Trina Poulsen
Evaldsen Ukaliusami marlunnik atuartuuteqarpoq. Pania nukarleq 8. klassiuvoq.
Aappaa meerarsiaavoq akisussaaffigisaa atuartuni minnerniittoq.
Trina Poulsen
Evaldsen Ukaliusami marlunnik atuartuuteqarpoq. Pania nukarleq 8. klassiuvoq.
Aappaa meerarsiaavoq akisussaaffigisaa atuartuni minnerniittoq.
Atuartut maanna
sumiiffinnut assigiinngitsunut utaqqiisaarutaasunut siammarlugit – ilaatigut
Qinngutsinni Miniklubimut – inissinneqarput. Trinallu panimmi
oqaluttuarneratigut novembarimi ininut allanut nuunneqarnissaannut
pilersaaruteqartoqartoq paasivaa.
- Atuartut
nuunneqaqattaarnerat uagutsinnut panitsinnut nukarlermut puullaaqinarpoq,
taassumami allannguutinut
sungiussiniartarnera isertitsiniartarneralu allaanerusaramik. Maannalu
nuutsinneqaqqilerlutik, Trina Poulsen Evaldsen oqarpoq.
Novembarimi nooqqissasut
Trinap oqarnera
naapertorlugu angajoqqaat qanoq iliortoqarnissaanik pisortatigoortumik
ilisimatitsisoqarsimanngilaq, atuartulli novembarimi nooqqinnissap ilimanarnera
tusarsimavaat.
- Angajulliit
Qinngutsinni atureernerup kingorna ornittakkami atuarallarput, aamma allamut
nuunnissaat imaluunniit nooqqikkumaarsinnaanerat ilimasaarutigineqarpoq.
Meeqqat novembarimi nooqqissasut tusarsimavaat, uagulli ilinniartitsisuniit
atuarfimmiilluunniit suli tusanngilarput, Trina oqarpoq.
Sanaartorneq
kinguaattoortoq aaqqiissutaagallartullu sivisuut
Kommuneqarfik
Sermersooq Atuarfik Inussummut sanaartortitsisoq sanaartugassinneqartartumut
Istakimut suli isumaqatigiinniarpoq. Atuarfissami nutaami ikuallattoornermi
imermik seqqartaatilersuinissaq aappaagu aggustip tungaanut suliarineqartussaq
sapaatip-akunnerata siuliani suliariumannittussarsiorpaa. Ukiumi atuarfiusumi
tullermi piffissaliussat suli nalorninassasut angajoqqaat
naatsorsuutigissavaat.
-
Paasissutissiisarneq naalliunnaqaaq. Paasissutissanik amigaateqarnaqaaq.
Qaqugu? Allaannginnami qaqugu inissikkumaassanersut nalullugu sattalluta
ingerlalluta, Trina oqarpoq.
Paniata nukarliup
Atuarfik Inussummut nuunniarnermini nutaanik atuaqateqalertussanngornini
piareersarfigisariaqaraa anaanaasup misigaa. Sanaartornerulli kinguaattoornera
pissutigalugu tamanna pinngitsoormat Atuarfik Samuel Kleinschmidtimi
aallartipput kingornalu Atuarfik Ukaliusamut uteqqillutik.
Toqqissisimanermut
ilikkagaqarnissamullu kalluaasoq
Ukaliusaq
matuneqanngikkallarmat atuarfiup silaannaluttarnera ilaqutariit misigaat.
Trinap pania niaqorlulluni qasoqqallunilu angerlartartoq anaanaasup
oqaluttuaraa. Angajoqqaallu isumakuluutitik piullugit arlaleriarlutik
saaffiginnittarsimallutik.
- Panitta
niaqorlussuaarluni qasullunilu angerlartarnera ilinniartitsisuannut ukiut
marlupajaat matuma siorna saaffiginnissutigaarput. Silaannarissarfinnik
pilersorneqarnikuusut iluaqutaassasullu atuarfiup pisortaata tullersortaaniit
akineqaannarpunga, Trina oqarpoq.
Nuuttaqattaarnerit
ulluinnaallu allanngoqattaarnerat meeqqanut sunniuteqartoq Trina oqarpoq –
atuarnerannut misigissutsitigullu.
Atuarfiup Inussuup qaqugu atulernissaanut nalornineq, Atuarfiullu Ukaliusap matuneqarnera atuartut ilikkarniarnerannut misigissusaannullu kinguneqartoq, angajoqqaat ilaat Trina Poulsen Evaldsen oqarpoq. Assi nammineq pigisaq
Privatfoto
-
Assorsuaq sunniuteqartarpoq, atuanngitsoorfiit amerlaqaat.
Timikkuinnaannginnami sunniutit, misigissutsikkulli aamma immikkut
piareersaateqaqqaarnissamut. Meeqqammi tamarmik nalinginnaasumik
pulapallaannarneq ajormata, Trina oqarpoq.
Atuartut ingammik
matematikkimi kinguaattooqqanerat pissutaalluni 8. klassimi sammisassatik
aallartitsinnagit angummanniaqqaartussaassasut angajoqqaat angajullerni
atuartuutillit ataatsimiinneranni ilinniartitsisut eqqaavaat.
Nalornineq
ilaqutariinnut ingammik soraarummeertussanik atuartuutilinnut ilungersunarpoq.
Trinap pania angajulleq, aamma Ukaliusami atuartuunikoq, Danmarkimi ukioq manna
9. klassimi atualerpoq, aappaagulu uteqqittussaassalluni. Anaanaasullu panimmi
inaarutaasumik soraarummeernerminni qanoq angusaqarumaarnerat
isumakuluutigilaarpaa.
- Meeqqat atuarfiat
alloriarnissamut tulliuttumut tunngaviuvoq, panikkalu ilinniagaqaqqitsinnatik
karakteriminnik qaffassaasariaqassarnersut ernummatigisinnaavara, oqarpoq.
“Meeqqat
nooqqinnissaat pitinnagu suut tamarmik inissinneqareersimanissaat
qulakkeersiuk”
Tulliani
nuuttoqartinnagu aalajangikkat ersarissut pitsaanerusumillu
pilersaarusiortoqarsimanissaa Trinap ujartorpaa.
- Tulliani
allannguinialertigani suut tamaasa qulakkeeqqaaqqullugit naatsumik
oqaatigiinnarsinnaavara. Suliniutit iluatsinngitsut kingunerat uagutsinnut
tuppoq, inissisimaffigalugu erloqinarpoq, Trina oqarpoq.
Atuartitsiviugallartut
maannamut suli ulluinnarsiutaassapput – Atuarfiup Inussuup atulerneqarneratigut
meeqqat toqqissisimanissamik pisariaqartitaat tunniunneqassasoq aalajangiinermi
tullermi neriuutigineqarpoq.
