Avannaata Kommuniani borgmesteriusimasoq, Palle Jerimiassen (D), kommunalbestyrelsimut maajip aallaqqaataanit uteqqippoq. Tamanna Avannaata Kommunianit uppernarsarneqarpoq.
- Ukioq kingulleq kommunalbestyrelsimit aaliangerneqarpoq 1. maj 2026-ip tungaanut sulinngiffeqartoq. Ukioq kingulleq aaliangerneq atuuppoq, kommuni Sermitsiamut allappoq.
Avannaata Kommuniani borgmesteriusimasoq, Palle Jerimiassen (D), kommunalbestyrelsimut maajip aallaqqaataanit uteqqippoq. Tamanna Avannaata Kommunianit uppernarsarneqarpoq.
- Ukioq kingulleq kommunalbestyrelsimit aaliangerneqarpoq 1. maj 2026-ip tungaanut sulinngiffeqartoq. Ukioq kingulleq aaliangerneq atuuppoq, kommuni Sermitsiamut allappoq.
Allatut nalunaaraluartoq
Borgmesteriusimasoq qinigaaffik nutaaq siorna upernaakkut aallartimmat, ukioq manna maajip aallaqqaataata tungaanut sulinngiffeqarnissaminik qinnuteqaataa kommunalbestyrelsip taamani akueraa. Sulinngiffeqarnissaminik taamani kissaateqarnermini peqqissutsi tunngavilersuutigaa.
Palle Jerimiassen kommunimi qinikkatut atuuffimminit sulinngiffeqarnini oktobarip tungaanut sivitsorusullugu, inoqatinut attaveqaatikkut, LinkedIn-ikkut, ukioq manna apriili naajartulersoq nalunaarpoq.
Tassani peqqissutsi pillugu politikkikkut sulinngiffeqarallarnermini takornarialerinermik suliffeqarfiutitaarisimasami inerisarluarusunnera tunngavilersuutigaa.
Politikki qimakkusukkaa
Palle Jerimiassenip oktobarip tungaanut sulinngiffeqarnerminik sivitsuerusunnera piviusunngunngilaq. Jerimiassenimmi tunngavilersuutigisimasai inatsisilerituunit nalilersorneqareerneranni tamanna pisinnaasimanngitsoq, inuttaa nammineerluni oqarpoq.
Maannalu tassa Avannaata Kommuniani kommunalbestyrelsimut ilaasortanngoqqippoq. Ilaasortanngoqqinnerminiillu ullut tallimat qaangiuttut qinikkatut atuukkunnaarusulluni Avannaata Kommunianut apuussaqarluni Sermitsiamut oqarpoq. Tamanna ima tunngavilersorpaa:
- Politikkimut uteqqinnissara eqqarsaatigileraagakku malugisinnaavara timera suli qisuariartartoq iluaalliulerluni, aama naqitsinera qaffaqqilluni, uippakajaarneq taanna atornikuusara uteqqittarpoq politikkimut uteqqinniarlunga eqqarsaleraagama.
- Timera piareersimanngilaq, naak immaqa inuttaa piumagaluartoq, Palle Jerimiassen Sermitsiamut oqarpoq.
Avannaata Kommuniata Palle Jerimiassenip qinikkatut tunuarusulluni qinnuteqaataa tigusimallugu Sermitsiamut uppernarsarpaa. Qinnuteqaallu taanna immikkut ittumik ataatsimiinnermi, piffissami qaninnermi suliarineqassasoq naatsorsuutigineqarpoq.
Siorna kommunimut qineqqusaarnerup nalaani KNR-imut oqarputit borgmesterinngoqqissinnaaguit tamanna angorusullugu. Borgmesterinngoqqinngitsoornerit maanna tunuarusulernernut peqqutaaqataava?
- Naamik. Tassami qineqqusaaraangatta siunnerfeqartarpugut. Kisianni aamma politikkikkut allanngorneq aamma akuerivara. Aamma taanna peqqutaanngilaq, Palle Jerimiassen oqarpoq.
Misilittagartooq
Palle Jerimiassen kommunimi politikkeritut ukiorpassuarni atuuffeqarpoq. Ilulissat Kommunerisimasaani, Qaasuitsup Kommunerisimasaani maannakkullu Avannaata Kommuniani qinikkatut sulinermik misilittagaqarpoq. Jerimiassen Siumumut ukiorpassuarni ilaasortaareerluni 2021-imi attaviitsunngorpoq. Taanna Demokraatinut 2025-imi kommunimut qinersisoqanngilaattaa ilaasortanngorpoq.
Pilersaaruteqartoq
Palle Jerimiassen kommunimi qinikkatut ataannartumik ukiuni 28-ini atuuffeqarpoq. Tunuarnissamik qinnuteqaataa akuerineqassappat taanna suliassaaleqissanngilaq. Suliffeqarfiutitaanimi misigisassarsiornermut tunngasunik sullissinermik suliaqarfik, inerisassallugu piareersimavoq.
- Suliffeqarfiutitaarnikuuvunga, taanna sanarfillugu ingerlaterujoorpara. Pissanganartorujuttut nuannerunartutullu isigivara, Palle Jerimiassen oqarpoq.
Palle Jerimiassenip parteeqataa, Niels Erik Bro, kommunimi qinikkap misilittagartuup ukiup ataatsip missaani sulinngiffeqarnerani sinniisutut atuuppoq.
Palle Jerimiassen kommunimut 2025-imi qinersinermi 104-nit qinerneqarpoq.
