Høje-Taastrup Rådhusip saavani akerliussutsimik takutitsisoqartoq

Aviaja-Luuna anaanaminut angerlassaaq

Taama allagartaq qalipaatigissaartoq Høje-Taastrupimi Rådhusip iigaanut qisummut nipputinneqarsimasoq allassimavoq.

Maria Rubin Nicolajsenip iigaq pinnersarlugulu akerliussutsimik takutitsinissaq ataasinngornermi septembarip aallaqqaataani, 18-inik ukiullip Ivana Nikoline Brønlundip panimmik Aviaja-Luunamik pinngitsaaliissummik arsaarneqarneq pillugu arnaatalu Gitte Brønlundip Høje-Taastrup Kommune ataatsimeeqatigilermassuk, pisoq pilersaarusiorpaa.

Inatsimmik unioqqutitsinerusoq 

Maria Rubin Nicolajsen siullermeerluni Ivana pillugu suliami akerliussutsimik takutitsinngilaq. Pingajussaami kommunimut borgmesterimullu nillialluni saaffiginninniarsarivoq.

– Høje-Taastrup kommunemi peroriartornikuuvunga meeraallungalu oqartussanit sumiginnagaallunga misigisaqartarlunga. Taamaammat peqatigiiffimmik ilaqutariinnut meerartalinnut atugarliortunut orpiliartitsisartumik, ulluinnarni tapersersuisumik illersuisumillu pilersitsiniarlunga aalajangerpunga. Tassungalu atatillugu Ivana juulimi illersuisuuffigaara, tassani borgmesterimut allakkanik allannerani, kommune pillugu naammagittaalliuuteqarnerani tusagassiuutinullu saaffiginninnerani ikiorpara, Maria Rubin Nicolajsen oqaluttuarpoq, kommunilu suliami isiginngitsuusaartoq taanna isumaqarpoq.

 – Kommunimi sulisut tamarmik suliaq pillugu oqaaseqassanatik ilisimatinneqarnikuupput. Akerliussutsimik takutitsinermi kingullermi borgmester Michael Zieglerip ilassiartorpaatigut, tassanilu najuuttugut akuersaarpaa, aamma inatsisinik unioqqutitsinerit Ivanalu pillugu suliami kukkunerit eqqaagakkit tusarnaarpoq. Borgmesterimi nakkutilliisussaatitaavoq. Kisiannili tamanna soorunami oqaaseqarfigerusunngilaa.

– Ajoraluartumik aaqqissuussaaneq ima iluseqarpoq innuttaasutut qanorluunniit pisinnaatitaaffeqaraluarpata tamanna soqutaanngilaq. Kommunit kukkuluttoraluarpata inatsimmilluunniit unioqqutitsigaluarpata kinguneqartinneqarnavianngilaq.

Pinerluttutut pineqartoq 

Ivanalli anaanaalluarluni takutissallugu periarfissaqarnissaa Maria Rubin Nicolajsenip neriuutigaa.

– Ivanap panini angerlartikkumaaraa neriuppunga, minnerpaamillu anaanaasup meeqqallu angerlarsimaffiannut inissinneqassasut, tassani anaanaasup isumaginnissinnaanini takutissallugu periarfissaqassaaq. Ivana ullut tamaasa immuiartarpoq. Sapaatip akunnerani ataatsimi 14 literinik immuiarpoq, panialu taakkunannga 4 literimik immuttorsimavoq. Immuliornini annaarusunngilaa, taamaalilluni anaanatut akisussaaffimmik tigusivoq. Isumaqarpunga anaanaarusulluni uppernarsereeraa. Periarfissinneqarli. Kommunimit pinerluttutut pineqarsimasoq isumaqarpunga, Maria Rubin Nicolajsen oqarpoq. 

Inatsimmik unioqqutitsineq kinguneqartinneqanngitsoq 

MAPI-mi siulittaasuusimasup Laila Berthelsenip Ivana illersuisutut aggustimi ikiorpaa. Taannattaaq rådhusip saavani akerliussutsimik takutitsinermi peqataavoq.

– Inatsisinik unioqqutitsisoqarsimasoq nalunngilarput. Innuttaasut inatsisinik unioqqutitsigutta eqqartuunneqarlutalu pineqaatissinneqassaagut. Ivana pillugu suliami inatsisinik unioqqutitsisoqarsimavoq, tamannali kinguneqartinneqanngilaq. Maanna kommunip kukkussutini nassuerutigereermagu meeqqat inuusuttullu pillugit ataatsimiititaliamut nutaamik innersuussisoqartariaqartoq isumaqarpunga. Ivana meeqqaminut ulorianartoq kommuni uppernarsaatissaqarani oqarsinnaammat aamma tupigusuutigaara. Suna tunngavigalugu taama oqarpat? Tamanna ersarinngeqaaq, Laila Bertelsen oqarpoq.

Suliaq pillugu nalunaarusiortoqassasoq 

Høje-Taastrup Kommune suliaq pillugu nalunaarusioqquneqarpoq, taannalu isumaginninnermut ineqarnermullu ministeriaqarfimmit tallimanngornermi aggustip 29-ani tiguneqarsimasussaassaaq.

Isumaginninnermut ineqarnermullu ministeri Sophie Hæstorp Andersen Sermitsiamut kingullermik ima oqarpoq:

"Inatsit Folketingimi akuersissutigisarput Høje-Taastrup Kommunemi malinneqannginnera ajorluinnarpoq. Kukkorujussuartoqarsimavoq, tamannalu tunngavigalugu kommunip inatsisit malinneqarnersut qulakkeerniarlugu suliat tamaasa misissorsimavai."

Ilaqutariit kalaallit inatsit malinneqarnersoq pillugu toqqissisimassapput. Taamaattumik nunami kommuninut tamanut malittarisassat sukateqqissavakka, sakkortuumillu erseqqissarlugu ilaqutariit kalaallinit kingoqqisut meerartaasa angerlarsimaffiup avataannut inissinneqarnissaannut suliani misissuutit tamanut atorneqartartut atoqqusaannginnerat.

Aamma suliami tamatumani VISO-mit kommuni qanoq siunnersorneqarsimanersoq nassuiaaqqullugu qinnuigissavara. Tusagassiutinit paasisakka naapertorlugit aalajangiineq maalaaruteqartarfimmut aamma suliassanngortinneqarsimasoq paasivara."