KL

DK

Royal Greenland Polenimi sullissivimmik atoqqaarfissiortitsivoq

Gdańskimi sullissivik Royal Greenlandip kiffartuussinerata qitiusumik ingerlanneqarnissaanut atorneqassaaq.

Thomas Munk Veirum
Tusagassiortoq
Saqqummersinneqarpoq

Royal Greenlandip Polenimi Gdańskimi sullissivittaava pisortatigoortumik aggustip 22-ani atoqqaartinneqarpoq.

Sullissivik taanna Namminersorlutik Oqartussat ingerlatseqatigiiffiutaata atuisunik sullissinerata qitiusumik aaqqissuunneqarneranut ilaavoq.

Gdański qitiusumik ingerlatsivimmik pilersitsinissamut, sukkanerusumik akissuteqartarnissamut sullitanillu sullissinerup pitsaanerulersinnissaanut toqqarneqarluarsimasoq, Royal Greenland nittartakkamini allappoq.

Pisortaanerup Susanne Arfelt Rajamandip sumiiffiup tamatuma pitsaaqutai ima oqaatigai:

- Sulisut piukkunnaatillit tunniusimasullu tikikkuminassussaat pissutigalugit, qalerualinnillu tunisassiorfittut illoqarfimmi umiarsualivilimmi angerlarsimasutut misigigatta Gdańsk toqqarparput. Polenimi 1500-nit amerlanerusunik sullissiveqarpoq, Kalaallit Nunaannillu siullersaalluta peqalernerput tulluusimaarutigaarput, pisortaq oqarpoq.

Sullissivimmik ammaaneq suliffeqarfiup ineriartortitsinissamut periusissiaanut qitiusumik ilaasoq, aamma Europami nunarsuarmilu niuerfinni Royal Greenlandip inissisimaffianik nukittorsaasussaasoq, Royal Greenland nangilluni allappoq.

Royal Greenlandimi pisortaanerup siusinnerusukkut kiffartuussivik nutaaq oqaluttuaraa, siorna akileraarutit suli ilanngaatiginagit 255 millionit koruuninik amigartoornerup kingorna ingerlatseqatigiiffiup aningaasaqarnerminik pitsanngorsaaneranut atatillugu.

inuussutissarsiutit erhverv

ATORFIIT Se alle jobs

Powered by Labrador CMS