Frankrigimi naalakkersuisut tapersersuinerat

Frankrigip præsidentia Emmanuel Macron Nuummut tikissaaq juunip 15-iani.

Tikeraarnissaa nunanut allanut ilisimatusarnermullu naalakkersuisup Vivian Motzfeldtip maajip naalernerani Frankrigimi tikeraarneranut nangitsinerussaaq.Taassuma tikeraarnermini ilaatigut Frankrigimi nunanut allanut ministeri Jean-Noel Barrot aamma ilinniartitaanermut ilisimatusarnermullu ministeri Philippe Baptiste naapippai.

Qaaqqusissut 

Vivian Motzfeldtip tikeraarnermini USA-p præsidentianit tatineqarnerup nalaani, Frankrigip tapersersuisimanera pillugu qujassuteqarfigaa. Tassami Frankrigimit ilaatigut oqartoqarsimammat Donald Trumpip tatisineranut akiuussinnaanissamut atatillugu, kunngeqarfimmit Danmarkimit qinnuigineqassagunik sakkutuunik Kalaallit Nunaannut aallartitsinissamut piareersimallutik.

AAMMA ATUARUK

Frankrigip præsidentia Macron Kalaallit Nunaannut tikeraalersoq

Vivian Motzfeldtip tikeraarnini iluatsillugu Frankrigimi naalakkersuisunut Nunatsinnut tikeraarnissamut qaaqqusissut tunniuppaa.

Oqaloqatigiilluarneq qanimullu attaveqaqatigiilluarneq

Frankrigimi ministerinik ataatsimeeqateqarnerup saniatigut Vivian Motzfeldtip Frankrigimi naalakkersuisunut inatsisartunullu ilaasortat ataatsimeeqatiginerisa saniatigut aamma Qalasersuarmut Sikuiuitsumullu Kujallermut ambassadøri Oliver Poivre d’Avor aamma præsident Macronip Europamut tunngasunik siunnersortaa Alex Dutertre ataatsimeeqatigai. Frankrigimi tikeraarnermi naggataatungaani Vivian Motzfeldt oqarpoq tikeraarneq Nunatta Frankrigillu illuiatungeriilluni suleqatigiinnerulernissaannut alloriarnerusoq pitsaasoq, aamma oqaloqatigiilluarneq qanimut oqaloqatigiinnerullu ingerlateqqinnissaat qilanaaraa.

Nammaqatigiinneq

Københavnimi naalagaaffiit pissusiinik ilisimatusarfimmi professori Ole Wæver naliliivoq, Franskit Kalaallit Nunaannut tikeraarnissaanni pingaarnertut pineqartoq Frankrigip Nunatsinnik nammaqatiginninneranik ersersitsinissaq. 

– Frankrigip politikiani Europamiusut eqqarsarniarsarineq pissusissamisoorpoq. Nuna ilaasortaq Danmarkitut ittoq EU-mullu ikinngutaalluarsimasoq Kalaallit Nunaat USA-mit taamatut pineqarpat, taava Europap tapersersortariaqarpaa. Taamaattumik ilimaginerpaavara Frankrigip Europami pissutsinut atatillugu siuttuusutut imminut isiginissaa pingaarnertut pineqartoq, aamma Emmanuel Macronip soorunami USA-p aamma Europap, NATO-p aamma EU-p akornanni pisut eqqumaffigilluinnarai. Tamatumunnga atatillugu Amerikamiut Kalaallit Nunaannut Danmarkimullu tatisiniarnerat isiginiarneqartariaqarpoq. Aammami USA-p akerlilerneqarnissaanut atatillugu nunat Kalaallit Nunaannik Danmarkimillu tapersiisut siulliit ilagaat.

Trump iliuuseqarfigisinnaagaa 

Ole Wæverip oqaatigaa, Frankrigimi politikki, soorlu Danmarkimi politikimit nammineersinnaassuseqarnerusoq, Danmarkimimmi USA-p akerlilernissaa ajornakusoortinneqarnerusarmat.

- Tamatuma saniatigut inuttut pisinnaasat pineqarput, tassami Emmanuel Macron, politikerinit allanit Trumpimut iliuuseqarluarsinnaanerit ilagimmassuk, Ole Wæver oqarpoq.