Frankrigip præsidentia Macron Kalaallit Nunaannut tikeraalersoq
Nunarput qanittukkut nuimasumit tikeraarneqassaaq. Sermitsiammi paasivaa, Frankrigip præsidentia Emmanuel Macron Nuummut qaammat manna tikeraassamaartoq.
Sermitsiaq ilisimatinneqarpoq qanittukkut Frankrigimit Kalaallit Nunaannut tikeraartoqalersoq. Tusarfiimmi tutsuiginartut ilisimatitsipput Frankrigip præsidentia, Emmanuel Macron, nunatsinnut tikeraartussaasoq qanittukkut.
Assiliisoq: Edgar Su/Reuters/Ritzau Scanpix
Naalakkersuisoq Vivian Motzfeldt Parisimut maajimi tikeraarpoq, tassanilu Frankrigip naalakkersuisuinut qaaqqusivoq Kalaallit Nunaannut tikeraaqqullugit.
Vivian Motzfeldt ilaatigut Frankrigimiippoq nunap taassuma tapersersuineranut qujassuteqarluni, USA-p præsidentia Donald Trumpip ukiup aallartinnerani sakkortuumik kimigiisernera pissutigalugu. Tassunga tunngatillugu ilaatigut Frankrigimit oqaatigineqarpoq, Frankrig piareersimasoq Kalaallit Nunaannut sakkutuuliinissaminut, Kunngeqarfik Danmarki qinnuiginnissappat Donald Trumpip kimigiisernera akiorniarlugu.
Maanna oqaatigineqarpoq, Motzfeldtip qaaqqusinera franskit naalakkersuisuinit tigulluarneqarsimasoq, aammalu Frankrigip præsidentia Emmanuel Macron Kalaallit Nunaannut tikeraassasoq qaammammi matumani.
- Uppernarsarsinnaavara Frankrigip naalakkersuisuisa qaaqqusinerput tigulluarmassuk, kisianni paasissutissat sukumiinerusut pillugit, siulittaasup allaffeqarfianut innersuussissaanga, Vivian Motzfeldt Sermitsiamut oqarpoq.
Emmanuel Macronip tikeraarnissaanut tunngatillugu Sermitsiaq paasissutissanik tigussaasunik pissarsiniarsarivoq. Kisianni suli tamanna iluatsinngilaq.
Taamaattoq erseqqissaatigineqarpoq, tikeraarnissaq suli pilersaarusiorneqartoq, taamaattumik angalaneq pisortatigoortoq taamaatiinnarneqarsinnaavoq imaluunniit kingusinnerusumut nuunneqarsinnaavoq.
