Air Greenland: Taamaattumik unnuakkut timmisartuussisinnaanngilagut unnuisitsisinnaanatalu

Avannaani kinguaattoornerit suli ajornartorsiutaapput, Ilulissaniit avannamut angalasut unnuiffissaaleqimmata. Akunnittarfiit unnuisarfiusut tamarmik ulikkaaqqapput, ilaasullu ingerlaqqissinnaanngitsut namminneq akiliigallarlutik unnuiffissarsiortariaqarput, timmisartortitseqatigiiffillu unnuiffissaat kingusiinnaani akilertarpaa.

AAMMA ATUARUK

Nunatsinni angalasut: Kipiluttunartoq, qasunartoq innarluutillillu sullinneqarnerat annertunerusinnaasoq

Inuutersuaq-Ulloriaq Løvstrøm ersinngitsumik innarluutilimmik qitornaqarpoq. Taassumalu Sermitsiamut oqaluttuaraa kinguaattooqqanermi unnuiffissarsiorniarnissaq kipiluttunarsimasoq.

Sermitsiap Air Greenland attaveqarfigaa, taakkualu oqaluttuarput angalasunut immikkut pisariaqartitsisunut immikkut ikiorsiissuteqartarlutik:

- Angalasut bilitsiminnik inniminniinerminni immikkut ikiorneqarnissaminnik pisariaqartitsisut angalannginnerminni atuisut sullissiviannut saaffiginnittartussaapput. Taamaalilluni timmisartumut ikiorneqartariaqarnera imaluunniit immikkut isumagineqartariaqartoq qarasaasiatsinni nalunaarsorneqartarpoq.

Air Greenland Hidden Disabilities Sunflower Programmemut ilaavoq, tassanilu ilaasut innarluuteqartut toqqissisimanartumik angalasinnaanissaat siunertaavoq. Suliniut tamanna inuit ersinngitsumik innarluuteqartut, soorlu ADHD-ertut, autismertut, isumakuluuteqartut, tusilartut anniartuaannartulluunniit angalanerat toqqissisimanarnerulersinniarlugu siunertaavoq.

Solsikkemik qilernerusiaq tulleriaannermut pisinnatitaaffiliinngilaq

Air Greenlandimi check-inimi timmisartullu iluani sulisut ersinngitsumik innarluuteqartut ilisarnaatigisaanik ilisarsineq isumaanillu paasinninnissaq sungiusarsimavaat:

- Pingaaruteqarpoq eqqaamassallugu ersinngitsumik innarluuteqartut ilisarnaataat qilerneruseq utaqqisuni siulliunissamut imaluunniit immikkut ittumik pineqarnissamut periarfissatut isigineqanngimmat, piffissaqarnerunissamut, utaqqisinnaassuseqarnerunissamut ikiorneqarnerusinnaanermullu nalunaaqutaammat, Air Greenland oqarpoq.

Unnukkut timmisartuussisarnissaq akisuallaartoq

Aqqalualiit Broberg Nuummiit Qaanaamut angalavoq, ullunili tallimani Ilulissani kinguaattooqqavoq. Taassuma unnukkut sila pitsaanerugajuttarmat timmisartuussisisoqarsinnaannginneranik apeqqutit akissutissarserusuppai.

Air Greenland Sermitsiamut ilisimatitsivoq Qaanaamut aqqut timmisartuussinermi unammillernarnerpaat ilagigaat, avannarpasinnerusumiimmat silamullu isumannaallisaanermullu immikkut piumasaqaateqarluni. Qaanaamut timmisartuussisoqarsinnaassappat Qaanaamiinnaanngitsoq aammali Ilulissani Upernavimmilu sila pitsaasariaqarpoq, timmisartoq utinngitsoorpat taakku mittarfiusinnaammata:

- Sillimaniarnermut piumasaqaateqarpoq, akerlilersorsinnaanngisatsinnik. Taavaattumik silap timmisartuussiffiusinnaanissaa pisariaqarpoq.

- Paasisinnaavarput Ilulissani silagissuaq kinguaattooqqalluni aallarsinnaannginneq akuersaaruminaassinnaasartoq, kisianni timmisartup qangattarnissaanut piumasaqaaterpassuaqarpoq naammassisariaqakkatsinnik - Uagullu Air Greenlandimi isumannaallisaaneq akerlilersorsinnaanngilarput.

Unnukkut silaqqinnerusarpoq, unnukkulli angallanneq akisunerusarpoq:

- Tamatumunnga pissutaasut ilagaat mittarfiit nalinginnaasumik ammannginneranni mittarfinnik ammatitsisarutta immikkut akiliisariaqarnerput, tamatumalu saniatigut usilersornermut orsersornermullu inuttaqarnissaq isumagisariaqaratsigu.

- Aamma inuttat unnuami sulisimasut inatsisitigut qasuersaarsinnaatitaasariaqarmata aqaguanilu timmisartuussinissamut sulisinnaatitaanngillat.

- Tamakku pissutigalugit unnukkut timmisartuussinissaq maannakkut piviusorsiornerunngilaq, tamannami aningaasartuuterujussuussammat, timmisartortitseqatigiiffik oqarpoq.

Unnuiffissat ajornakusoortut

Kinguaattoorfinni akunnittarfiit Ilulissani ulikkaaveqqaapput.

Angalasut kinguaattoornermi unnuisariaqartut nammineq unnuiffissaminni ujaaseriarlutik unnuiffissamut akiliigallartariaqarnerminnut akissaqanngitsut, Aqqalualiit Brobergip ernumagai.

Nalinginnaasuugaluarpormi angalanissaq taamaatinneqaraangat hotelimut inissinneqartarneq. Ukioq mannali angallaffiunerpaap nalaani ajornakusoorpoq.

- Timmisartornermik suliaqarnermi nalinginnaavoq angalasut ilaat unnuiffissaminnut namminneq akiliisarnerat, timmisartuussinerit taamaatiinnarneqaraangata. Air Greenlandimi tamanna pinngitsoortinniarlugu iliuuseqartarpugut, ajoraluartumilli ilaannikkut tamanna pinngitsoorneqarsinnaaneq ajorpoq. Taamaattoqartillugu soorunami akiliutit utertittarpavut, akiliinermut uppernarsaat atuuttoq takutinneqarpat.

- Sulisut sapinngisartik tamaat ikiuiniartarput, pingaartumik takornariarpassuaqartillugu unnuiffissallu ulikkaaqqasinnaapput. Taamaattoqartillugu siniffiit inissittarpavut, angalasullu timersortarfinni unnuisarlutik – siniffiilli ulikkaaqqagaangata ajoraluartumik periarfissavut killeqarput.