Ineqarneq pillugu suliaq naammassineqarpoq: Unioqqutitsinerit sakkortuumik isornartorsiorneqarput
Kommuneqarfik Sermersuumi ineqarnermut tunngatillugu suliaq sivisuumik suliarineqareerluni maanna pisortatigoortumik naammassineqarpoq. Tamanna Nakkutilliisoqarfiup aggustip 22-ani 2025-mi ataatsimiinnerminni aalajangerpaat.
- Suliaq maannakkut naammassivoq, taamaalillunilu ingerlatamut sivisuumut paasiuminaatsumullu naggasiisoqarpoq, Sólja Ì Ólavsstovu, Nakkutilliisoqarfimmi siulittaasusoq oqarpoq.
Assi: Leiff Josefsen
Kommuneqarfik Sermersooq pisuni amerlasuuni inissianik aningaasaliinissamut taarsigassarsianik suliatigut isumagalugillu akuerinnittarsimavoq. Naak taamaaliortussaanani.
Taarsigassarsianut qinnuteqaatit arfineq-marluk suliarineranni atortussat kommunip akuersineranut tunngaviusut amigaateqarsimapput, imaluunniit kukkunertaqarsimallutik.
Kommuneqarfik Sermersooq aamma annertuallaamik taarsigassartitsisarsimavoq.
Naak kommuni kisimiilluni 20 %-it tikillugit aningaasaliinissamut toqqammaveqaraluni sanaartornissamut aningaasartuutini katillugit 40 %-inut taarsigassarsianut akuersisimavoq.
Kommunip inissiat siunertanut allanut aamma atortarsimavai.
Inissianik pilersuinermut naleqqiullugu siunertanut allanut inissianut aningaasaliinissamut taarsigassarsianik pissarsiaqarsimasunik inissialiornernik marlunnik Kommuneqarfik Sermersuup atugaqarsimavoq.
Tamakku tassa Nakkutilliisoqarfiup piffissami sivisuumi misissuiffigisimasaat, suliarlu isornartorsiunermik inernilerpaat.
Suliaq maanna naammassivoq.
Suliaq naammassisoq, Nakkutilliisoqarfiup siulittaasuata ilisimatitsissutigaa.
- Kommuneqarfik Sermersuumi inissianik suliaqarneq tassaasimavoq Nakkutilliisoqarfiup suliarisimasaani qaqugukkulluunniit annertunerpaarpaajusoq. Inatsisaasunik kommunip pisuni arlalinni unioqqutitsisimanera ilungersunartuullunilu isorisassaavoq. Kukkussutit taama ittut pisortaqarfiusunut tatiginninnermik sanngiillisaapput, tamannalu peqqissanngilaq.
Nakkutilliisut maluginiarpaat kommunip unioqqutitsinerit aaqqinniarlugit suleqataajumassuseqarnera, aamma sulisussaaleqineq suliap suliarinissaanut akornutaasimasoq.
- Suliarisaq paasiuminaallunilu piffissaajarnartuusimavoq, taamaalisukkulli nakkutilliisoqarfiup inissisimaffigisaata qanoq pingaaruteqartigineranik takutitsivoq, aammalu inatsisinik unioqqutitsisoqarnerani taamatut qisuariartoqartariaqarnermik takutitsilluni. Nakkutilliisarneq nukittooq inatsisilerinerup isumannaatsuutinneranik nukittorsaaqataavoq.
- Suliaq tamanna kommunimut, inuiaqatigiinnut tamarmiusunut, minnerunngitsumillu innuttaasunut assut pingaaruteqarsimavoq. Aningaasat amerlaqisut atorneqarsimapput, suliarisallu nassatarisaanik inatsisaasut allanngortinneqarsimapput.
- Suliaq maannakkut naammassivoq, taamaalillunilu ingerlatamut sivisuumut paasiuminaatsumullu naggasiisoqarpoq, Sólja Ì Ólavsstovu, Nakkutilliisoqarfimmi siulittaasusoq oqarpoq.
