Nuuk nunanit tamalaanit peqataaffigineqartumik nittarsaassinermut nutaamut qaaqqusisuussasoq

Kommuneqarfik Sermersooq aamma Aalborg Kongres & Kultur Center suleqatigiillutik Nuummi ArcticExpo – Fishing & Hunting-imik ingerlatsisuussapput.

Saqqummersinneqarpoq

Nuummi piniarneq aalisarnerlu pillugit nittarsaassineq nutaaq upernaaru ingerlanneqassaaq.

Kommuneqarfik Sermersooq aamma Aalborg Kongres & Kultur Center (AKKC) nittarsaassinermi suleqatigiinnissamik, siullermik 2026-mi apriilimi pisussamik ukiullu allortarlugit pisussamik, isumaqatigiissuteqarput.

Tamanna kommunip nittartagaani atuarneqarsinnaavoq.

Nittarsaassinermi attaveqaqatigiinnermik pilersitsineq, teknologiinik tunisassianillu nutaanik saqqummiineq kiisalu aalajangiisartut inuussutissarsiortullu ataatsimoortinnissaat siunertaavoq:

- Aalisarnermik piniarnermillu ingerlatsineq kommunitsinni inuussutissarsiornermi tunaartanut pingaarnerpaanut ilaapput. Taamaattumik ArcticExpo aqqutigalugu inuussutissarsiornerup ineriartortinnissaanut attaveqatigiiffimmilu najukkami nunanilu tamanit suliaqartut naapittarfissaanni pilersitsinissamut tapertaanissarput nuannaarutigaarput”, Avaaraq Olsen, Kommuneqarfik Sermersuumi borgmesteri oqarpoq.

Aalborg Kongres & Kulturcenter Ilulissani PolarExpo-mik Aalborgimilu DanFish International-imik, nunarsuarmi aalisarnermik nittarsaassinerit annersaata ilaannik, aaqqissuussisartooreerpoq.

- Kommuneqarfik Sermersuup suleqatiginera tulluusimaarutigaarput. PolarExpo aamma DanFish International pillugit misilittakkatta nunani tamaneersunut nittarsaassinissamut patajaatsumik tunngaviliivoq, najukkami nunanilu tamanit suliaqartunik kajungilersitsivoq”, Nicolaj Holm, AKKC-mi pisortaq oqarpoq.

Powered by Labrador CMS