorfiit teknikkimut pisortaa Hans Rowedder atorfimminit soraarsimasoq, taamaattumillu teknikkimut pisortamik nutaamik atorfinitsisoqarnissaata tungaanut Nuummi nunap immikkoortuani pisortaq Filip Sivertsen Nukissiorfinni teknikkimut pisortaagallartussanngortitaasoq, aamma ilisimatitsissutaavoq.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik nukissiornermut pisortamik atorfinitsitsinissamut suliamik ingerlatsipput, Nukissiorfiillu nammineerlutik teknikkimut pisortamik atorfinitsitsinissamut suliamik ingerlatsillutik.
Atorfiit inuttalerneqarnissaasa tungaannut Nukissiorfiit pisortaqarfiata inuttarissavai Johan Danielsen nukissiorfimmi pisortaagallartoq aningaasaqarnermullu pisortaq, Filip Sivertsen teknikkimut pisortaagallartoq aamma Sandra Manata pisortaqarfimmi pisortaq.
