Innuttaasup siunnersuutaa: Cigarettit kimmivikui kilomut 100 koruuninik akilerneqartarlik
Paneeraq Heilmann-Larsen, Nuummi innuttaasoq, Kommuneqarfik Sermersuumut innuttaasutut siunnersuuteqarpoq. Taassuma siunnersuutigaa innuttaasut cigaretsit kimmivikuinik katersaminnik akilerneqarlutik tunniussisinnaalissasut - sapinngisamik kiilumut 100 koruuninik.
Assiliisoq: Mette Skarregaard Pedersen
Cigaretsip kimmivikui kiilumut 100 koruunilersillugit katersorusuppigit?
Tamanna Paneeraq Heilmann-Larsen nuummi innuttaasunut periarfissaalersikkusuppaa.
Taassuma Sermitsiamut oqaluttuaraa ukiorpanni tupat kimmivikui aqqusengup silaani takujuarsimallugit. Kommune Qeqertalimmilu innuttaasut tupap kimmivikuinik kiilumik katersisimagaangata 100 koruuninik akissarsisinneqartartut paasigamiuk isumassarsiorfigalugu siunnersuutigaa.
Kommune Qeqertaliup ukiup aallartisimalaarnerani nalunaarutigaa, soorlu Kangaatsiami cigaretsip kimmivikuanik kiilumik katersigunik 100 koruuninik akissarsisinneqarsinnaasut.
Atsiornernik katersineq tapersersorneqarnerlu
Siunnersuutini ilalerluarneqassappat Paneeraq Heilmann-Larseni Kommuneqarfik Sermersuup nittartagaani kommuneqarfiga.sermersooq.gl-imi atsiornernik katersivoq. Piffissami matumani innuttaasut 133-it atsiorsimalerput, atsiornerillu 250-it anguniarneqartussaapput.
Paneeraq Heilmann-Larsenip oqaluttuaraa Nuummi najukkami ataatsimiititaliamit tapersersorneqarluni, taakku illoqarfiup saligaatsuunissaanik suliniuteqarput, siunnersuullu aningaasaliiffigisinnaanerarlugu.
Atortutigut aaqqiissutissat
Paneeraq Heilmann-Larsenip atortutigut eqqarsaateqareersimavoq: Taassumammi siunnersuutigaa innuttaasut katersinissaannut puussiat aaqqatillu akeqanngitsumik tunniunneqarsinnaasut, soorlu tapiiffigineqarnikkut. Puussiat kimmivikunik imallit sumiiffinnut aalajangersimasunut ulloq unnuarlu tunniunneqarsinnaassapput, sulisoqanngikkaangalluunniit.
Tunniussisup aqqi oqarasuaataatalu normua puussianut allanneqassapput, sulisullu suliartorunik puussiaq kimmivikunik imalik oqimaalutassavaa, tunniussisorlu akissarsisinnissaanut tunngatillugu attavigissallugu.
Misiliut upernaamut piareersinnaasoq
Siunnersuuteqartup siunnersuutigaa suliniut pilersaarutitut suliarineqariarluni apriilip qaammataani aallartissinnaassasoq, tassani aput aakkiartulertarmat.
Uku pingaarnertut siunnersuutigineqarput:
- Nuummi aaqqiissut misiligutitut aallartisarneqarluni.
- Cigaretsit kimmivikuinik kiilumut tunniussinermi 100 kr.-inik akiliisarneq
- Atoqqitassanik tigooraaviit atuarfiit imaluunniit tamanut ammasuni katersuisarfiit pilersinneqassapput.
- Sullitat: inuttaasut, atuarfiit inuusuttut aamma atugarliortut
- Misiligutip ilaatigut siammarneqarnissaanut qaammatit 6–12-it kingorna naliliiffigineqassaaq.
Paneeraq Heilmann-Larsen isumaqarpoq pinngortitami illoqarfimmilu sanaartorfiunngitsuni eqqakkat ikilissasut, innuttaasullu avatangiisinut tunniusimalerulissasut. Innuttaasut eqeersimaartumik peqataassapput - pingaartumik inuusuttut. Kiisalu kommuni mingutsitsisuunngitsutut avammut nittarsaanneqassalluni.
Innuttaasutut siunnersuuteqareerluni paasilersimanerarpaa snusikut puigorsimallugit. Isumaqarpoq taakku aamma ersittumik mingutsitsisuusut - ingammik pinngortitamut qimminullu, nerisinnaammatigit. Siunnersuutini allanngortissinnaanngikkaluarlugu, taamaattoq neriuutigaa snusikut aamma suliniummi ilanngunneqarumaartut.
- Neriuppunga avatangiisit pillugit iliuusissatut tigussaasutut eqqarsaatersuutigineqassasoq, Paneeraq Heilmann-Larsen oqarpoq.
