Qamutit ingerlarsortut

Eqqumiitsuliortoq tamatigoortoq Nuka K. Godtfredsen Narsameersoq, frimærkinik arfinilinnik kalaallit qimussertarnerannut tunngasunik titartaasuuvoq, allakkerisitsisarfittalu Tusass Greenlandip frimærkit siulliit marluk saqqummerseqqammerpai.

Qimmeqanngikkaanni qimussertoqarsinnaanngilaq. Taamaattumik Tunumi Tasiilami Ittoqqortoormiinilu aamma Kitaani qaasuitsup killeqarfiata avannaani qimussimik angalaneq alutornartoq misigisinnaavarput.

– Qimussernikuuit? Sermitsiap eqqumiitsuliortoq Kujataaneersoq pasimisaarlugu aperaa.

– Aap ilaana, 2021-mi qallunaat filmiliortartut ilagalugit Qaanaamiippunga, Thulemut ilisimasassarsiorluni angalanerit tallimaat pillugu piviusulersaarusioqataagama. Ilisimasassarsiornermilu angallatigineqarsimasunik misiliinissatsinnik periarfissaqarluarluta, Nuka K. Godtfredsen Sermitsiamut oqarpoq. Qamutit isikkui sannaallu nunap immikkoortuini Avannaani, Kitaani aamma Tunumi immikkooruteqarluarput.

– Qaanaami qamutit angisuujupput aqunniaraannilu tallit nukittuujusariaqarlutik, Nuka K. Godtfredsen oqarpoq.

– Frimærkini siullerni marlunni kitaamioq qimusserluni Sisimiuneersoq takuneqarsinnaavoq, nunami ingerlaarpallaaraanni qimussit sangujoraartut atortariaqarput.

Frimærkini siullerni marlunni qimussit Kitaani Sisimiuneersut takusinnaavavut, nunakkoorutaalluartarmatalu perlaavini siornatungaat peqingasuullutik aqqutaanni akornutaasinnaasut anigorsinnaajumallugit. Nuka K. Godtfredsenip frimærki titartagaa siulleq 2007-imi saqqummermalli, frimærkit siulliit marluk Tusass Greenlandip saqqummersitaanni nr.10-tut nr. 11-tullu saqqummerput. Qimussit pillugit frimærkit saqqummersussat tulleriiaat tullii 2025-mi aamma 2026-mi saqqummersinneqassapput. 

Siunissami pilersaarutit nutaat

Nuka K. Godtfredsenip Nunatta oqaluttuarisaaneranut itsarsuarnitsamut tunngasunik titartakkanik nangeqattaartunik sisamanik saqqummersitsinini ingammik nuannarineqaatigaa.

Københavnimi Danmarkimi Katersugaasivissuarmi titartaasarfimminit katersugaasivissuup Kalaallit Nunaannut Issittumullu tamarmut katersugaatai misissuataarsinnaavai, qimussertarnerullu ukiuni 4.500-ni ineriartornera takusinnaallugu.

Nuka K. Godtfredsen ukiup aappaata affaata matuma siornagut illoqarfimmut inunngorfimminut Narsamut uterluni nuuppoq, tassanilu eqqumiitsuliortutut sullivimmini nutaami pilersaarutini soqutiginartut suliarileruttorlugit. Københavnimi Katersugaasivissuarmik suleqateqarnini ingerlateqqippaa; tamatumuuna titartakkanik nangeqattaartunut tunngasuunngitsunik, nunasiamulli naalagarsuutitap Claus Enevold Porsip atuakkiarineqarneranut assiliartassat pineqarlutik. Nuummi nunasiamut naalagarsuutitap imerajuttup taassuma 1729-mi sermersuaq kitaanit kangianut itivinniarsarigaluarpaa, qallunaatsiaqarfik kangilleq nassaariniarlugu, taamaallaalli sermersuup sinaani kunngip skåleerutiginissaa naammagiinnartariaqarlugu.

Nuka K. Godtfredsenip aamma takorluugarisartakkani siunissamut takorluukkatut titartakkatut nangeqattaartutut suliariniagaa taaguuteqarpoq »Qalasersuaq 2121« — Hans Egedep Nunatsinnut tikinneranit ukiut 400-t qaangiunnerannut tunngasussaq. Siunissamut assitassatut takorluukkat ilagaat biilimik innaallagiatortumik Narsamit ikaartarfik alutornartoq aqqutigalugu Qaqortumukarneq. Titartaasartup

Siunissami assit ilagaat biili innaallagiatortoq Narsamiit ikaartarfik alutornartoq ikaarlugu Qaqortumut ingerlasoq. Titartaasartoq Namminersorlutik Oqartussanit eqqumiitsuliornikkut sulianut tapiissutinik qinnuteqarsimavoq, tapiiffigineqarsinnaaguni titartakkat qalipannissaannut eqqissilluni sulisinnaassagami. Nunasiamut naalagarsuutitaq Pors pillugu atuakkap imaluunniit titartakkat tulleriiaat siulittuutitut saqqummersinneqartussat qaqugu saqqummersinneqarumaarnersut suli aalajangerneqanngillat.

Sermitsiami periarfissat tamaasa atorlugit Nuka K. Godtfredsenip inuppalaartumik saqqummeqqaarnera, 1997-imit 2001-imut nuannarineqarluartoq Andala pillugu aviisitta tunuani titartakkanik tulleriiaannik saqqummersitsisarnera atuartartunut eqqaasitsissutigisarparput.