Savaatillit siulittaasuat inuussutissarsiummi ilungersunartut pillugit: - Qaangersinnaajuarpavut

Ukiuni makkunani savaatillit ikiliartorput, taamatullu pisoqarnera ukiuni marlussunni tulliuttuni ingerlaannassasoq ilimanarluinnarpoq.

Savaatillit Peqatigiit Suleqatigiissut (SPS) siulittaasuat, Suulut Hansen, Sermitsiaq Qassiarsummi angerlarsimaffianut savaaveqarfiutaanut pulaarmat taama oqaluttuarpoq.

- Kisianni savaatiliuteqarfinni pissutsit pitsaasumut mumisinneqarumaartut isumaqarpunga aamma neriuuteqarpunga, Suulut Hansen oqarpoq.

Siulittaasup oqarnera naapertorlugu tamanna oqaloqatigiinnerunikkut aamma savaatilinnut amerlanerusunik periarfissaqartitsinikkut tamanna pissaaq.

- Taamaaliornikkut savaatillit amerlanerulersissinnaavavut. Oqallinnermik aamma soqutiginnilersitsinermik pilersitsigutta aamma nipaaginnarata nipituumik savaateqarneq pitsaasumik oqaluuserigutsigu nammineq amerliartussapput, Suulut Hansen, siorna SPS-imi siulittaasutut qinerneqannginnermini 2011-mit 2017-mut siulersuisunut ilaasortaasoq taama oqarpoq.

Naalakkersuisut nunalerineq pillugu periusissiaanni 2021-meersumi, savaatiliuteqarfiit savaateqarsimasunit kingoraarsisussaqannginnera pissutigalugu savaateqarneq ukiuni kingullerni kinguariartorfiusoq nassuiarneqarpoq.

Inuussutissarsiut attanneqarli

Savaateqarnermik inuussutissarsiutip attanneqarnissaata ilungersuutigineqarnissaanut pissutissaq annertuvoq, savaatillit ikiliartorneranni savaateqarnerup sooq attanneqartariaqarnera pillugu siulittaasoq aperineqarnermini akivoq.

- Savaateqarneq Kujataani kulturitsinnut annertuumik ilaavoq, inuussutissarsiullu aamma suliffissaqartitsivoq. Savaatillit saniatigut takornariartitsinermik ingerlataqarput, taannalu aamma annertuumik naleqalersitsisarpoq.

- Savaateqarnermik inuussutissarsiutip attanneqarnissaanut annertuumik pissutissaqarpugut, Suulut Hansen oqarpoq.

Savaateqarneq unissappat, Qassiarsuk eqqaanilu savaatileqarfiit aamma nunaqarfiit matunissaat ilimanarluinnartoq siulittuutigaa. Kujataani ullumikkut savaatillit 35-t missaanniipput, Kommune Kujalleq ilisimatitsivoq.

- Ukiut 1000-t matuma siorna qallunaatsiaat sumiiffipput ujaqqanik piiaallutik aamma toqqavissiorlutik piareersarpaat, tamannalu ullumikkut nangillugu suliaqarfigaarput. Taanna toqqavik aamma inuit suli ukiuni 1000-ni atorsinnaavaat, Suulut Hansen oqarpoq.

Ilinniartitaaneq pingaaruteqarpoq

Peqatigiiffik savaateqarnerup aamma nunalerinerup iluani sulianik arlalinnik anguniagaqarpoq, siulittaasoq nutaaq oqaluttuarpoq, kisianni savaatillit savat Neqi A/S-imut tunisagaasa akiisa isumaqatigiissutiginissaat suliassani pingaarnerpaavoq.

- Savaatillit savaaqqanik Neqimut kiilumut 55 koruuninik akilerlugit tunisaqaraangamik, neqi niuertarfinni sisamariaataanik akisunerusumik tunineqarsinnaasarpoq. Tamannalu pisisartut tungaannit soorunami apeqquserneqarpoq, akit qaffasissut paasisinnaannginnamikkit, uagullu nunalerinermit, tassami iluanaarutit sumut pisarpata, Suulut Hansen oqarpoq, nangillunilu:

- Savat piffissap qanoq ilinerani aamma qanoq toqoraavinnut tunineqartassanersut oqaluuserinissaa pisariaqartipparput, kisianni nunalerinermi aningaasaqarneq uagutsinnut pingaarnerpaavoq.

Suulut Hansen Qassiarsummi nunaateqarfimmi peroriartorpoq, ilinniakkanilu 2004-mi naammassinerata kingorna uteqqippoq. Taamanikkut angajoqqaavi sumiiffimmi savaatiliupput, Suulut aappanilu savaatileqarfik aamma savat tigunnginnerini ikiuuttarsimapput. Meeraanermiilli savaateqarneq pillugu ilinniarnissaq pingaaruteqartoq, Suulut Hansen isumaqarpoq.

- Savaatilinngortussanut ilinniarneq aamma sulianik misilittagaqarneq pingaarnerpaasoq, savaatillit akornanni oqaatigineqartarpoq. Meeraanermit akisussaaffimmik tigusisinnaanerup aamma savaateqarneq pillugu ilinniarneq pingaaruteqarpoq. Namminersorsinnaanermut aamma akisussaaffimmik tigusisinnaanermut tunngavoq, taanna oqarpoq.

Sila apeqqutaajuaannartoq

Kujataani nunalerinermi silap pissusia pillugu nassuiaammi sila kiatsikkiartussasoq, aamma ukiuunerani sila kissannerpaasassasoq oqaatigineqarpoq.

- Silap ukiumit ukiumut nikerartarnera siunissami annertunerulissasoq, nassuiaatip takutippaa, nassuiaammi taama allaqqasoqarpoq.

Kujataani novembarimi aperujussuarpoq, tassanilu savat hunnorujulikkaat qaqqani appussaapput. Kujataani nalinginnaasumik ukiuunerani kingusissukkut apisaraluarpoq, taamaattumillu savaatillit ilaasa savaatitik nersutaasivinnut eqqussimanngilaat. Suulut Hansenip siorna pisoq immikkut ittuunerarpaa, kisianni silap pissusiata allanngoriartorneranut tamatumalu nunalerinermut kingunerlunnera pillugu apeqqummut tunngatillugu ernumaqqusinngilaq.

- Savaatilinnut silap pissusia apeqqutaajuaannarpoq. 1960-ikkut qiteqqunneranni savat 48.000-inik amerlassuseqarput, ukiorluuneratalu kingorna 20.000-nik ikileriarsimapput. 1976-imi aamma kingusinnerusukkut 1992-imi ukiorluuvoq, taamaattumik pisunut taakkununnga sanilliullugit 2023-mi novembarimi pisoq annikitsuararsuuvoq, Suulut Hansen oqarpoq.

Ilungersunartut tamaasa anigortaraat

Silap pissusiata allanngoriartornera Suulut Hansenip eqqarsaatigisarpaa.

- Soorunami savaatilittut ilungersunartoqartuaannarpoq, silap pissusia ilanngullugu, taamaattumik ukiuunera immikkuullarillunilu artornarsimatillugu eqqarsaatigisarpara, taanna oqarpoq. 

Kisianni savaatillit annerusumik imaluunniit minnerusumik annaasaqartuartarput, taamaakkaluartorlu anigortarpaat, Suulut Hansen oqaluttuarpoq, taassumalu soorunami annaasat kingunerilu annikillisarniarlugit nammineq iliuuseqartoqartassasoq naqissuserpaa.

- Savaatillit ilungersunartunik aniguisarnerat oqaatigerusuppara, taamaattuarsimapput aamma taamaattuassapput.