DR-imi quiassuaarutigalugu ilanngutassiaq kamaatigineqartoq — ministeri akuliunneqarpoq
Quiassuaarisartoq Jonathan Spang DR-imi arfininngormat ilanngutassiaq takutinneqartoq pillugu inuit attaveqaqatigiittarfiisigut sakkortuumik isornartorsiorneqarpoq. Kalaallinut ammip qalipaataanik immikkoortitsinertut killissanillu qaangiinertut amerlasuut isigiaat. Kulturimut ministeri suliamut misigissuserpassuarnik pilersitsisumut maanna ilanngunneqarpoq.
Jonathan Spang DR-ilu "Tæt på sandheden“-imi ilanngutassiaq pillugu inuit attaveqaqatigiittarfiisigut isornartorsiorneqarujussuarput.
Assi: DR/Jacob Jorp
- Kalaallit Nunaata Danmarkillu suleqatigiinnerat eqqarsaatigalugu tusagassiorfik innuttaasunik kiffartuussisoq naalagaaffimmit tapiiffigineqartoq politikkikkut akiorniakkatsinnik nikassaassumik isummanik pigiliuteriikkanik annertusaasumik aallakaatitassiornissaa pisariaqarpa?, IA sinnerlugu folketingimut ilaasortaq Aaja Chemnitz kulturimut ministerimut Jakob Engel-Schmidtimut aperivoq.
Aallakaatitassiami "Tæt på sandheden“-imi ilanngutassiaq DR-ip saqqummersitaa nittartakkatigut attaveqaqatigiittarfinni sakkortuumik isornartorsiorneqarpoq, taanna ammip qalipaataa aallaavigalugu nikassaanertut isigineqarpoq.
DR-ip piviusulersaarusiaa assortuussutaasoq “Grønlands hvide guld” takuneqarsinnaajunnaarlugu peerneqarnera isornartorsiorniarneqaraluarpoq, ilanngutassiamilu Danmarkip sikumik Kæmpe Eskimomik tuniniaanermini iluanaarutai quiassuaatigalugu saqqummiullugu. Tamannalu inuppassuit mamiatsaatigaat.
Naalagaaffiup tapiissutai ammillu qalipaataa aallaavigalugu immikkoortitsineq
Folketingimi ilaasortaq Aaja Chemnitz kulturimut ministerimut ima allappoq:
- Tusagassiuutillu naalagaaffimmit tapiiffigineqartartut ammip qalipaataa aallaavigalugu immikkoortitsinermut iliuusissatut pilersaarutinut naapertuuttumik aallakaatitassiaminnik aaqqissuinissaat qulakkeerniarlugu ministeri qanoq iliussava?
Quiasaarineq "killissamik qaagiinngitsoq" aallakaatitassiami pisortaq Anne Garlich Berlingskemut oqarpoq.
- Ilanngutassiami DR-ip piviusulersaarusiaa (Grønlands hvide guld, aaqq.) kisimi sammineqarnera isumaqarpugut ersarissoq. Piffissami kingullermi taanna sammineqartorujussuuvoq taamaattumillu tamanna pillugu quiassuaarisoqarnera pissusissamisoorpoq, Anne Garlichs Berlingskemut oqarpoq.
Kalaallit Nunaat kalaallillu illaruaatigineqarnissaannik siunertaqartoqarsimanngitsoq aallakaatitassiami pisortaq Berlingskemut oqarpoq.
