Ministeriunerup suleqatini inissikkai: Kalaallit Nunaata namminiilivinnissaanut malittarisassat paatsoorneqarput
Kalaallit Nunaata siunissaa kalaallinit aalajangerneqassaaq, tamannalu qallunaat politikkeriisa arlallit paatsooraat Frederiksen oqarpoq.
Inuit Ataqatigiinneersoq Aaja Chemnitz Larsen ministeriunerlu Mette Frederiksen (S) apeqqarissaarnermi.
Assi: Ida Marie Odgaard/Ritzau Scanpix
Qallunaat politikerii nuimasut arlallit Kalaallit Nunaata qanoq namminiilivinsinnaaneranik oqallinnermut akuliukkaangamik paatsuungasarput.
Ministeriuneq Mette Frederiksen (S) taama isumaqarpoq. Marlunngormat apeqqarissaarnermini namminersorneq pillugu inatsimmi namminiilivinnissamut malittarisassat ersarissumik allassimasut innersuussutigai.
- Qaammammi kingullermi oqariartuutigineqartut ilaat eqqarsaatigalugit Folketingimi ilaasortat ilaannaasa namminersorneq pillugu inatsit atuarsimagaat malugisinnaavara.
- Namminersorneq pillugu inatsimmi erseqqissumik allassimavoq Kalaallit Nunaata siunissaa Kalaallit Nunaannit kalaallinillu aalajangerneqassasoq, Folketingip ataatsimiittarfiani oqarpoq.
Danskit folketingimut ilaasortat arlallit Kalaallit Nunaata siunissaa pillugu oqaaseqarput.
Assersuutigalugu Folketingimut ilaasortaq Rasmus Jarlov (K) USA-p Kalaallit Nunaata "pisiarerusunneqarnera" pillugu qallunaat naalakkersuisuisa iliuusaat naammanngitsoq isumaqarpoq.
Ministeriunerup kalaallit Amerikamiunit tatineqangaartikkaat, tassa Kalaallit Nunaata namminiilivinnissaa nunanullu allanut attaveqarsinnaanera Nuummi aalajangiiffigineqartussatut inissimmagu, taanna isumaqarpoq.
Namminiilivinnissaq pillugu apeqqut siornatigutut pinnani Kalaallit Nunaanni qineqqusaarnermi qitiuleqqavoq, tamannalu nunarsuarmiut tamarmik malinnaavigaat.
Assersuutigalugu namminersorneq pillugu inatsimmi paragraf 21, Kalaallit Nunaata namminersulivinnissaanut tunngasoq, atuutilersinniarlugu suliniuteqassalluni Siumut oqarpoq.
Partii Socialdemokratit suleqataat naapertorlugu piffissami qinersivimmi tulliuttumi innuttaasunik taasititsisoqassaaq.
Mette Frederiksenili Kalaallit Nunaata siunissaa pillugu oqaloqatigiinnissamut ammavoq.
- Inatsit amerlasuutigut siumut siunniussaqarpoq. Inatsisaavorli nutaamik kissaateqartoqalissappat allanngortinneqarsinnaasoq.
- Qinersinerup kingorna Naalakkersuisut assersuutigalugu susassaqarfinni angerlaanneqareernikuusuni pissutsit misissorneqassasut kissaatigippassuk, soorunami uagut naalakkersuisutut misissornissaa ammaffigissavarput, Mette Frederiksen oqarpoq.
/ritzau/
