Múte B. Egedep Polenip nunanut allanut ministeria naapissagaa

USA-p præsidentiata Donald Trumpip nunarsuup ilaanik, Kalaallit Nunaat ersarilluinnartoq ilanngullugu ammut isigaluni assini sapaatiummat saqqummersippaa.

Assiliartaq ima allassimavoq: “His Hemisphere” (Taassuma nunarsuup affaa).

Trumpip assi taanna Danmarkimik Kalaallit Nunaannillu isumaqatigiissummik atsiornissani sioqqullugu sapaatip-akunnerani matumani saqqummiuppaa.

Donald Trump naapertorlugu Kalaallit Nunaanni USA-mut nunat akerliusut, Kalaallit Nunaanni USA allakkatigut akuersitinnangu, sakkutooqarfimmik pilersitsisinnaannginnerat, sakkutuulersuisinnaannginnerat, paasissutissanilluunniit isertuunneqartussanik misissuisinnaannginnerat isumaqatigiissummi nutaami sapaatip-akunnerani matumani ilaatigut atsiorneqartussami imaqarpoq.

Jens-Frederik Nielsen Múte B. Egedelu New Yorkimut tikipput. Tikinnerminni nunatta USA-mi sinniisuanit, Jacob Isbosethsenimit tikilluaqquneqarput.

Naalakkersuisut New Yorkimiinnerminni FN-ip ataatsimeersuarnerannut peqataassapput. Tassanilu naatsorsuutigineqarpoq nunarput, Danmark aamma USA, Issittumi isumannaatsuunissaanut tunngasumik isumaqatigiissummik atsioqatigiissasut.

Siumup Inatsisartunut ilaasortaatitaata Erik Jensenip maanna USA-p, Kalaallit Nunaata Danmarkillu illersornissaq pillugu isumaqatigiissusiornissamut siunnersuutaat isertugaq qisuariarfigaa.

Erik Jensen Facebookimi allappoq, paasissutissat isertuunneqarallartut pillugit ilisimatinneqareernermi kingorna toqqissisimallunilu ernumanani. Nunanut allanut tunngasunut Naalakkersuisoq Múte B. Egede (IA) suliap ingerlanneqarneranut nersualaarpaa.

Erseqqissarpaa isumaqatigiissut suli isertuussaagallartoq, taamaattumillu tamanut saqqummiunneqannginnerani itisilerlugu oqaaseqarfigiumanagu.

Jensenip aamma Naalakkersuisut eqqissillutik sulinissaannut kaammattuuteqarpoq, oqallinnerullu tusatsiakkat paasissutissallu uppernarsarneqanngitsut tunngaviginagit piviusunik tunngaveqarnissaa kaammattuutigalugu.

– Kalaallit Nunaata siunissaa kalaallit nammineq aaliangissavaat aamma namminiussuseqarnerput nunallu killiinik ataqqinninnissaq tamatta kissaatiginikuuvarput.

– Nunat tamalaat akornanni suleqatigiinneq sillimaniarnerlu pisariaqartippagut – kisianni Kalaallit Nunaat pillugu aaliangiinerit Kalaallit Nunaat peqataatinnagu ingerlanneqassanngillat - Nunarput siunissarpullu matumani pineqarput, Erik Jensen allappoq.

Isumaqatigiissutip imarisaata inuiaqatigiinnut Inatsisartunullu saqqummiunneqarnissaa pillugu Siumup Naalakkersuisut kajumissaarsimagai aamma allappoq, ilisimatitsillunilu tamanna sulissutigineqartoq.

Naalakkersuisut siulittaasuat Jens-Frederik Nielsen (D) New Yorkiliarpoq.

Facebook atorlugu taama ilisimatitsivoq. New Yorkimi FN-ip ataatsimeersuarnerani Jens-Frederik Nielsenip USA-mik Danmarkimillu isumaqatigiissut atsiussagaa naatsorsuutigineqarpoq.

Jens-Frederik Nielsen allappoq Atlantikoq ikaarlugu angalanermini Kalaallit Nunaanni innuttaasut eqqarsaatiminiitillugit:

– Nunaqqaterpassuatsinnut piffissaq sakkortusimaqaaq, nalunngilara Nunatta qanoq pineqarnissaa pillugu ernumasoqarlunilu annilaangasoqartarsimasoq. Taamaatut inissisimasoqarnerani sulininni ilungersungaarlunga suliarivara.

Naalakkersuisut siulittaasuat oqarpoq neriuutigalugu Kalaallit Nunaannut tunngatillugu maanna eqqissisimanerulertoqarsinnaassasoq.

– Kalaallit Nunaat paarilluassavarput, pingaaruteqarnerpaat ataatsimoorfigalugit kiisalu ataqqineqarnissarput piumasariuartariaqarlugu. Akisussaaffik tamanna nassarlugu New Yorkiliarpunga.

Nunanut allanut tunngasunut naalakkersuisup Múte B. Egedep (IA) Jens-Frederik Nielsen New Yorkimut angalaqatigaa:

– Nunarput aamma siunissarput uummatinniitsillugu maanna USA-mut aallarpunga. Aallaqqaataaniit tunngavipput qimanngilarput. Siunissarput uagut nammineq aalajangersinnaajuaannassavarput, Múte B. Egede angalaneq pillugu Facebookimi allappoq.

Danskit ministeriunerat Mette Frederiksen aamma danskit nunanut allanut ministeriat Lars Løkke Rasmussen aamma New Yorkiliarlutik aallarput. Ritzau aamma TV2 taama allapput.

Frankrigip præsidentiata Emmanuel Macronip Kalaallit Nunaata, Danmarkip USA-llu isumaqatigiissutaat nuannaarutigaa.

Nutaarsiassaqartitsivik AFP taama allappoq.

- Maluginiarpara Danmarkip oqartussaassusia ataqqineqarpoq, nunat tamalaat inatsisaat ataqqineqarput, taakkorpiaallu tassa angorusussimavagut. Taamaattumik angusaq ajunngitsuuvoq, Macron Saint-Pierre aamma Miquelonimiinnermini oqarpoq.

Uuliasioqatigiiffiup Greenland Energy Companyp, Tunumi uuliamik ujaasisup, Kalaallit Nunaata, Danmarkip USA-llu isumaqatigiissutaat nuannaarutigaa.

Ingerlatseqatigiiffik naapertorlugu isumaqatigiissutip nunat taakkua pingasut akornanni pissutsit erseqqinnerulersissavai:

– Isumaqatigiissut nunaqavissut namminneq siunissaminnut pisussaaffeqarnerannut inissiisoq, nunallu pingasut akornanni ungasissumut isigaluni ersarinnerusumik sinaakkusiisoq, nunat akornanni isumannaallisaanermut annertusaataallunilu Kalaallit Nunaanni namminersortunut aningaasaliissutigineqarsimasunut aalaakkaannerusumik tunngaveqartitsisumik pilersitsivoq.

- Misissuinissatsinnut pilersaarusiatsinni akuerineqarnissamut suliarinnittoqarnissaata ingerlanneqarnissaanut qilanaarpugut, siulersuisuni siulittaasoq Larry Swets tusagassiuutinut nalunaarummi oqarpoq.

Anna Wangenheimip (D), peqqissutsimut inunnullu innarluutilinnut naalakkersuisup, USA-p, Kalaallit Nunaata Danmarkillu isumaqatigiissuteqarnissaat nuannaarutigaa.

Maanna Facebookikkut allaqqippoq, tamatumuuna inummut aalajangersimasumut immikkut qujaniarluni.

- Vivian Motzfeldt, politikeri arnaq piorsarsimassutsikkut perorsarneqarnikkullu kalallinut atugassarititaasut inerisarumallugit suleqataanera ilisarnaatigivaa.

- Angutitagut sullarissut qujaniarfigereerakkit, arnaq una immikkut aamma qujaffigerusuppara.

Wangenheimip januaarimi Washingtonimi tusagassiortunik katersortitsinermi Vivian Motzfeldtip kalaallisut oqalulluni toqqaannartumik kalaallit inuiannut saaffiginninnera eqqaavaa.

- Naligiittut ataqqineqarnissamut alloriarneq ersarissoq. Tamanna aamma piffimmi matumani, oqaluttuarisaanitsinnut allanngueqataavoq.

Motzfeldt politikeriusoq tulluusimaarutigineqarsinnaasoq, allappoq.

Vivian Motzfeldt januaarimi tusagassiortunik katersortitsinermi ima oqarpoq:

- Asasakka nunaqqatikka, nalunngilara tamassi malinnaasusi. Ulloq una tamatsinnut pissanganarsimavoq, oqarsinnaavungali ataatsimiinneq ingerlalluarsimammat. Ataqqeqatigiinneq tunngavigalugu oqaoqatigiinnerit ingerlasimapput.

- Siunissami aqqutit siumut isigisumik ingerlanniarlugit isumaqatigiissimalluta

Danmarkip, Kalaallit Nunaata USA-llu isumaqatigiissut nutaaq sapaatip akunnerata tulliani atsiortussatut naatsorsuutigineqartoq isumaqatigiissutigimmassuk nuannerpoq.

Folketingimut ilaasortaq Naaja Nathanielsen (IA) taama oqarpoq.

- Nutaarsiassaavoq nuannersoq, oqarpoq.

Tallimanngornermi unnukkut USA-p præsidentiata Donald Trumpip nalunaarutigaa nunat pingasut isumaqatigiissuteqarumaartut.

Nathanielsenip maluginiarnerpaavaa danskit kalaallillu naalakkersuisuisa pingaartissimammassuk isumaqatigiissummi Danmarkip oqartussaanerata Kalaallit Nunaatalu nammineersinnaatitaanerata ataqqineqarnissaat, nangilluni oqarpoq.

- Isumaqatigiissutip tatiginartuunissaa kalaallillu toqqissisimanissaat eqqarsaatigalugit pingaaruteqarpoq killigititaasut qaangerneqanngimmata, oqarpoq.

USA-p præsidentia Donald Trump naapertorlugu isumaqatigiissut malillugu USA Kalaallit Nunaanni isumannaallisaanermik nakkutilliisutut ataavartussatut inississaaq.

USA-p præsidentia tallimanngornermi unnukkut Truth Social-imi allappoq Kalaallit Nunaanni sakkutooqarnikkut ingerlaannaq annertusaasoqassasoq.

Isumaqatigiissutip qanoq imaqarnera danskit kalaallillu naalakkersuisuisa suli oqaatiginngilaat.

Katuap eqqaani allagartaq nivingavoq ima allassimasoq: “Imminornerussaaq!! USA-mik isumaqatigiissut atsiorutsigu."

DR naapertorlugu allagartaq Jens Erik Kjeldsenimit nivinngarneqarpoq.

- USA-p pisariaqartitai matussuserniarlugit Kalaallit Nunaanni qanorluunniit iliorsinnaappat imminornerussaaq, DR-imut oqarpoq.

Kenneth A. Howery, USA-p Danmarkimi aallartitaa, inuit attaveqaqatigiittarfianni X-imi allappoq isumaqatigiissut „USA-mut, Danmarkimut, Kalaallit Nunaannut Natomilu suleqataasunut tamanut ajugaanerusoq.

- Isumaqatigiissutip pingaarutillip tamatuma atuutilersinnissaanut Issittumilu sillimaniarnerup illersornissamillu kinguaariinnut tulliuttunut nukittorsaaniarluni suleqatit ikinngutillu Danmarkimeersut suleqatiginissaat qilanaaraara.

USA-p nunanut allanut ministeriata Marco Rubio allataa, isumaqatigiissut „USA-mut inuiannullu amerikamiunut ajugaanerujussuusoq“, ingerlateqqippaa.

Danmarkip illersornissamut pisortaa Michael Hyldgaard Kalaallit Nunaata, Danmarkip USA-llu isumaqatigiissutaat pillugu oqaaseqarusunngilaq.

Danmarkilli USA-mik illersornissamut peqatigiissortami Nato-mi suleqateqarnera siornatigutut ingerlaannassaaq.

Danskit illersornissamut pisortaa arfininngornermi ualikkut Nato-p Københavnimi sakkutooqarnermut ataatsimiititaliaata ataatsimiinneranut atatillugu tusagassiortunik katersortitsinermi taama oqarpoq.

Naleqqap siulittaasuata Pele Brobergip isumaqatigiissut nutaaq atsiorneqartinnagu oqaaseqarfigerusunngilaq.

Facebookimi taama allappoq.

- Paasilluarsinnaavara imarisaa pillugu eqqoriaasorpassuit, Inuiaat Kalaallinut sunniutissai pillugu.

- Suli atsiukkamik takusaqartinnata, pingaartippara Naalakkersuisut sulinissaanik periarfissalernissaat. Qaammaterpaaluit utaqqereerpugut, naammassinissaat utaqqimaalaaginnartigit pisortatigoortumik saqqummiinissaat.

Taamaattumik isumaqatigiissut pillugu saaffiginninnerit tamarmik Naalakkersuisunut saaffiginnissutigineqarnissaat piumasaraa.

Pele Brobergip assiliartaq "Deal or nor deal"-imik qulequtaqartoq assitaliussimavaa.

Tassani ilaatigut allassimavoq “Anersaartulaarta eqqissillutalu utaqqeqqiallalaarta” aamma “aatsaat atsiukkamik isumaqatigiissummik takoreerutta isummersornissaq pitsaaneruvoq, eqqoriaaqattaarata”.

USA-p, Danmarkip Kalaallit Nunaatalu sapaatip akunnerani aggersumi isumaqatigiissut nutaaq atsiorniarpaat. Kalaallit Nunaanni innuttaasut toqqissisimanissaat pingaarnertut tunngavigalugu Kalaallit Nunaat peqataassaaq.

Nunanut allanut naalakkersuisoq Múte B. Egede (IA) taama KNR-imut oqarpoq.

- Ukiut kingulliit marlungajaat imaannaannginnikooqaat kalaallinut, nalaatarpassuaqarpugut. Aammalu nunatsinni iluamut nunaqaannarsinnaanermik nalornineq inuppassuarnit aamma pigineqarnikuuvoq, Múte B. Egede tusagassiorfinnut tallimanngornermi oqarpoq.

Isumaqatigiissutilli naammassineqarnissaanut Naalakkersuisut neriuuteqarnissamut pissutissaqartut, Múte B. Egede oqarpoq.

Kalaallit siunissartik pillugu toqqissisimanissaat nunattalu siunissaanik nammineq aalajangiisinnaanissaq Naalakkersuisut isumaqatigiissummi pingaarnerpaatikkaat aamma oqarpoq.

- Taakkualu nalorninarunaarsissallugit maani nunami uagut tummiuarsinnaanissatsinnut toqqammavissat ujartorneqarnissaat soorunami isumaqatigiinniartitagut aqqutigalugit ilungersornikuuvugut. Massakkullu isumaqarpugut taakkua tamarmik toqqammaviit pigineqarlutik akunnitsinni isumaqatigiissuteqartoqarsinnaanngortoq, Múte B. Egede KNR-imut oqarpoq.

USA Kalaallit Nunaat pillugu isumannaallisaanermut isumaqatigiissuteqarpoq, Donald Trumpilli nunamik aqutsisinnaalernissamik kissaatai naammassineqarpasinngillat.

Taamatut Amerikami tusagassiorfiit arlallit nalilersuipput nunatta, Danmarkip USA-llu akornanni isumaqatigiissuteqartoqarneranik tallimanngornermi nalunaartoqareersorlu.

- Isumaqatigiissut nutaaq, atuuttuaannartussatut aalajangerneqartoq, Kalaallit Nunaata oqartussaaneranik USA-mut tunniussinermik imaqanngilaq, amerikamiut tusagassiorfiat Fox News ilaatigut allappoq.

Fox Newsili naapertorlugu USA-mi naalakkersuisut naassaanngitsumik isumaqatigiissuteqartoqarnissaa suli pingaaruteqartippaat.

Aviisimi The New York Timesimi allassimavoq Danmarkip Kalaallit Nunaatalu isumaqatigiissut Trumpimit allaanerulluinnartumik allaatigisaraat.

Aviisimi maluginiarneqarsinnaavoq qallunaat oqaaseqartartuisa nunap namminersorluni oqartussaaneranik tunniussiumannginnertik attakkaat.

- Taamatut oqaatigineqarpat isumaqatigiissut Trumpip Kalaallit Nunaannik tamakkiisumik aqutsinissamik piumasaqarneranut naapertuutinngilaq, aviisi allappoq.

Washington Postimi isumaqatigiissut pillugu allaaserisami allassimavoq „isumaqatigiissut pillugu ilisimasat isumaqatigiinngissutaagunartut“.

- Isumaqatigiissut naaperiutaarpasippoq, tassa Trumpimut ajugaanermik qinersinissaq sioqqullugu usorsisimaarutissaalluni, tamannalu peqatigalugu qallunaat, kalaallit europamiullu USA-p Kalaallit Nunaannik tiguaanissaanik ernumassuteqarnerannik annikillisaalluni.

Aamma maluginiarneqarpoq Kalaallit Nunaat Danmarkilu naapertorlugit isumaqatigiissut inatsisartuni suliarineqaqqaartariaqartoq, taakkualu marluullutik Donald Trumpimit isumaqatigiissummik nassuiaanissartik nangaassutigigaat.

Avannaata Kommuniani borgmesteri Lars Erik Gabrielsen (S) Facebookimi allappoq isumaqatigiissutip akeqanngitsumik naammassineqarnera upperisinnaanagu.

- Isumaqatigiissuteqalertut amerika akiliuteqarani , matematikkertitsisorissaalaarnikuulluni uppernanngik.

- Akiliivugut, aammali akiliigatta pissarsivugut pissarsiagut ataqqineqassappata, allappoq.

Peqqissutsimut Inunnullu innarluutilinnut Naalakkersuisoq, Anna Wangenheim (D), Facebookimi allappoq tulluusimaarutigalugu piffissami nunarsuup Kalaallit Nunaannik isiginnileruttorfiani suleqatigiissinnaaneq takutinneqarmat.

- Puigussanngilarpummi nunatta tiguagarneqarnissaa, allaallumi nunasiaatinngortinneqaqqinnissamut ernumassuteqarneq killiffiusimammat - Naalakkersuisullu nunatut pisinnaatitaaffeqarnerpullu illersorneranni, ilissarsiornermi innuttaasuniillu tunuliaqutserluarnerat maanna nukittoqutaasimasoq uppernarsivarput.

Anna Wanhenheimip nuannaarutigaa pissutsini taamaattuni partiit tamarmik isumaqatigiissimammata.

- Suliaq ukiuni kingullerni nalinginnaasumik suleriuseqartitsinngitsoq, allannguisoq oqaluttuarisaanitsinni alloriaqqiffiulersoq, nuannaarutigaara isumaqatigiittoqarnissaannut qanillattortoqalermat. Nunatsinnuinnaq tunnganngilaq - isumaqarpunga nunarsuatsinni minnerunngitsumillu NATO’p patajaallisarnissaannut pingaaruteqartuusoq taamatullu nunarsuup eqqissisimatinnissaannut ataatsimoorfeqarnermik.

Múte B. Egedep (IA), nunanut allanut tunngasunut naalakkersuisup, piffissami aggersumi Inatsisartunut innuttaasunullu paasissutissiiuarnissaa tapersersorpaa.

IA sinnerlugu Folketingimut ilaasortaasimasoq Aaja Chemnitz Facebookikkut aamma qisuariarpoq, tunuarsimaarnerullunili.

- USA-mik isumaqatigiissutip nutaap allassimanerisa panernissaat qilanaaraara. Aamma isumaqatigiissutip imarisaasa takunissaat. Tamassuma tungaanut suli qularpunga.

- Trump annerusumik tatiginngilara.

Allappoq Kalaallit Nunaata imartaani annertuumik aarlerinartoqarnera tunngavissaqartinnagu. Amerikamiulli politikkikkut siorasaarinerat kisimi aalassassutaasartoq.

- Taamaattumik maannakkut Kalaallit Nunaannut aaqqiissutissaq tassaanngilaq USA-p sakkutoorpassuisa nunatsinnut tikittarnerisa annertusarnissaat, tassaavorli aningaasaqarnitta, atugarissaarnitta toqqissisimanittalu nukittunerulersinneqarnissaat.

- Nammineq aalajangiisinnaanerput ataqqineqarmat tamanna ajunngilaq, tamannali immikkut oqaasertalernagu atuuteriiginnartussaagaluarpoq. Uniuinerpunga - imaluunniit?

Aaja Chemnitz allappoq pitsaanerpaamik pisoqarnissaa neriuutigalugu, isumaqatigiissutillu naammassinissaanut ilungersorluni suliniuteqarsimaneq qujamasuutigalugu.

Inuit Ataqatigiit sinnerlugit Folketingimut ilaasortap Naaja H. Nathanielsenip ippassaq unnukkut USA-mik isumaqatigiissut nutaaq Facebookimi quppernermini naatsumik qisuariarfigaa.

Qisuariarnermini Múte B. Egedep allassimasaa, tassa isumaqatigiissut sinaakkutit iluanniittoq, siammarterpaa.

Naaja H. Nathanielsen ima allappoq:

- Nutaarsiassaq tamatta neriuutigalugu utaqqisimavarput. Isumaqatigiissutigineqarumaartup nammineerluta aalajangiisinnaatitaanitsinnik attassitsiinnarnissaa pingaaruteqarpoq. Naalakkersuisut isumaqatigiissummik naammassinninnissaannut illersorpakka.

USA-p præsidentiata Donald Trumpip oqaatigaa isumaqatigiissut nutaaq USA-p, Kalaallit Nunaata Danmarkillu isumaqatigiissutigisassaat naassaanngitsumik atuutissasoq.

Marc Jacobsen, Forsvarsakademimi Issittumi Sillimaniarnermik Ilisimatusarfimmi pisortaasoq, taama naliliivoq:

- Isumaqatigiissut 1951-imeersoq, 2004-mi nutarterneqartoq, NATO-p atuunnerata nalaani atuuttussatut oqaatigineqarpoq. Maannali allannguutaasoq tassaavoq isumaqatigiissut naassaanngitsumik atuutissasoq.

Marc Jacobsenip innersuussutigaa USA-p Danmarkillu sakkutooqarfinnik isumaqatigiissuteqarsimanerat, tamannalu naapertorlugu USA-p Nato aqqutigalugu Danmark Kalaallit Nunaata illersorneqarnerani ikiortussaavaa.

Lektorip erseqqissarpaa isumaqatigiissut nutaaq takusimanagu, taamaattumillu amerikamiut, kalaallit qallunaallu tungaannit tamanut nalunaarutigineqartut tunngavigalugit oqarluni.

Allannguutip aappaat, Donald Trumpip isumaqatigiissummik nassuiaaneranit Marc Jacobsenip maluginiagaa tassaavoq Trump naapertorlugu Kinap Ruslandillu Kalaallit Nunaanni sakkutooqarfigisaqalersinnaannginnissaat isumaqatigiissummi qulakkeerneqartoq.

- USA-p Kalaallit Nunaat sakkutuuminik nakkutiginikuusimavaa. Maanna aamma pappiaqqatigut paasitinneqarpugut naalagaaffiit allat tikilluaqqusaanngitsut, oqarpoq.

Marc Jacobsen naapertorlugu ukiut qulit matuma siorna Kinap Kalaallit Nunaata kujataani sakkutooqarfik atorunnaarsimasoq pisiariniarlugu soqutiginnittoq. Donald Trumpili naapertorlugu isumaqatigiissummi nutaami tamanna periarfissaajunnaartinneqarpoq.

Taamaattoq, maannakkut ilisimasavut naapertorlugit sakkutooqarfimmik isumaqatigiissutip saniatigut allannguuteqarpallaanngilaq.

Naatsorsuutigaa USA-p Kalaallit Nunaanni sakkulersornerulernissaa ilimanartoq, tamannalu sakkutooqarfimmut isumaqatigiissut aqqutigalugu aamma periarfissaareerpoq.

- Donald Trump ajugaasuutut isikkoqartissinnaaqqullugu nutaamik isumaqatigiissuteqartoqarnissaa pingaaruteqarsimavoq, Marc Jacobsen oqarpoq.