Múte B. Egede: – Ukiorpassuarni tusartagarput uppernarsarneqarpoq
Aningaasaqarnermut Akileraartarnermullu Naalakkersuisoq Múte B. Egede (IA) isumaqarpoq Jyllands-Postenip qallunaat sanaartornermik suliaqartut USA-p Kalaallit Nunaanni sakkutooqarfiini isertitaqarnerannik qulaajaanerata ukiorpassuarni ilisimaneqareersut oqaluuserineqareersullu uppernarsarai.
Assi: Leiff Josefsen
Danmarki nunarput aqqutigalugu miliardilippassuarnik aningaasarsiorsimavoq. Tamannali Danmarkip nassuerutigerusunngilaa, naak uppernarsarneqareeraluartoq, taama isumaqarpoq Aningaasaqarnermut Akileraartarnermullu Naalakkersuisoq, Mùte B. Egede.
- Ukiorpassuarni tusartagarput aamma ilimagisarput
uppernarsarneqarpoq. Danskit naalagaaffiata sulissutigivissortarsimagaa qallunaat
suliffeqarfiutaasa qanoq aningaasarsiornissaat. Siusinnerusukkut danskit
naalagaaffiata tamakkua nassuerutigiumaneq ajornikuuai, Mùte B. Egede Sermitsiamut oqarpoq.
Jyllands-Postenip allaaserisaa naapertorlugu qallunaat sanaartornermik suliaqartut peqatigiiffiat Danish Arctic Contractors 1953-imiit 1984-imut katillugit 13 milliardit koruunit missaannik iluanaaruteqarsimasoq.
Múte B. Egedep oqaatigaa paasisat Danmarkip oqaatigisartagaanit allaanerulluinnartut.
- Taamaammallu
isumaqarpunga eqqortoq piviusorlu saqqummeraluttuinnartoq. Aammalu
pingaarnertut oqaatigerusullugu danskit nunatsinnit aningaasarsiorneq
ajornikuullutik aammalu aningaasartuuteqaannartarnikuullutik
oqatiartuutigisartagaat massakkut unittariaqavissortoq
Nunatta qanoq pingaaruteqarneranik paasissutissat uppernarsaataasut, Naalakkersuisoq isumaqarpoq.
- Isumaqarpunga
siullertut nunatta qanoq pingaaruteqartigineranik uppernarsaatitut atorneqartariaqartut.
- Isumaqarpunga
paaseqatigiinnissamut danskit isiginiartariaqaraat.
Oqaloqatigiittariaaseq naligiissoq pilersinneqassappat.
