Takornariartitsisartoq tapersersuivoq: Kalaallit inuussutissarsiortut salliutinneqartariaqarput
Inatsisissatut siunnersuutit marluk takornariartitsinermut tunngasut, tusarniaassutigineqaqqammertut, pingaartumik inuussutissarsiortut akornanni annertuumik oqallinnermik pilersitsipput. Siunnersuutigineqartunut tapersersuisut ilaat tassaavoq takornariartitsisartoq misilittagaqarluartoq, namminersorluni suliffeqarfiutiminik ukiut 13-ssaa ingerlatsisoq.
Assiliisoq: Leiff Josefsen
Ivik Knudsen-Ostermann Greenland Cruisesimik piginnittuuvoq ukiullu 13-it missaanni namminersortuuvoq. Taanna oqaluttuarpoq, suliassani tamani sulisunik kalaallinik sulisoqartarnissani aamma suliffeqarfinnik kalaallinit piginneqartunik tapersersuinini pingaartitarigigini.
Taanna takornariaqarnermut inatsisissamut nutaamut tapersersuivoq:
- Takornariaqarnermut inatsisissatut siunnersuummut tapersersuivunga, tassani piumasaqaataassammat suliffeqarfiit tamarmik kalaallit piginnittuuffigineqassasut imaluunniit kalaallit pingaarnertut piginnittuuffigineqassasut.
Greenland Cruisesip neqeroorutigai angalanerit, misigisassarsiornerit allallu sullissinerit Kalaallit Nunaanni sumi tamani takornariartartunut.
Takornarialerineq pillugu inatsisissatut siunnersuutit marluk tusarniaassutigineqaqqammertut
- Sumiiffinni immikkut toqqakkani takornariartitsisarnernut akuersissuteqartarneq pillugu Inatsisartut inatsisissaattut siunnersuummik tusarniaassuteqarneq. (Tusarniaaneq 28. maj 2024-mi naammassivoq)
- Tusarniaaneq uuminnga: Takornariartitsinermut, sumiiffinni nunami aalajangersimasuni zone-nut agguaasarneq il.il. (Tusarniaaneq 5. juni 2024 naammassivoq)
Ajornavianngilaq
Ivik Knudsen-Ostermann oqaluttuarpoq, sumiiffinni amerlasuuni takornariaqarnerup annerpaaffiani suliffeqarfiit nunanit allaneersut nunatsinnukartartut sullissassallu amerlasuut sullittarlugit.
Inatsisissatut siunnersuut akuersissutigineqarpat, naatsorsuutigaa suliffeqarfiit taakku niuernikkut annaaneqarsinnaasut, imaatigut takornarianik angallassissutit Kalaallit Nunaannut Kalaallillu Nunaannit angallassiunnaassappata, kisianni ajornavianngilaq, taanna oqaluttuarpoq:
- Tassami nunanit allaneersuupput, taamaattumik iluanaarutit tamarmik nunatta avataanukaanneqartarput. Taamatuttaaq angallassinermi nunani allamiut sulisoralugit ingerlatsisarput, pingaartumik angallassissutini tingerlaatilinni.
- Taamaalilluni imaatigut angallassissutit immaqa nunatsinnukartarunnaassapput taamaalillutalu niuernikkut annikitsumik annaasaqarsinnaassaagut, soorlu hotelini unnuisarnerit, Kalaallit Nunaannut Kalaallillu Nunaanniit angallassisarnerit. Kisianni qularinngilara, takornariat suli takkuttarumaartut, tamatumuunali suliffeqarfinnit nunatsinneersunit pigineqarlutillu ingerlanneqartunit sullinneqartassasut.
- Qilanaaraara takornariaqarnermut inatsisip akuersissutigineqarnissaa, taamaalilluni nunatsinni suliffeqarfiit takornarialerisut nunatsinnit pigineqartunik ingerlanneqalerpata iluaqutsiisoqassaaq. Aallartinnerani sungiukkuminaassinnaassagaluarpoq aammalu apeqqutit amerlasuut takkussuutissapput, kisianni tamanna aqqutissaraarput, Ivik Knudsen-Ostermann Sermitsiamut oqarpoq.
Takornariaqarnermut inatsisissatut siunnersuut allanit - ilaatigut sulisitsisut kattuffiannit Sulisitsisunit isornartorsiorneqarpoq, taakku isumaqarput siunnersuut taanna Kalaallit Nunaanni aningaasaliinissamut soqutiginninnermut ajornartorsiutinik pilersitsissasoq. Suliniutit takornariartitseqatigiiffinnit avataaneersunit aningaasaliiffigineqarsimasut maanna unitsikkallarneqartut arlaqarput, inatsisissatut siunnersuut innersuussutigineqarluni.
