Naggataarutaasumik oqallinnermi Kalaallit Nunaat nersualaarneqangaatsiartoq
- Sapiissuseqarnersi malinnaaffigaarput, nunarsuarlu tamakkerlugu maluginiarneqarpoq, ministeriuneq Mette Frederiksen naggataarutaasumik oqallinnermi oqarpoq.
- Kalaallit Nunaat Danmarkilu ukiuni hunnorujukkaani qanimut suleqatigisatsinnit akuerineqarsinnaanngitsumik qaammatini kingullerni tatineqarsimapput. Kunngeqarfiup ilaanik tiguaanissamik piumasaqaateqartoqarluni. Tiguaanissamik sioorasaarinermik – sakkutuutigut pissaanermik atuisinnaaneq tunuarsimaarfigineqannginnerarluni. Nunarsuarmi naalagaaffiit pissaaneqarnerpaannit. Ataqqisimasatsiinnit, Mette Frederiksen pingasunngornermi ammaanersiorluni oqalugiarnermini oqarpoq.
Assi: Thomas Traasdahl/Ritzau Scanpix
Folketingimi ukioq manna naggataarutaasumik pingasunngornermi oqallittoqaleruttorpoq, ministeriunerullu Mette Frederiksenip oqallinnissaq ammarlugu oqalugiaammini Kalaallit Nunaat nersualaarpaa.
Amerikami præsidentip Donald Trumpip Kalaallit Nunaannik tiguaaniarusulluni aqutserusullunilu arlaleriarluni oqariartuuteqaqattaarnera, Kunngeqarfimmut Kalaallit Nunaannullu tatisisoq oqalugiaammini ilaatigut saammivaa.
Mette Frederiksen kalaallit qanoq nukittutiginertik takutikkaat oqarpoq:
- Assoralisimaaraluarlusi malartitassaanngilasi. Eqqortumik silatusaartumillu iliornerit piinnarnagit aamma siunissassi allanit aalajangerneqarnissaa akuerinagu.
- Aamma naleqartitat tunngavigalugit. Killissat qaangerneqartussaannginnerat. Tamat oqartussaaqataanerat kiffaanngissuseqarnerlu, Mette Frederiksen oqarpoq, nangipporlu:
- Sapiissuseqarnersi malinnaaffigaarput, nunarsuarlu tamakkerlugu maluginiarneqarpoq.
Kalaallit Nunaata Danmarkillu ataqatigiilluarnerat tulluusimaarutigalugu Mette Frederiksenip oqalugiarnermini aamma oqaatigaa.
Danskit naalakkersuisuisa Kalaallit Nunaannut kalaallillu inuiaqatigiivinut aningaasaliinikkut suleqatigiinneq annertusarniarlugu piareersimasut aamma erseqqissarpaa.
- Inuussutissarsiornermut politikimut attaveqaqatigiinnermullu pingaarutilimmut tunngasinnaavoq, Mette Frederiksen oqaluttarfimmit oqarpoq. Oqaatigeqqippaalu Kalaallit Nunaat piumappat namminersorneq pillugu inatsit Danmarkimit nutarterneqarnsissaa piareersimaffigineqartoq.
