IA Qeqertalimmi ajorsarpoq

Uummannami qinersinerit maanna kisinneqarsimalerput. Siumut 53,7 procentinit taaneqarsimapput, ajugaallutillu. Taamaakkaluartoq Uummannami kingullermik qinersinermit 24,5 procentpointinik kinguarpoq.

Taamaasillutik Siumut Avannaata Kommuniani taaneqarnerpaavoq, katillugit 36,2 procentinit taaneqarluni.

Siumut kommunalbestyrelsemi arfineq-marlunnik ilaasortaatitaqalerpoq, Demokraatit sisamat, Naleraq pingasut, Atassut marluk IA-lu ataatsimik ilaasortaatitaqalerluni.

Taamaasilluni Siumut kommunimi anginersanngorpoq, borgmesteriutitaqalissallunilu. Lars Erik Gabrielsen (S) taaneqarnerpaat tullertut inissippoq 565-init taaneqarluni – tamaasilluni suleqatigiinnissamut isumaqatiginninniarnissamut inissittuulluni.

Heidi Møller (D) kommunimi taaneqarnerpaavoq, 625-nit taaneqarluni.

Akunnerpaaluit kisitsisit kingulliit utaqqineqareersullu paasinarsivoq Qaanaami Siumut ajugaasoq, 56,7 procentinit taaneqarami.

IA partiit aappaattut inissippoq, 70-init taaneqarluni.

Ujuut Olsen Siumumeersoq, Qaanaami taaneqarnerpaavoq 143-nit taaneqarami.

52,9 procentinit taaneqarlutik Demokraatit Qaqortumi ajugaapput. Partii illoqarfimmi ajugaarujussuarpoq, 2021-mit 52,9 procentpointinik amerleriarami.

Partii 2021-mi Kommune Kujallermi kommunalbestyrelsemut isertitaqanngilaq, qinigassanngortitaqannginnami. Qinigaaffimmili katillugit pingasunik issiasuutitaqalerpoq.

Siumut 24,1 procentinit taaneqarluni tullitut inissippoq, taamaasilluni 24,4 procentpointinik kinguariarluni.

Demokraatineersoq Malene Vahl Rasmussen taaneqarnerpaavoq 302-nit taaneqarami.

Borgmesteriugallartoq Stine Egede (IA) Qaqortumi 63-nit taaneqarsimavoq.

Demokraatit arfineq-marlunnik ilaasortaatitaqalerpoq. Siumut tallimanik ilaasortaatitaqalerpoq, IA-lu pingasunik ilaasortaatitaqalerluni.

- Aningaasaqarnerup iluarsinissaa qitiusussaavoq qitiusussaavoq. Aningaasaqarnerput aaqqinngikkutsigut ingerlaqqissinnaannginnatta. Kommunerput artorsarpoq. Inuiaqatiifiilli allannguerusullutik taasipput, allanngueqataarusunnerat piareersimaffigaarput. Nalunngilara aamma akisussaaffik qanoq ittoq tigunerlugu, partiillu allat suleqatiginissaat aamma piareersimaffigivara. Demokraatit kisimik suliassaq tigusinnaanngilaa, Siumumiit aamma IA-miit suleqataasussat aamma nuannaarutigaakka.

- Demokraatini isumaqatiginninniarnissamut piumasaqaatit ersarissut piareersimatippagut. Taamaammat oqaloqatiginninnissamut qilanaarpugut, Malene Vahl Rasmussen KNR-imut oqarpoq.

Naak Demokraatinit Rachel Ingemann Qeqqata Kommuniani qineqqusaartuni taaneqarnerpaagaluartoq, borgmesteriugallartup Malik Berthelsenip partiia suli nukittuneruvoq. Malik Berthelsenip (S) borgmesteritut ingerlaqqinnissani naatsorsuutigaa.

- Qujamasuppugut tulluusimaarlutalu taama amerlatigisunit taaneqarsimagatta – pingaartumik Inatsisartunut qinersinermut sanilliullugu, tassami taanikinnerugaluaratta. Siumut suli annerpaavoq, Malik Berthelsen Sermitsiamut oqarpoq.

Demokraatini Rachel Ingemann taaneqarnerpaagaluartoq, partii kommunalbestyrelsemut pingasunik isertitaqarpoq. Siumut amerlanerussuteqarpoq, isumaqatiginninniarnernillu ingerlatsinissamut inissilluni.

- Partii amerlanerusunik taaneqartoq borgmesteriutitaqartarnera nalinginnaavoq, tamannalu ataqqineqartariaqarpoq, Berthelsen oqarpoq.

Taassuma erseqqissarpaa Siumup borgmesteriutitaqarneq ingerlateqqinniassagaa, kommunalbestyrelsemilu suleqateqarnissamut isumaqatiginninniarnerit pingasunngornermi aallartissasut oqaatigalugu.

Qeqqata Kommuniani taasinerit kisinneqarsimalerput, Siumullu ajugaarujussuarpoq 33,2 procentinit taaneqarluni.

Naleraq 23,5 procentinit taaneqarpoq.

Rachel Ingemann Demokraatineersoq kommunimi taaneqarnerpaavoq, 657-init taaneqarsimalluni.

Borgmesteriugallartoq Malik Berthelsen (S) 477-init taaneqarsimavoq.

Siumut arfinilinnik ilaasortaatitaqalerpoq, Naleraq sisamat, Demokraatit pingasut, Atassut ataaseq IA-lu ataaseq.

Siumut Sisimiuni ajugaarujussuarpoq, 41,2 procentinit taaneqarluni. Siumut taamaasilluni Sisimiuni suli siuttuuvoq.

Demokraatit 23,4 procentinit taaneqarpoq.

Borgmesteriugallartoq Malik Berthelsen (S) 471-init taaneqarpoq, Demokraatiniillu qinigassanngortittoq Rachel Ingemann 469-init taaneqarluni.

Naleraq Upernavimmi taaneqarnerpaavoq. Qinersisimasut 44,9 procentiinit taaneqarsimapput, qinersinermut kingullermut sanilliullugu 16,7 procentpointinik taaneqarnerusimallutik.

Jens Napaattooq (N) 101-init taaneqarsimavoq.

Knud Kristensen SIumumeersoq taaneqarnerup tulliattut inissippoq, 83-init taaneqarsimalluni.

Demokraatit qinersisunit 44,9 procentinit taaneqarlutik Ilulissani ajugaapput. Qinersinermit kingullermit 27,5 procentpointinit taaneqarnerupput.

Siumut qinersisartunit taaneqarnerit tulliattut inissipput, 27,8 procentinit taaneqarlutik.

Ilulissani qinersisartut 58 procentii taasiartorsimapput.

Demokraatinit Heidi Møller taaneqarnerpaasimavoq, 570-init taaneqarluni.

Siumumi borgmesterissatut sassartinneqartoq Martha Abelsen Kommuneqarfik Sermersuumi qinerneqarnerpaavoq, 710-nik qinerneqarsimalluni.

Borgmesteriugallartoq Avaaraq Olsen 678-inik taaneqarsimavoq.

IA aamma Siumut kommunalbestyrelsemi tamarmik arfineq-marlunnik issiatitaqalissapput. Tamanna isumaqarpoq kommunalbestyrelsemi suleqatigiinnissamut marluullutik isumaqatiginninniarnernik aallartitaqarsinnaapput.

Demokraatinit Poul Petersen 535-init taaneqarpoq, Siumumiillu Egon Petersen 379-init taaneqarluni.

- Oqaloqatiginninnissamut qaaqquneqareerpugut. Oqaloqatigiinnerillu aqagu aallartissapput, Martha Abelsen KNR-imut oqarpoq.

Inuit Ataqatigiit sumiiffiit ilaanni qinersisartunit taanikinnerupput. Inatsisartunut qinersinermi IA kinguariarujussuarsimasoq, aamma kommunalbestyrelsenut qinersinerni sumiiffiit ilaanni kinguariarfeqarpoq.

Tamanna pissutigalugu IA anguniakkanik suliassaqartoq, taamatullu qinersisartunut peqataatitsinerunermik aallussisariaqartoq, IA-p siulittaasua naliliivoq:

- Maannamut soorunami kisitsisit takutinnaasatsinni sumiiffiit ilaanni kinguariartutut inissisimavugut. Suliassaqarpugut IA-mi. Qinersinerit tulliinut ingerlateqqitassatsinni. Inatsisartuni aamma taama inissisimavugut. Taamaattorli anersaaq taanna pigalugu ilungersoqqissuugut, aamma takusinnaagatsigu kingullermik kinguariarfiusutut inissisimaffigisatsinni aamma inissisimagatta, sumiiffiit aamma ataasiakkaat isigissagaanni.

Akisussaaffimmilli tigumminnissimaneq aamma partiimut akisusinnaasoq, siulittaasup oqaatigaa:

- Soorunami ilungersorsimanerit assigiinngitsullu nalilersuutigineqarsinnaasut arlariissoraakka. Aamma qinersisartunut qanilaarneq killilik aamma peqataatitsineq killilik, ima paasillugu suliat killiffiinik ilisimatitsisarnermut tunngasinnaasut. Kisianni takusinnaavarput aamma nunat tamalaat akornanni, partiit akisussaaffimmik tigummiartut kinguarialaartartut. Aamma tamanna nunatsinni pisutut takuneqarsinnaalluni. Tassa partiit akisussaaffimmik tigummiarsimasut kinguariarsimasut. Taamaattorli tamanna uniffiginagu suliagut nangissavagut, Múte B. Egede oqarpoq.

Inuit Ataqatigiit Nuummi 2502-nik qinerneqarpoq, tassa qinersisinnaasut 40,6 procentinit taaguunneqarluni.

11,1 procentpointinik kinguariarput.

Siumut tullertut inissilluni 1476-init qinerneqarpoq. Martha Abelsen Siumumeersoq qinerneqarnerpaalluni 675-inik taaneqarsimavoq.

Borgmesteriungallartoq Avaaraq Olsen (IA) 665-init qinerneqarpoq.

Kommuneqarfik Sermersuumi qinersinernit kisitsisit 98 procentii kisinneqareersullu paasinarsivoq IA ajugaasoq. Qinersinernit 35 procentiusunit taaneqarsimapput.

Tassa kommunalbestyrelsemi arfineq-marlunnik issiatitaqarsinnaassallutik.

Siumut 31,3 procentinit taaneqarsimapput, aamma arfineq-marlunnik issiatitaqassallutik.

Demokraatit sisamanik aamma Naleraq ataatsimik ilaasortaatitaqalertussatut inissisimapput.

Siumumi Nuummi qinersisartut unnussiuaarneranni nuannattoqarpoq.

Illoqarfiit ilaanni qinersinermit kisitsisit paasineqallattaatillugit ilaanni nuannattoqartarpoq, assaallu pattaanneqartarlutik.

Kisitsisit takutippaat Kommuneqarfik Sermersuumi Paamiuni aamma Tasiilami Siumut taaneqarnerpaasimasoq. Tamanna Vivian Motzfeldtip nuannaarutigaa:

- Innuttaasut tamat oqartussaaqataaneranni kommunini nalilersuinerit aamma allaanerupput. Nunat immikkoortuani annertoorujussuarmik inuit ataasiakkaat sumiiffinni sunniuteqarluarsimasut ingerlalluarput. Tamanna neriuummik annertuumik pilersitsivoq, Vivian Motzfeldt oqarpoq.

- Neriuummik tunisivoq, aamma qineqqusaarnermi sassartitagut ersarissumik qineqqusaarsimapput. Aamma neriuppugut Martha Abelsen taaneqarluassasoq.

Qeqqata Kommuniani borgmesteriugallartup Malik Berthelsenip (S) Maniitumi qinerneqarluarnissani naatsorsuutigisimanngilaa – qinersinerullu inernera tupaallaatiginagu.

Illoqarfimmi arfinilinnik qinerneqarami Sisimiuni politikerit Maniitsumi tapersersorneqarnissaat ajornakusoornerusartoq nassuerutigaa.

- Sisimiuneersuusugut Maniitsumi qinersisikinnerusaratta. Maniitsumi innuttaasut illoqarfiup Sisimiunit aqunneqarnera naammagittaalliutigikulasarpaat, taamaammat angusara tupaallaatiginngilara, Sermitsiamut oqarpoq.

Maniitsumi qinigassanngortittoq siuttuusoq

Malik Berthelsenip Maniitsumi qinerneqarpallaannginnini akuersaarnerani Maniitsumi qinigassanngortittut angusaat allaanerupput.

Maniitsumeersoq Nathan Møller Naleraq sinnerlugu qineqqusaartoq 285-init taaneqarpoq.

Naleraq Maniitsumi taaneqarnerpaavoq, 41,3 procentinit taaneqarsimalluni. Qineqqusaartuni Nathan Møller (N) taaneqarnerpaasimavoq, 285-init taaneqarnerpaasimalluni.

Maniitsumi qinersisinnaasut 53 procentii ukioq manna taasisimapput. Kommuninut qinersinermi 2021-mi taasisinnaasut 62,6 procentii taasisimallutik.

Rachel Ingemann Demokraatineersoq 188-init taaneqarsimavoq.

Siumut Tasiilami qinersisinnaasut 71,2 procentiinit taaneqarpoq. 453-init qinerneqarluni. 32,9 procentpointinik siuariarpoq.

Naleraq qinerneqarnerpaat tulliattut inissilluni 63-init taaneqarpoq, tassa qinersisinnaasut 9,9 procentiinit taaguunneqarluni.

IA Narsami taaneqarnerpaalluni, 43 procentinit taaneqarsimavoq. Taamaattoq taaneqarnerpaagaluarluni, qinersinermit kingullermit sanilliullugu 29,5 procentpointinit maanna taanikinneruvoq.

Nanortalimmi IA taaneqarnerpaat pingajuattut inissippoq, tassa 22,1 procentinit taaneqarami - 21,5 procentpointinit kingullermit taanikinnerulluni.

Nanortalimmi Siumut taaneqarnerpaasimavoq, 40 procentinit taaneqarsimalluni.

Siumut Paamiuni 274-inik qinerneqarsimavoq, tassa qinersisinnaasut 54,8 procentii pissarsiaralugit. 2021-mulli sanilliullugu 7,8 procentpointinik ikinneruvoq,

Demokraatit 25,8 procentpointinik siuariarpoq, 137-inik taaneqarsimalluni.

IA 50-inik qinerneqarpoq, Atassut 26-nik, Naleraq arfinilinnit Qullerlu sisamanit qinerneqarsimavoq.

Qeqqata Kommuniani taasinerit Taseralimmi kisinneqaleruttorneranni pissangalluni malinnaasoqarpoq. Malinnaasut ilaat tassaavoq Demokraatineersoq Rachel Ingemann, taanna qineqqusaarnermini annertuumik anguniagaqarpoq; Borgmesterinngorusuppoq.

Qinersinerup kisinneqarnera malinnaaviginiarlugu partiip immikkoortortaqarfiani siulittaasoq Erne Olsen peqatigalugu Taseralimmiippoq. Qinersisiminik ilioraavik takugamiuk isikkua nuannaajallappoq.

- Qinersiserpassuaqarlunga takuara. Aamma Demokraatit. Oqariartuutivut eqqortut innuttaasut paasisimammassuk tanngassimaarutigaara, oqarpoq.

Borgmesteriugallartoq Malik Berthelsen aamma qinersiserpassuaqarpoq, sulili nalunarpoq qanoq amerlatiginerat.

- Pissanganartorujussuuvoq. Malillu qinerneqangaatsiarsimasugut takusinnaavara. Qinerneqarnerunissama neriuutiginera toqqortersinnaanngilara. Sivisuallaamik borgmesteritut issiannginnissaq pitsaasuusoq isumaqarpunga, Rachel Ingemann oqarpoq.