Nunatta Eqqartuussisuuneqarfiata anaanamik toqutseriaraluarneq pillugu eqqartuussut atuuttussanngortippaa

Arnap 27-inik ukiullip anaanami qungasiata tungaanut savimmik isaassinera toqutseriarneruvoq. Taama Nunatta Eqqartuussisuuneqarfia marlunngornermi aalajangiivoq.

Pisimasoq Tasiilami fabruaarip aallaqqaataani pivoq, tassani arnaq siullermik toqutseriarsimasutut Sermersuup Eqqartuussiviani juuni sisamaani pineqaatissinneqarluni eqqartuunneqarpoq.

Arnap eqqartuussivimmi nassuerutigalugu nassuiaanera Semitsiap allaaseraa. Anaanamilli toqutserianerunngitsoq qunusaarinerusorli arnaq taamani nassuiaavoq.

AAMMA ATUARUK

Arnaq arnaminik toqutseriaraluarsimasutut pineqaatissinneqartoq

Nunattali Eqqartuussisuuneqarfiata sumiiffimmi eqqartuussiviuk aalajangigaa attatiinnarpaa: Arnaq 27-inik ukiulik toqutseriarsimasutut pisuutinneqarluni eqqartuunneqarpoq, ukiunilu sisamani pineqaatissinneqarsimasunut inissiisarfimmiittussanngortinneqarluni. 

Kalaallit Nunaanni toqutseriaraluarnermut ukiuni sisamani pineqaatissinneqarsimasunut inissiisarfimmiittussanngortitsineq nalinginnaavoq.

Suliaq eqqartuussivimmi piaartumik suliassatut tiguneqarpoq, suliarlu piaartumik naammassineqarluni.  

Pinerlunnerup kingorna ukiup affaa qaangiutinngitsoq eqqartuussivimmit suliaq inaarutaasumik naammassineqarpoq.