Sorlaqarfiit noqitsinerat

Inequ Holm Sisimiuni inunngorpoq, sisamanillu ukioqartoq ilaqutariit Nuummut peroriartorfigisaanut nuupput. 

Ullumikkut 30-nik ukioqarpoq. Inuunera oqittorsiorfiinnaasimanngilaq, assoralisimaaraluaqalunili nuannersumik eqqarsartaaseqarnini aalajangiusimajuarpaa. Maanimi nunami Kalaallit Nunaanni asaqisamini aalajaalluni inuuvoq, qaamaneq inuunerlu akuuffigisani avatangiiseralugit.

Qaamanermut

Inequ Holm arnani, angunni angajunilu peqatigalugit peroriartorpoq. Meeraanera toqqissisimanarpoq nuannersunillu eqqaamasarpassuaqarfiulluni – ingammik arnani aalajaatsumik kissalaamillu isumaginnittoq. Angalaartuarluni inuuneq eqqaamavaa, silami pinngortitaq inuuffigalugu. Inuunerali nuanniitsortaqarpoq. Angajoqqaavi avipput, angutaa atornerluisunngorpoq attaveqarunnaarlunilu.

Aallaqqaammulli anaanaata niviarsiaqqat inuunerinnissaat eqqumaffigiuarpaa. Inequ sapaatit akunneranut arlaleriarluni tarnip pissusaanik ilisimasalimmut ornigutsittarpaa aliasoqatigiinnilu peqataatittarlugu, taamaalilluni angutaata atornerluineranit artorsarneq oqaluuseralugu suliarineqarsinnaalluni. Inequli 16-inik ukioqartoq aliasunnivik eqquivoq. Arnaa uitaaminit aallaaneqarluni toqunneqarpoq – angummit qimaqqammisaminit. Inequp nassaaraa. Takusani puigunngisaannagassaa.

- Sakkortoqaaq, eqqissisisimalluni oqaluttuarpoq – soorlu inuttut inuunermi taarnersaani ilungersornermini anersaartoqqissinnaalernissami tungaanut ilikkarsimarpalulluni.

Aliasunneq sakkortullunilu oqimaaqaaq, qatanngutigiillu marluk aanakkuminnut nuupput. Taamaakkaluartoq taarsiorneq ilimaginngisamik qaamanertaqarpoq.

- Anaanama siusissukkut tarnip pissusaanik ilinniarsimasumut ornigutsittarmanga ilikkareersimavara anniaatit oqaluuseralugit iluaqutaasartoq. Ilisimavara aliasunneq qanoq suliarineqarsinnaasoq – tassalu ilinniagassartaa, Inequ oqaluttuarpoq.

Anaanaasup paniisalu akornanni iliuuserisaq nipaatsoq oqaasertalerneqanngitsorlu nalaatsornerinnakkut panini arnamik annaanissaannut artornangaartumut piareersarlugit piukkunnarsarsimavai– siusippallaarujussuartumik sakkortuallaamillu. Artornartorsiorfiulli nalaani Inequ inunnik asannittunik, tapersersuisunik aliasunnerminilu ikiuuttunik avatangiiseqarpoq.

- Anaanama toqunerata kingornagut anigussaqqaarlugu aalajangiusimalluarpara. Tamannaannaanngitsoq – ingerlallualerumaartungalu, Inequ paatsuugassaanngitsumik aalajangersimarpalulluni oqarpoq.

Ulloq taanna Inequp aallartiffigaa – nukittuujuneranut, anguniagaanut inuunerlu inuuffiginniakkamisut aalajangiusimasani, nammineq aalajangiiffigisani.

Aliasunnerup nukiillu akornanni

Inequ siunniussivoq unitsitassaananilu ingerlarsorluni. Aalajangiusimavoq, atuarfimmi pikkorilluni saniatigullu unammisartutut crossfitertalerluni.

- Crossfit nukissanik aallerfigisarpara, timikkut sianissutsikkullu. Ullumikkut takusinnaavara tamanna misigissutsinnik suliaqarnermi aamma aallaaveqartoq, saniatigut inuunerup siumukarnerullu aqqani ajunngitsuliortarnissaq tunaartaralugu.

Atuarnermini angusarissaarnini atorlugu kigutilerisunngornialerpoq, taamaattumillu 2020-mi Danmarkimut nuulluni. Aalajangiusimasaali kimeerupput. Ullut ilaanni uffartilluni iviangimini naasoqarsimasoq malugaa. Iviangikkut kræftiusoq paasineqarpoq, 26-nik ukioqarpoq.

- Kemortittarneq ilutigalugu pisariaqanngitsut tamarmik piiarneqarput. Allaanngilanga uanitsoq qalipaajarneqartoq. Qamanilu ilorpianni paasilerpara inuunera iluamik imaqanngitsoq. Inuuvunga, qaatsiartumik, maannalu nalavunga qalipaajarneqarsimallunga, ilora imaqarani, nipaatsumik oqarpoq.

Tassanngaannaq kinaassutsiminut ilisarnaatigititani – crossfitertartoq, kigutilerisunngorniartoq – isumaarupput. Inuunera ikkappoq sammiveqaranilu.

- Iviangikkut kræfternerup saniatigut tassanngaannaq inuuninni kinaassutsinnik ajornartorsiortupilussuanngorpunga, Inequ oqaluttuarpoq.

Inequp qatanngutaa, Lea, New Zealandimit najugaqarfigisaminit Inequ katsorsartinnerani najorniarlugu Københavnimukarpoq. Qatanngutigiit imminnut qileruteqarput isorartussuseq piffissarlu apeqqutaatinnagit.

- Immitsinnut qamuuna attaveqatigiippugut, naallu nunarsuup illuatungaani najugaqaraluartoq tamatigut malugisinnaasarpara. Naleraraara. Taarsiornermi qaamaneq aqqutissiuussisoq, Inequ oqaluttuarpoq.

Ullut ilaanni Inequ angajuminut apeqquteqarpoq suli ullumikkut atuuttumik.

- Aperaara: Qanoq imminut tusaaniartoqarsinnaagami, Inequ oqarpoq.

Inequp paasilerpaa eqqarsaatimini inuusimalluni. Imminut maluginiartarsimanngilaq, imminut timiniluunniit tusaaniarnani. Tamanna kræfternerata pisariaqalersippaa – tamannalu imminut nassaariniarneranut aallarniutaalerpoq.

Kalaallit Nunaannut angerlartoq

Inequp paasilerpaa inuunerup imaqarnissaanut kigutilerisuuneq akimasooq imaluunniit crossfitimi ajugaanermit ujaminnattaat pingaaruteqanngitsut. Ilinniakkani taamaatinniarlugu aalajangerpoq – sulinissaminullu pilersaarutini qimallugit. Nappaatip anigoriartornera ilutigalugu nukiit allat takkutilersut misigai. Nipaatsumik assortugassaanngitsumillu inunngorfimminut kipisaneq. Sorlaqarfiit angerlaqqusipput. Nunatsinnut.

- Inuiattut tusartuartarsimavarput naleqqussartariaqartugut – kulturi alla najoqqutariniarlugu. Allat ileqqui atussagivut, inooriaasiat naleqartitaallu pigiliullugit. Angerlamulli apuuppunga, nunatsinni sorlaqarfinnut. Suminngaanneernermi eqqaamasariaqarpoq – sorlaqarfiit nukissanik tunisisuupput, Inequ oqarpoq.

Inequp Kalaallit Nunaannut angerlarnera angerlarnerinnaanngilaq – maqaasisimasaminut attavineqqippoq. Oqaatsinut, pinngortitamut naleqartitanullu iperartariaqarsorisimasaminut. Kalaallit Nunaanni ilaquttat amerlanngillat – amerlanerit allami najugaqarniarlutik aalajangersimavaat. Taamaakkaluartoq Inequ kisimiittutut misiginngisaannarpoq. Inuit akornaniippoq, anersaamut ataatsimoorfimmut qileruteqarlunilusooq.

- Maani nunatsinni akuerineqartutut misigisimavunga. Kulturerput pinngortitarsuarlu tulluusimaarutigeqaakka. Nunama tarniga noqippaa, Inequ qungujulaarluni oqarpoq.

Naggueqatini siuaassanilu tulluussimaarpaluttumik nipeqarluni oqaluttuarai – taakkuuppummi kinguaariit ingerlaneranni nunami peqqarneeqisumi inuusinnaallutillu aniguisimasut.

- Siuaassavut sunik nalaataqarsimanersut eqqarsaatigisaqaara. Nukissanik aallerfigisarpara. Eqqaasinneqartarpunga inuiattut qanoq nukittutiginersugut, kulturerpullu kimittuupilussuusoq, oqarpoq.

Kalaallit Nunaanni pinngortitaq avatangiiseralugu inuilu taamatut kultureqartut Inequp inuunerani qitiulluinnarput – kinaassusilerpaat, isumassarsiorfigalugit ulluinnarnilu inuunera isumaqartilerlugu. Ullumikkullu Inequp nunagisani nittarsaatissallugu nuannareqaa.

Nukiit ingerlateqqitai

Ullumikkut Inequ suut tamaasa sakkugalugit anguniagaqartarunnaarpoq. Inuunermi patajaatsuunissaa imartunissaalu piumanerusarpaa. Inuttut sulinerminilu. Ungasinngitsukkut namminersortunngorpoq namminerisaminik suliffeqarfeeranngualiorsimalluni. Takornarianik angallassisartuuvoq namminersortoq, Nunarput alutornaqisoq tikeraanut nittarsaattarlugu, qaqqat kangerluillu, nuna, eqqissisimaneq nukiillu timinik tarnimillu kivitsisut misigitillugit. Saniatigut nerisaqariaatsimik ilitsersuisarpoq, inuttut sungiusaasuulluni coachiullunilu – tamarmik misilittakkami iluaqutigisimasami ingerlateqqinnissaannik kissaateqarnermit pinngortut.

- Pitsaasumik inuuneqarnissamut nerisassat, aalaneq pinngortitarlu sakkussatut isigaakka. Uannut pingaartupilussuuvoq misigisassatigut ilisimasanillu nammineq inuuninni katersorsimasakka allat ikiorniarneranni atorsinnaagakkit. Inuit ataasiakkaarlugit – tamaasalu – ikiorusuppakka, Inequ oqaluttuarpoq.

Inequp timikkut peqqissuunissaq kisiat pinngilaa inuilli ilumikkut aamma qaamaneqalernissaat pingaartillugu. Neriunnermut eqqissisimanermullu inissaqartitserusuppoq - allat eqqaasillugit nukiit qamaneereersut.

- Neriulersitserusuppunga, eqqissisimanermik pilersitsillunga upperilersillugulu nammineq nukissat pinngortitamiittut aqqutigalugit, nerinermi aalanermilu, oqarpoq.

Taamaattumik aamma ilinniarnini ingerlatiinnarpaa. Maannakkorpiaq mat-pilatesimi ilitsersuisutut ilinnialersimavoq - alloriarnerup tulliatut ataatsimut isigisumik periusaanut ilassutaasussaq. Inequp pingaartinngilaa timip ilungersortinnissaa, paasinissaali tusaaniarlugu oqimaaqatigiinnermillu pilersitsilluni – aalanikkut sianissutsikkullu. Annertuumik alloriarnerit qaqutikkuinnaq allannguisarput. Arlalitsigut tassaasarput aalajangiinerit annikitsut – itisuumik ilummut anersaarneq, pinngortitami nipaallisimaneq, ilukkut nukissaqareernermik eqqaasitsisut. Tamanna Inequp ingerlateqqikkusuppaa. Qaqqani angalaaraangami misigisarpaa angalanerup taamaallaat angerlaassimanngikkaani – aammali isaassinissamut inoqatiminullu ingerlatitseqqinnissamut kajungilersittaraani.