ICC imarsiorneq pillugu suleqatigiiffissuarmi ataavartumik inissisimaffeqalerpoq
Nunarsuaq tamakkerlugu imarsiorneq pillugu oqallinnernut nammineq inuiaqatigiitsik sinnerlugit sunniuteqaannaratik - nunarsuami nunat inoqqaavi sinnerlugit sunniuteqarsinnaalerput.
Billede / Foto: Herb Nakimayak (ICC Canada, ICC-imi siulersuisuunernut ilaasortaq, Aviaja Tindbæk Jørgensen, ICC Kalaallit Nunaat aamma Mary Tobin-Oates, ICC Canada.
Assi: ICC
Inuit Issittormiut Siunnersuisoqatigiiffiat Nunat Inoqqaavisa Suliniaqatigiiffiini siullersaalluni Imarsiorneq pillugu Suleqatigiiffissuarmi (IMO) tusarniaavigineqartartutut 2021-mi utaqqiisaasumik inissippoq.
Angusaq taanna nunarsuarmi imarsiornikkut aalajangersaasarnermi Inuit tusaaniarneqaqqullugit ICC-p sulilllualerneranut aallarniutaalerpoq.
ICC Imarsiorneq pillugu Suleqatigiiffissuarmi IMO-mi Ataavartumik Tusarniaavigineqartartunut ilannguppoq.
Aalajangernerup oqaluttuarisaanikkut pingaarutillup tamatuma kingunerisaanik imaatigut angallannermi piumasaqaatinik aalajangersaaviusartumi Inuit suli issiatitaqassapput taamalu imminnut, nunaminnut imartaminnullu tunngasut pillugit toqqaannartumik anguniagaqarsinnaalissallutik.
Taamanikkut ICC nunap inoqqaavisa kattuffiini siullersaalluni taamatut akuerineqarpoq.
Maanna ICC juulimi 2025-mi ataavartumik siunnersuisartutut inissisimalerpoq, tamannalu oqaluttuarisaanermi allannguutaavoq.
Tamanna isumaqarpoq Inuit Issittormiut Siunnersuisoqatigiivi Naalagaaffiit Peqatigiit imarsiornermut tunngasunik suliaqarfianni, International Maritime Organizationimi, ataavartumik siunnersortitut inissisimalersut.
Aamma ima paasisariaqarpoq inuit siunissami umiarsuarnik angallassinermut imarsiornermillu aqutsinermut tunngatillugu aalajangiisoqartillugu akuutinneqartuassasut, ICC tusagassiuutinut nalunaarummi allappoq.
IMO PILLUGU
Imarsiorneq pillugu Suleqatigiiffissuaq Naalagaaffiit Peqatigiit ataanni immikkut sullissiviuvoq nunarsuarmi imaatigut angallanneq pillugu malittarisassiortarnermut akisussaasuusoq. Nunat tamalaat akornanni imaatigut angallannermi isumannaallisaaneq, avatangiisit sunnigaanerat, aammalu angallannerup piujujuartitsiviunissaa pillugu inatsisitigut teknikkikkullu piumasaqaasiortartuuvoq.
Suleqatigiiffissuarmut ilaasortaapput naalagaaffiit 176-it, suleqatigiiffiit naalakkersuisutigoortut 67-it alaatsinaattuusut, suliniaqatigiiffiit naalakkersuisutigoortuunngitsut 88-it tusarniaavigineqartartut. Maannamut Nunat Inoqqaavisa Suliniaqatigiiffiisa arlaannaalluunniit ataavartumik inissisimaffeqarsimanngilaq.
Inissisimaffik qulakkeerneqartoq
Angusap anguneratigut inuit umiarsuarnik piginnittutut, ingerlatsisutut, sineriammiutut, aammalu nunat tamalaat akornanni imaatigut angallannermi ilisimasanik pigisaqartutut pingaaruteqarluinnarnerat uppernarsarneqartoq, ICC siulersuisui isumaqarput:
- Imarsiorneq pillugu Suleqatigiiffissuarmi Nunat Inoqqaavisa Kattuffiini siullersaalluni Ataavartumik inissisimaffeqalerneq Inunnut angusaqarfiuinnarani aamma Nunat Inoqqaavinut tamanut pingaarutilimmik alloriarfiuvoq, Herb Nakimayak, ICC-mi siulersuisuunernut ilaasortaq oqarpoq.
Imarsiorneq pillugu Suleqatigiiffissuarmi aalajangikkat nunaqqatitsinnut toqqaannartumik sunniuteqartartut, Sara Olsvig, ICC-imi siulittaasuusoq oqarpoq:
- Umiarsuit aqqutaasa isumannaatsuunissaanniit imaani uumassusileqarfiit illersorneqarnissaannut tunngasut eqqarsaatigalugit aalajangiinerit tamakku inuusaasitsinnik attassiinnarsinnaanitsinnut sunniuteqartarput.
- Imarsiorneq pillugu Suleqatigiiffissuarmi ataavartumik tusarniaavigineqartartutut inissisimalernikkut Inuit isiginnittaasii tunngavigalugit nunarsuarmi imaatigut angallanneq pillugu aalajangersaasarnerni ilisimasat tunniunneqartassapput, massakkut siunissamilu.
- Nuannaarutigaarput aalajangernikkut tassuuna nunat tamalaat isummersoqatigiinnerini immikkut anguniakkanik ilisimasanillu nunarsuaq tamakkerlugu imarsiorneq pillugu oqallinnernut pisuunnguallaataasunik Inuit tunniussassaqartarmata akuersaarneqarmat.
