ICC Kalaallit Nunaat: Quiassuaalluni ilanngutassiineq akuersaarneqarsinnaanngilaq
DR-ip kalaallinut isiginnittaasia, ilaatigut quiassuaarutigalugu aallakaatitassiami “Tæt på sandheden”-imi ilanngutassiaq arfininngormat takutinneqartumi ersersinneqartoq, akuerineqarsinnaanngitsoq, ICC Kalaallit Nunaat isumaqarpoq.
ICC Kalaallit Nunaanni siulittaasup Hjalmar Dahlip DR2-mi quiasuuaarutigalugu ilanngutassiaq aallakaatitassiami "Tæt på sandheden"-imi takutinneqartoq inunnut isiginnittaatsimut akuerineqarsinnaanngitsumik ersersitsisoq sakkortuumik isornartorsiorpaa.
Assi: Leiff Josefsen
Danmarks Radiop isornartorsiorneqaqqilerpoq. Tamatumuuna aallakaatitassiaq quiassuaataasoq DR-ip piviusulersaarummik “Grønlands hvide guld”-imik suliarinninneranik illaruaatiginninniarnerugaluartoq pineqarpoq. Ilanngutassiaq tassaniittoq mamiatsaatigineqarpoq.
- DR2-p quiasaarutiginnittuliaa sakkortuumik
ICC Kalaallit Nunaannit akuersaarneqarsinnaanngitsutut taajumavarput. Isummersuutit
assigiinngissinnaasarput, taamaakkaluartorli pingaartumik Danmarkimi
tusagassiorfiit nunatsinnik kalaallinillu ilisimasalinnik ataqqinninnginnerat
malunnarsiartuaarluni, allaat kalaallinik inunnillu sakkortuumik
ataqqinninnginnertut taasarialinnik oqaaseqartoqartalerluni, ICC Kalaallit Nunaat tusagassiutinut nalunaarummi allappoq.
Ataqqinninnerusumik pissusilersortoqartariaqalersoq ICC Kalaallit Nunaanni siulittaasoq Hjalmar Dahl isumaqarpoq.
Oqallinneq ataqqinninnerunngitsoq
- Ilami nikassaalluni
ataqqeqatigiinngitsumik akaareqatigiinngitsumillu oqallineq naligiinnginnertut
taasariaqarpoq angusaqarfiusinnaanngimmat! Torernerusummik oqallinneq
ingerlanneqartariaqalerpoq, pingaartumik ataqqeqatigiilluta
ingerlajuarsimanerput siunissami suli atasussaammat pissusilersuutivut
paareqqissaartariaqarpavut, Hjalmar Dahl oqarpoq.
Piviusulersaarut assortuussutaasoq "Grønlands hvide guld" pillugu DR-ip quiassuaaruteqarniaraluarnera ICC-mi siulittaasup Sara Olsvigip ima oqaasertalerpaa:
-DR2-mi
quiasaarutiginninniarlutik saqqummersut quianartuliorsimasinnaagaluarput DR-ip
nammineq kukkussutigisimasai saqqummersinniarsarisimagaluarunikkit, soorlu
pivisiusulersaarusiap takutinneqarnerata kingorna illuinnaasiorluinnartumik
naliliisaqattaarnertik, imaluunniit aningaasat iluanaarutit pineqaratik
kaaviaartitat pineqarnerannik DR-ip tusagassiorfiillu allat namminneq
paatsuisaqattaarnerat. Taamaalioratilli ammip qalipaataa tunngavigalugu
sakkortuumik immikkoortitsissallutik nikassaarpalaartumillu suliaqassallutik
toqqarpaat, tamannalu akuerineqarsinnaanngilluinnarpoq. Nikassaaneq pinnagu,
ataqqinnittumik oqallinneq piumavarput, Sara Olsvigip naqissuserpaa, taanna IA-mi siulittaasuunikuuvoq.
DR-ip piviusulersaarusiaa assortuussutaasoq “Grønlands hvide guld” takuneqarsinnaajunnaarlugu peerneqarnera isornartorsiorniarneqaraluarpoq, ilanngutassiamilu Danmarkip sikumik Kæmpe Eskimomik tuniniaanermini iluanaarutai quiassuaatigalugu saqqummiullugu. Tamannalu inuppassuit mamiatsaatigaat.
Ilanngutassiaq “Tæt på sandheden”-imi arfininngormat takutinneqartoq dr.tv-mi takuneqarsinnaavoq.
