Kommune sanaartugassinneqartartorlu atuarfimmut kinguaattoorutaasumut isumaqatigiissuteqartut - 2026-mi ammassaaq
Kommuneqarfik Sermersooq sanaartugassinneqartartorlu Ístak Atuarfiup Inussuup naammassinissaanut pilersaarutit isumaqatigiissutigaat, kommunemit ilisimatitsipput.
Atuarfik Inussuk 2026-mi aggustimi atuarfigineqarsinnaalernissaa pilersaarutigineqarpoq.
Assi: Oscar Scott Carl
Nuup qeqqaniittoq Atuarfik Inussuk kinguaattoorfiungaatsiareerluni
naammassinissaanut aqqiivigineqarpoq.
Ikuallattoornissamut
sillimaniarnermut tunngatillugu suli qularnartoqarmat atuarfik suli
atorneqarsinnaalinngilaq. Ikuallattoqalissagaluarpalli qamisaatit
tissaluttartut atuarfimmi piffissami aggersumi
ikkussorneqartussaapput.
Kommuneqarfik
Sermersooq nittartakkamini ilisimatitsivoq.
Atuarfiup
naammassinissaanut pilersaarut ikuallattoqalissagaluarpallu
qamisaatinik tissaluttartunik ikkussuinissaq
sanaartugassinneqartartumut Ístak-imut isumaqatigiissutigineqartoq
kommune paasissutissiivoq. Taamaalilluni atuariartorfigineqarsinnaalissalluni:
- Suliaq tamanut ilungersunarlunilu unammillernarsimavoq. Maannali ataatsimoorluta aaqqiissuteqarnitsigut sanaartornerup siuariarnissaa qulakkeerneqarmat nuannaarutigaara, Kommuneqarfik Sermersuumi Sanaartornermut Avatangiisinullu Ingerlatsivimmi pisortaq Søren Krog Pedersen oqarpoq.
Ikuallattoqarnerani qamisaatit apeqqutaasut
Sanaartugassinneqartartumit Ístakimit isumaqatigiissuteqarsinnaaneq aamma nuannaarutigineqarpoq:
– Teknikkimut tunngatillugu assigiinngitsunik isumaqarsimavugut, paaseqatigiiffiusumilli oqaloqatigiippugut, pilersaarusiarlu sanaartornerup naammassinissaanut aallaavigisassarput isumaqatigiissutigaarput, Ísatakimi pisortaaneq Karl Andreassen oqarpoq.
Ikuallattoqalissagaluarpat periusissiaq qatserisartunit akuerineqassappat tissaluttaateqalernissaa apeqqutaasoq Sermitsiami qanittukkut allaasaarput. Tissaluttaatilersuinissarlu siunnersuisarfiup Sweco-p kommuni sinnerlugu tamanut ammasumik suliariumannittussarsiorneqarluni.
Kinguaattoorneq unammilligassanik pilersitsisoq
Atuarfik Inussuk 2024-mi aasaanerani atuanngiffeqarnerup kingorna naammassineqartussatut pilersaarutigineqaraluarpoq, kinguaattoornerullu Nuup illoqarfiata qeqqani meeqqat atuarfianni unammillernartoqangaatsiarsimavoq.
Kinguaattoorneq pissutigalugu meerarpassuit Atuarfik Samuel Kleinschmidtimi (ASK) aamma Ukaliusami (USK) atuartinneqarnerat ingerlatiinnarneqartariaqarpoq.
Atuarfiit taakku pisoqalisut silaannalupput, Ukaliusarlu oqoqarnera pissutigalugu matuneqaqqammerluni. ASK-imi aamma taamaattoqarnersoq maanna misissuiffigineqarpoq.
