KL

DK

Air Greenland tunissuteqarpoq: Tissaluttuliaq katersuuffittut takussutissaavoq

Morten Okkels
lufthavnsåbningqaqortoq

Air Greenlandip mittarfimmut tunissutaa tassaavoq tissaluttuliaq. Tissaluttuliaq Qaqortup 1932-mili ilisarnaatigilluarpaa. Maannalu tissaluttuliaq mikininngorlugu sanaaq mittarfimmi aamma ilisarnaataalerpoq.

Tissaluttuliap ilisarnaatigilluagaa tassaavoq illoqarfiup qeqqani katersuuffittut atorneqartarnera.

Air Greenlandip attaveqatigiinnermut pisortaata Inga Dora G. Markussen aamma niuernermi pisortaata Chris Shern tunniussinermi tamanna oqaatigaat.

Tissaluttuliaaraq Anda Peter Egedemit sananeqarsimavoq.

Air Greenlandip mittarfittaamut tunissutaa.
Tissaluttuliaaraq mittarfimmut tunniunneqarpoq.

Imarisassat attuumassuteqartut

  • Qaqortup Mittarfiani aqutsisoq: Ulloq pingaaruteqartoq

    Morten Okkels

    Kujataanut ulloq pingaaruteqarluinnarpoq, minnerunngitsumik Bo Olsenimut.

    Taanna Qaqortup mittarfiani siornali aqutsisunngorpoq.

    – Sisimiut mittarfiata ammarneqarneranut aamma peqataanikuuvunga, uannullu isumaqarluinnarpoq Qaqortumi sullarilluinnartut peqatigalugit ammaanersiornissap tungaanut sulisimanerput maanna inerneqarmat, Bo Olsen oqarpoq.

    Nangippoq:

    – Ulaperulukkunnaaratta ulloq aamma ajunngilluinnarpoq. Arlallit aperipput taava kinguaattoortarunnaassanersugut. Maannali angusassarput anguvarput, tassa ammarneqarpoq, taava ulluinnaat tullinnguutissapput, tassanilu mittarfiup pitsaanerulertuarnissaa sulissutigissavarput.

  • Innuttaasut nuannaartut: Aqqutit ajornannginnerulerput

    Oscar Scott Carl

    Kirsten Nielsen Qaqortumi ukiuni 70-ini najugaqarsimavoq. Taassuma nuannaarutigilluinnarpaa illoqarfik suluusalinnut mittarfeqalernera.

    - Pingaaruteqarluinnarpoq. Nuummiit Qaqortumut, Narsarsuarmi unnueqqaanngikkaluarluni, angalasoqarsinnaalerpoq. Islandikkut angalallunga kiattunukarsinnaalernissara qilanaaraara, oqaluttuarpoq.

    Kirsten Nielsen Qaqortumi ukiuni 70-ini najugaqarsimavoq.

    Sofus Davidsenip mittarfiup eqqaani qaqqamit timmisartoq siulleq mittoq tulluusimaarluinnarluni malinnaavigisimavaa:

    - Ernera ullumi Marshaliuvoq, timmisartullu minnissaa isumagaa. Tulluusimaarutigeqaara.

    Sofus Davidsen tulluusimaarluinnarpoq.

  • Timmisartoq siulleq Qaqortumiit qangattarpoq

    Thomas Veirum

    Qaqortup Mittarfianit timmisartoq siulleq nal. 10.39 aallarpoq, taamaalillunilu Qaqortup Nuullu akornanni timmisartuussinerit ammaanersiornermi angallassissutigineqartut siulliit naammassipput.

    Qaqortup Mittarfianit timmisartoq siulleq sisamanngornerup ullaap tungaani qangattarpoq.

  • Mittarfimmi nuannattoqarpoq

    Thomas Veirum

    Mittarfimmi ullaap nuannattunnguaqarpoq. Qitittoqarpoq, erinarsortoqarpoq hurraartuuttoqarlunilu.

    Mittarfiup ammaanersiorneqarnerani erinarsortoqarlunilu qitittoqarpoq.
    Qaqortup Mittarfiata ammaanersiorneqarneranit.
    Erinarsoqatigiit ammaanersiornermi tusarnaartitsipput.

  • Qaqortumiit timmisartoq aallartussaq siulleq piareersarneqarpoq

    Thomas Veirum

    Qaqortup Mittarfianit aallartussat siulliit nal. 10.00 missaani ikiartoqquneqarput.

    Timmisartoq pilersaarutit malillugit nal. 10.30 aallassaaq. Nal. 10.20 ikiartortussat kingulliit ikiartorput.

  • Mittarfik pisortatigoortumik ammarneqarpoq

    Thomas Veirum

    Qaqortumi Mittarfik ammarlugu nukappiaqqap allunaasaq nal. 09.40 kipivaa.

    Nukappiaraq Sulunnguaq Raaschou, aqqanilinnik ukiulik, kørestolerpoq, taassumallu sanianiipput borgmester Malene Vahl Rasmussen aamma kommunalbestyrelsemi ilaasortaq Simon Simonsen.

    Borgmester Malene Vahl Rasmussen, Sulunnguaq Raaschoulu ammaanersiornermi qiorsisuusoq.
    Mittarfik ammarneqarpoq.

  • Politikerit eqitaarneqarlutik tikilluaqquneqarput

    Morten Okkels aamma Thomas Veirum

    Naalakkersuisut Siulittaasuat, Jens-Frederik Nielsen (D), aamma Inatsisartuni siulittaasoq, Kim Kielsen (attaviitsoq), mittarfimmut tikeqqaartunut ilaapput.

    Qaqortumut timmisartumi siullermi taakku ilaapput.

    Kim Kielsen og Jens-Frederik Nielsen modtages med kram i den nye lufthavn.

  • Timmisartoq siulleq Qaqortumut tikippoq

    Morten Okkels

    Timmisartoq siulleq ilaasoqarluni Qaqortumut tikimmat nuannannersuaqarpoq. Illoqarfiup mittarfeqalernera ullumi sisamanngornermi nalliuttorsiutigineqassaaq.

    Ilaasut, sulisut takunninniartullu erfalasulisaartut tikittut iserfissaanni nuannapput. Timmisartoq siulleq ilaasoqarluni Qaqortumut mippoq.

    Air Greenlandip timmisartuutaa Dash-8 Nuummeersoq Qaqortup mittarfianut nutaamut 1.500 miiterisut takitigisumut nal. 09.03 mippoq.

    Timmisartumi ilaapput pisortatigoortumik qaaqqusat innuttaasullu angalasut. Qaqortumut tikittooqqaarneq timmisartuussinermi oqaluttuarisaanermut ilannguppoq.

    Mittarfimmi ullaap tungaani persuarsiortoqassaaq, qullermillu ikitsisoqassalluni. Oqalugiartoqassaaq tunissutinillu tunniussisoqassalluni. Air Greenland tunissuteqartuussaaq.

  • Qatserisartut aamma piareersimapput

    Oscar Scott Carl

    Qaqortumi mittarfiup ammarnissaanut qatserisartut aamma piareersimapput. Taakku ajutoortoqassagaluarpat sillimasuusussaapput.

    Qaqortumi mittarfissami qatserisartut aamma piareersimapput.

  • Pissanganeq - Timmisartoq siulleq aallareerpoq

    Morten Okkels

    Qaqortumi mittarfimmi pissamaartoqarpoq, sulisullu innuttaasullu timmisartup siulliup tikinnissaanut piareersaleruttorput.

    Meeqqat erfalasunik tigummiarput, sulisullu tikittoqarnissaanut piareersarneranni Greenland Airports ullaakkorsiortitsivoq.

    Nuummiit timmisartoq qangattareerpoq, ilaasullu tassaapput politikkimi inuussutissarsiornermilu suliaqartut kiisalu innuttaasut angalasut.

    Naatsorsuutigineqarpoq Naalakkersuisut Siulittaasuat Jens-Frederik Nielsen (D) tikereernermi oqalugiassasoq. Borgmester Malene Vahl Rasmussen (D) aamma oqalugiassaaq, Greenland Airportsimiik Air Greenlandimiillu, tunissummik nassartumik, aamma oqalugiartoqassaaq.

    Mittarfimmi ullorsiortoqaannassanngilaq, aammali innuttaasut kaffillerfigineqassapput unnugulu qaaqqusaasut nerersuartinneqassallutik.

  • Oqaluttuarisaaneq: Ilaasussat siulliit nalunaarsorneqarput

    Oscar Scott Carl

    Laila Kuitse uialu Palo Kuitse Qaqortumi najugaqarput, Qaqortumilu mittarfimmi ullumi angalasussatut nalunaarsorneqartuni siulliullutik:

    - Nuan. Nutaarluinnaavoq, ukiunilu 40-ni utaqqisimavarput, Laila Kuitse oqarpoq.

    - Ulloq uagutsinnut Kujataanullu tamarmut immikkuullarilluinnarpoq, Palo Kuitse ilassuteqarpoq.

    Mittarfimmi angalasussatut nalunaarsorneqartut siullersaat.
Powered by Labrador CMS