Ataatsimiititaliami siulittaasoq suliamut kinguaattoorfiusumut: – Atuarfissuassap suli ammannginnera pakatsinarpoq

- Angajoqqatut, ilinniartitsisutut atuarfimmilu siulersuisuni ilaasortatut atuarfittaassap Atuarfik Inussuup suli ammannginnera pakatsissutigeqqavara. Ikuallattoqalissagaluarpat iliuusissamik pilersaarutit misissorneqareerlutik akuerineqareertinnagit naluarput qaqugu atuarfiup ammarneqarnissaa.

- Atuarfiup atorneqarsinnaalernissaata kinguaattoornera ajuusaarutigalugulu uggorivara.

Demokraatit sinnerlugit Kommuneqarfik Sermersuumi meeqqat, ilaqutariit atuarfeqarnerlu pillugit ataatsimiititaliami siulittaasoq Poul Petersen, Nunatsinni atuarfiit akisunerpaartaata kinguaattoornera pillugu oqarpoq. Sanaartorneq 615 millionit koruuninik naleqarpoq.

Atuarfitoqqani Atuarfik Samuel Kleinschmidtimi (ASK) aamma Ukaliusap atuarfiani (USK) Kalaallit Nunaani illoqarfiit pingaarnersaanniittumi Nuummi atuartut 1200-t missaanniittut suli atuartinneqarput. Atuarfissuarmi Atuarfik Inussummi atuartussanngortussaapput.

Kommuneqarfik Sermersuumut siunnersuisartut COWI-p, Atuarfik Inussuup Nuup qeqqaniittup qaqugu atulersinnaanera akuersissutigiumaarneraat suli nalunarpoq. Akuersissutigineqarpat atuartut ilinniartitsisullu sanaartukkamut akisuumut kinguaattoorfiusumullu nuuttussanngussapput.

COWI, Danmarkimi illussanik titartaasartut siunnersuisartut annersaasa ilaat, sanaartornermut suliamut ukiualuit matuma siorna aallartinneqartumut atatillugu Kommuneqarfik Sermersuumi sanaartornermut oqartussaasunut siunnersuisuuvoq.

Atuartut inini ullutsinnut naleqqukkunnaarsimasuni atuartinneqartartut

- Atuarfittaassap ammarnissaata kinguartinneqarnera ajuusaarutigaara. Tamatuma kingunerisaanik ASK-imi aamma USK-imi atuartut inini ullutsinni naleqqutinngitsuni suli atuartinneqarput. Meeqqanut, ilaqutariinnut atuarfeqarnermullu ataatsimiititaliap atuarfik nutaaq qaqugu naammassineqarumaarnersoq sivitsortumik apeqqutigisaqattaartarpaa. Ilisimasaqannginnerarput ingerlariaqqissinnaannginnerpullu akuersaarneqarsinnaanngilaq, Poul Petersen oqarpoq.

Atuarfimmik paaqqinnittarfimmillu 615 millionit koruuninik naleqartumik kommunip Islandimi sanaartugassanik suliassinneqartartoq Istak 2019-imi isumaqatigiissuteqarfigaa.

Kinguaattoorneq

Atuarfik Inussuk marsip aallaqqaataani 2024-mi naammassineqareerlunilu kommunimit akuerineqareersimasussaagaluarpoq. Tamanna pinngilaq. Istakip atuarfimmik kommunimut tunniussinissaanut piffissaliussaq kingornatigut kinguartinneqarpoq, taamaalilluni atuarfik aggustimi 2024-mi atulertussanngorlugu. Maannakkumut suli atulinngilaq.

Atuarfik aasaru naammassissasoq neriuutigineqartoq Kommuni kingorna nalunaarpoq.

Kommuneqarfik Sermersuumi sanaartornermut pisortap Søren Pedersenip pilersaarutip piviusunngornissaa ullumikkut neriorsuutigisinnaanngilaa, taamaattoqassasorli neriuutigalugu.

Sanaartugassanik suliakkerneqartartup ikuallattoqassagaluarpat isumannaallisaanermut pilersaarutaa COWI-mit qaqugu akuerineqassanersoq atuarfiup ammarnissaanut aalajangiisuussaaq. Ikuallattoqassagaluarpat isumannaallisaanermut pilersaarut meeqqanut, ilaqutariinnut atuarfeqarnermullu ataatsimiititaliamit kommunalbestyrelsimiillu naggataatigut akuerineqassalluni.

Pisortaq: - Sanaartugassanik suliakkerneqartartut oqaloqatigaavut

Ikuallattoqassagaluarmat isumannaallisaanermut pilersaarut nutartigaq Istakip kommunip sanaartornermut siunnersortaanut, Torp Developmentimut, tunniussimagaa Sermitsiap paasivaa. Sanaartortitsisartut allaffeqarfiat kommunimi sanaartornermut immikkoortortaqarfiup ataaniippoq.

- Sanaartugassanik suliakkerneqartartut oqaloqatigaavut, Søren Pedersen oqarpoq.

Istakip atuarfimmi ikuallattoqassagaluarpat isumannaallisaanermik pilersaarut 2020-mi sanaartornerup aallartinnginnerani tunniussivoq. Taanna oqartussat akueraat. Sanaartorneq naammassingajalermat oqartussat inatsisit naapertorlugit sanaartortoqarsimanersoq misissortussaagaluarpaat.

- Tassani Istak kommunilu isumaqatigiinngissuteqalerput, tassanilu uppernarsaatit eqqortut pigineraat ingerlaannaq paasineqarsinnaanngilaq, pisortaq Søren Pedersen Sermitsiamut januaarimi oqarpoq.

Annertuumik nikinganeqartoq

Kommunep ikuallattoqartillugu isumannaallisaanermut siunnersortaa nutaap Cowi-p Isatikip atuarfik sanaartugaq piareeqqasoq Kommunemut tunniunneqarnissaa itigartitsissutigaa. Taamaalilluni Istaki siunnersortimit kommunimillu sanaartukkap atulernissaanut akuersissummik tunineqanngilaq, ikuallattoqartillugu isumannaallisaanermut pilersaarusiaq 2020-mi akuerineqaraluartoq akuersissutigineqanngimmat.

Istak 2024-mi aggustimi qinnuigineqarpoq ikuallattoqartillugu periusissamik nutartikkamik saqqummiussissasoq, tamannalu pivoq. Sanaartornermulli oqartussaasut, sanarfinermut avatangiisinullu aqutsisoqarfimmit, Istakimut atuarfiup atulernissaanut akuersissummik itigartitsipput.

Istakip ikuallattoqartillugu isumannaallisaanermut pilersaarut annertuumik allaassuteqarnera pissutigalugu sanaartornermut oqartussaasut periusissiaq akuererusunngikkaat Sermitsiap ukioq manna januaarimi allagaatinik takunnikkumanermigut paasivaa.

Kommunip nassuiaataa naapertorlugu atuarfiup misissorneqarnerani illup ilaanni ikuallattoqartillugu atortorissaarutit, soorlu silaannarissarfiit, sanaartornermut oqartussat akuersiteqqaarnagit allanngortinneqarsimasut ilaatigut paasineqarpoq.

- Ikuallattoqartillugu isumannaallisaanermut pilersaarut qanoq iliorluni qanorlu sivisutigisumik iluarsiniarlugu iliuuseqartoqarsinnaanersoq tamatta paaserusoqaarput.

- Maannali tamanna pillugu oqartoqarsinnaanngilaq. Atuarfimmi siulersuisut paasitippakka, pakatseqqanerallu paasilluarsinnaallugu, aammali angajoqqaat meeqqatik atuarfimmut toqqissisimanartumut atuariartortissinnaasariaqarpaat. Atuarfik atulersinnagu ikuallattoqartillugu isumannaallisaanermut periusissiaq sanaartornermut oqartussanit akuerineqaqqaartariaqarpoq, Kommuneqarfik Sermersuumi meeqqat, ilaqutariit atuarfeqarnerlu pillugit ataatsimiititaliami siulittaasoq Poul Petersen oqarpoq.

Timersoqatigiit Kattuffianni ineriartortitsinermut pisortatut sulivoq.