Peqatigiiffik MAPI ukiup nikinnerani matussaaq

Aningaasanik pissarsiniarneq ajornakusoortarmat peqatigiiffik MAPI matuniarpoq, siulersuisuni siulittaasoq oqarpoq.

- Qamuuna erloqingaarlunga nalunaarutigissavara peqatigiiffik ukiut nikinneranni MAPI matuniarmat, peqatigiiffimmi MAPI-mi siulersuisuni siulittaasoq, Laila Bertelsen, Sermitsiamut allappoq.

Ukiuni kingullerni peqatigiiffik isumaginninnermut tunngasunik, peqqinnissaqarfimmi kukkussuteqartoqarneranik kiisalu innuttaasunut ilaqutariinnullu atugarliortunut katersuiniarnernik arlalinnik suliaqarsimavoq.

Ukiulli nikinneranni peqatigiiffik matussaaq, siulittaasoq oqarpoq:

- Soqutiginninnerup tapersersuinerullu amigaataanera pissutigalugu MAPI matulerpoq. Nammineq kajumissutsimik sulisussarsiornissaq ajornakusoortutut ippoq, aammali suliffeqarfinnit tapersersorneqarnissaq ajornakusoortuuvoq, suliassammi suliarisavut oqimaatsuugajupput, amerlasuullu politikkimut tunngassuteqartarput, Laila Bertelsen allappoq.

Siulittaasoq naapertorlugu ullormut innuttaasunit qulit angullugit amerlassuseqartunit suliassamut aalajangersimasumut tunngatillugu ikiorneqarusuttunik peqatigiiffik saaffigineqartarpoq.

Powered by Labrador CMS