Atuarfinni nerisassat napparsimalissutaasimanersut kommunip misissorpaa
Kommuneqarfik Sermersuup Nuummi atuartut nerisassanik nerereernerup kingorna napparsimalersimanersut misissuiffigaa.
Atuarfik Hans Lyngemi angajoqqaat ilaatigut qinnuigineqarput meeqqatik atuarfimmi nerereerlutik napparsimalerpata atuarfimmut saaffiginneqqullugit.
Arkivfoto: Leiff Josefsen
Atuartut arlallit sapaatip-akunnerani kingullermi tallimanngornermi napparsimalernerannut nerisassat pitsaanngitsut pissutaasinnaanersut Kommuneqarfik Sermersuup misissuiffigileruttorpaa.
Sermitsiap paasissutissaatai naapertorlugit Nuummi meeqqat atuarfii ikinnerpaamik marluk angajoqqaanut arfininngormat allagaqarput.
Angajoqqaat meeqqatik napparsimalerpata soorlu meriarlutik tamanna atuarfimmut nalunaarutigissagaat allakkatigut kajumissaarneqarput. Atuartut ataasiakkaat tallimanngormat nerereerlutik meriarsimasut allakkami aamma allassimavoq.
Kommunip tamanna ilungersunartutut isigigaa Meeqqanut Atuarfeqarnermullu Ingerlatsivimmi pisortaq Lone Nukaaraq Møller Sermitsiamut allakkatigut akissuteqarluni ilisimatitsivoq:
- Meeqqat napparsimalissutigisaminnik nerisaqarsimanerannik takussutissaqarnerat pillugu angajoqqaat saaffiginnissutaat eqqumaffigaagut. Kommunilu pissutsit paasiniarlugit misissuilluni aallartippoq.
- Pisimasoq ilungersunartutut isigaarput, piaarnerpaamillu suna pissutaanersoq paasiniarlugu. Amerlanerusunik paasissutissaateqalerutta angajoqqaat nalunaarfigineqassapput. Maannakkut allanik oqaaseqarsinnaanngilagut, kisianni pisoq pillugu nutaarsiassaateqalerutta uterfigeqqissavatsigit, Lone Nukaaraq Møller allappoq.
Atuarfimmi nerisassat pitsaavallaanngitsut pillugit Facebookimi gruppimi "Nuuk Borger Info"-mi oqallittoqarpoq.
Tassani angajoqqaat meeqqatik atuarfimmi nerisassanik nerinermi kingorna napparsimalersimasut arlallit oqaluttuarput.
