Raajartassanut siunnersuummut appangaatsiartumut Naalakkersuisut ima qisuariarput
Kitaani raajartassiissutit pingaarutillit 12,5 %-imik appartinneqarnissaannik Naalakkersuisut siunnersuuteqarput.
Kitaani raajartassiissutit 90.000 tonsingajannut appartinneqassasut, Naalakkersuisut siunnersuuteqarput.
Assiliisoq: Leiff Josefsen
Kitaani raajarniarnermut ilisimatuussutsikkut siunnersuinerup ukioq manna appartitseqqinnissaq innersuussutigaa - maanna 80.000 tons-inut.
Ukiut marluk matuma siornaannaq siunnersuut 110.000 tons-iuvoq.
Siunnersuut tamakkiisumik Naalakkersuisut malinngilaat, pisassiinerli 89.687,5 tonsinut appartinneqassasoq siunnersuutigaat.
Kitaani
raajanik aqutsinissamut pilersaarummut Naalakkersuisut innersuussipput, tassanimi allassimavoq pisarineqarsinnaasut tamarmiusut ukiumit ukiumut annertunerpaamik 12,5%-inik
allanngortinneqarsinnaasut.
Raajartassanut siunnersuummi, Aalisarnermut Piniarnermullu Naalakkersuisoqarfiup tusarniaassutigisaani, tamanna allassimavoq. Kalaallit Nunaata avammut tunisartagaasa affaat missiliorlugit raajaneersuupput, taamaattumillu pisassiissutit aningaasaqarnermut pingaaruteqartorujussuupput.
2026-mi pisarineqarsinnaasut tamarmiusut ilisimatuussutsikkut siunnersuinermut naapertuuttunngortinnissaat
Naalakkersuisut naatsorsuutigaat. Siunnersuinerli appariarujussuaqqissanersoq apeqqutaavoq.
Tunumi pisassiineq aamma appartinneqassaaq, pisassiinerli siunnersuutitulli appartiginngilaq:
- Raajaqassuseq raajaqatigiinni taakkunani
pitsaanerpaaffigisinnaasaminit appasinneruvoq, tamatuma ilutigisaanik
aalisarneqartut toqusarnerisa amerlanerpaaffiat sipporlugu aalisartoqartarpoq.
Taamaammat raajaqatigiit najoqqutassatut inissisimaffimmit Btrigger-imit
ikinnerupput, tamanna ima paasineqassaaq, raajaqatigiit amerlassutsimikkut
pitsaanerpaaffissamit 80%-iusumit ikinnerulersimasut.
- Taamaattoq Tunumi raajaqatigiit pillugit
ilisimasat suli annertunngillat, taamaattumillu siunnersuineq aamma
nalorninerujussuarmik ilaqarpoq, Aalisarnermut Piniarnermullu Naalakkersuisoqarfik Tunumi raajartassiinissamut taama tunngavilersuivoq.
