Atlantikup avannaani
umiarsuaatileqatigiiffiit aalisartullu avaleraasartuut akii aatsaat taama
qaffasitsigisut sapaatip-akunnerini makkunani nalunaarutigaat.
Pisortatigoortumik pisortatigoortuunngitsumillu. Umiarsuaatileqatigiiffiillu
avaleraasartuut qerisut qaqerlaalluunniit tuniniaraluarpatigit akit ukiut
siuliinut sanilliullugit qaffasinneroqaat.
Ingammik Norgemi aalisartoqarfissuusumi,
avaleraasartoorpassuarnik pisassiiffigineqartartumi, aalisakkerinermik
inuussutissarsiuteqartut avaleraasartuut akitsorujussuarnerat nuannaarutigaat.
Avaleraasartuut "takorluukkatut akeqarnerat" Norgemi eqqartorneqarpoq.
Atlantikup avannaani
umiarsuaatileqatigiiffiit aalisartullu avaleraasartuut akii aatsaat taama
qaffasitsigisut sapaatip-akunnerini makkunani nalunaarutigaat.
Pisortatigoortumik pisortatigoortuunngitsumillu. Umiarsuaatileqatigiiffiillu
avaleraasartuut qerisut qaqerlaalluunniit tuniniaraluarpatigit akit ukiut
siuliinut sanilliullugit qaffasinneroqaat.
Ingammik Norgemi aalisartoqarfissuusumi,
avaleraasartoorpassuarnik pisassiiffigineqartartumi, aalisakkerinermik
inuussutissarsiuteqartut avaleraasartuut akitsorujussuarnerat nuannaarutigaat.
Avaleraasartuut "takorluukkatut akeqarnerat" Norgemi eqqartorneqarpoq.
Qallunaat qanga ima oqariartaaseqarput:
„Palasi sialussiorpat ajoqi kuserfigitissaaq.“ Taamaammat Kalaallit
umiarsuaatileqatigiiffii avaleraasartoorniartartut aamma nuannapput.
Akigitinneqartulli aatsaat taama
qaffasitsiginerat uppernarsarniarlugu Kalaallit umiarsuaatileqatigiiffiinit
oqaaseqartoqarumanngilaq.
- Ukioq 2025 uagutsinnut
pitsaanerpaavoq. Pisagut akigitinneqartullu ajorisassaanngillat.
Kalaallit ingerlatseqatigiiffiani
umiarsuaatileqatigiiffianilu Sikuaq Trawlimi pisortaq Carl Christensen Sermitsiamut
taama oqarpoq.
Ingerlatseqatigiiffiup umiarsuaataa Svend C.
Kalaallit umiarsuaatileqatigiiffiinit pisassiissuteqartunit umiarsuit allat
sisamat peqatigalugit avaleraasarniarpoq. Tamanna umiarsuit nunanit allaneersut
peqatigalugit Svalbardip kujataani Norgep imartaani Islandip, Nunatta Norgellu
akornaniittumi pivoq.
Naalagaq: - Naammagittaalliutissaqanngilaq
Umiarsuarmi Polar Amaroq-mi, aamma kalaallit
pigisaata Polar Pelagicip umiarsuaataani, naalagaq Geir Zoega
naammagisimaarluarpoq, oqaasissaqarpallaarnanilu.
- Juunimili aalisartaleratta
ingerlalluarpugut. Tunisassiorneq ingerlalluarpoq akillu pitsaapput.
Ajunngilaq, taamaammat naammagittaalliutissaqanngilaq, Geir Zoega,
avaleraasartoorniarnermi immikkut ilisimasalik, Sermitsiamut oqarpoq.
Polar Amaroq umiarsuullu aappaa Polar
Ammassak 2024-mi avaleraasartoorniarnermi katillugit 8.000 tonsinik pisaqarput.
- Maannakkut 12.000 tonsit
anguagut. Tassa 2025-mi ingerlalluarpugut. Aalisakkat pisarisartakkagut
maannakkut agguaqatigiissillugu 535 gramminik oqimaassuseqartarput. Aalisakkat
pitsaalluinnartuupput, Geir Zoega sapaatip akunnerata siuliata naanerani Sermitsiamut
oqarpoq.
„Soorlu lottomi eqquisimasugut“
Norgemiut aviisiat Fiskeribladet,
avaleraasartuut akii aatsaat taama qaffasitsigisut pillugit allaaserisaqartoq,
naapertorlugu „Norgep imartaa avaleraasartuunik ulikkaarpoq“.
Norgemi aalisartut umiarsuaatileqatigiillu
akit iluarisimaarpaat.
Akit qaffattarlutillu appartarput. Pisat
ataasiakkaat kiilumut 39 norskit koruunii sinnerlugit, tassa qallunnat
aningaasanngorlugit 25 koruunilerlugit, tunineqarsimasut Fiskeribladet
sapaatip-akunnerani kingullermi ataasinngornermi allappoq.
- Piffissami
kingullermi pisavut eqqarsaatigalugit soorlulusooq lottomi eqquisimasugut,
Stinne Ytterstad, Norgep avannaani Tromsøp kujataani Ytterstad
Fiskeriselskabimi pisortaq, atuagassiamut oqarpoq.
Savalimmiuni tunisassiorfinnut tuniniaasartoq
Kalaallit ingerlatseqatigiiffii Sikuaq Trawl,
Polar Pelagic, Polar Seafoodimit Islandimiullu Sildarvinsslanimit pigineqartoq,
Polar Seafood Greenland aamma Pelagic Greenland, Royal Greenlandimit
Islandimiullu Isfelag Vestmannaeyjamit pigineqartoq, katillugit tallimanik
aalisariuteqarlutik ukioq manna avaleraasartoorniarput.
Piffissami matumani kalaallit aalisariutaat
avaleraasartuunik qerisunik Savalimmiuni aalisakkerivinnut kiilumut 18-20
koruunit missaannik akilerlugit tunisisarpoq. Avaleraasartuut qaqerlaat akii
appasinnerupput.
Taamaammat 2025-mut naatsorsuutit 2026-mi
upernaakkut suliarineqarlutillu tamanut saqqummiunneqarpata avaleraasartuut
akii qaffassimasut aammalu ukiut siuliinut naleqqiullugu
isertitaqarnerusoqarnera Kalaallit Nunaanni ingerlatseqatigiiffiit naatsorsuutaanni
ajunngitsumik takuneqarsinnaassaaq.
Kalaallit Nunaannut
avaleraasartoortassiissutit ukioq manna 37.500 tonsiupput. 2025-mut
pisassiissutit, naalagaaffiit sineriallit Kalaallit Nunaata, EU-p, Norgep,
Savalimmiut Islandillu isumaqatigiissutigisaat, 576.700 tonsiupput. 2024-mi
pisassiissutinut sanilliullugit 22 procentimik ikileriarput. Naalagaaffiit
sineriallit ICES-ip, Nunat Tamalaat Imaani Ilisimatusarnermut
Siunnersuisoqatigiivisa, siunnersuutai malittarpaat. Rusland
avaleraasartoortassiissutinik aamma aalisarpoq, naalagaaffiilli sineriallit
isumaqatigiissutaannut ilaanngilaq.
- Kalaallit
avaleraasartoorniarnerat ingerlalluarpoq. Kalaallit pisassiissutigisaannit
8.000 tonsit missaannaat aalisarneqassasut naatsorsuinerit kingulliit
takutippaat, Aalisarnermut Piniarnermullu Nakkutilliisoqarfimmi
siunnersortaaneq Mads Nedergaard oqarpoq.
