Arnaq 26-nik ukiulik ukiuni sisamani pineqaatissinneqarsimasunut inissiisarfimmiittussanngortinneqarpoq, tamanna Sermersuup Eqqartuussiviani pingasunngornermi ualikkut aalajangerneqarpoq.
Arnap anaanami angerlarsimaffiani savimmik iggavimmi atorneqartartumik 22,5 centimeterisut takitigisumik savilerluni saassussimammagu qungasiatigullu tukimut kilersimagamiuk toqutseriarsimasoq Eqqartuussiviup uppernarsarpaa. Tamanna Tasiilami ukioq manna februaarip aallaqqaataani pivoq.
Arnaq 26-nik ukiulik ukiuni sisamani pineqaatissinneqarsimasunut inissiisarfimmiittussanngortinneqarpoq, tamanna Sermersuup Eqqartuussiviani pingasunngornermi ualikkut aalajangerneqarpoq.
Arnap anaanami angerlarsimaffiani savimmik iggavimmi atorneqartartumik 22,5 centimeterisut takitigisumik savilerluni saassussimammagu qungasiatigullu tukimut kilersimagamiuk toqutseriarsimasoq Eqqartuussiviup uppernarsarpaa. Tamanna Tasiilami ukioq manna februaarip aallaqqaataani pivoq.
Unnerluutigineqartup arnaa pingasunngornermi ualikkut nassuiaateqarpoq. Ullormi tassani aalakoornartulinnik imersimasut, taamaattoqaraangallu panini peqqarniillisinnaasartoq oqaluttuaraa. 26-nik ukiulik kommunimi ajornartorsiut aaqqiviginiarlugu anaanami najugaqarfianiit nuuttariaqalermat tujorminartoqarpoq.
Pisut sukkasuumik ingerlapput, paniatalu anaanani igaffimmi issialluni pujortartoq savik qungasianut tutsippaa. Arnaata nassuiaataa paniata nassuiaataanut arlalitsigut naapertuuppoq.
Anaanaasulli pasisap 26-nik ukiullip ataasinngornermi nassuaateqarnermini oqarsimaneratut „toqussinnaavarma“ oqaaserisimannginnerarpaa.
- Taama oqanngilanga. Oqaaseqanngilanga, 26-nik ukiullip arnaa oqarpoq.
Pinngitsuutinneqarnissani noqqaassutigigaa
Anaanaasoq nassuiaavoq pisumi tamatumani niaqquni tunumut malartissimallugu, tamannalu annaassutigisimagunarlugu. Nassuiaataa ajoqusersimaneranut takussutissanut siusinnerusukkut eqqartuussivimmut saqqummiunneqarsimasunut naapertuuppoq.
Anaanaasup qungatsimigut ikini assaminik asserlugu silamut qimaasimavoq, — takunnittullu allat ilaat naapertorlugu - “Panima toqunniarpaanga”-mik suaarsimavoq.
Anaanaasup angutaataa pingasunngornermi aamma nassuiaateqarpoq. Taassuma arnap unnerluutigineqartup anaanani ima suaarsimagaa uppernarsarpaa: „Natermut nallarit, taava toqussavakkit“ imaluunniit assingusumik. Angulli taanna piffissami tassani inimiissimagami iggavimmi pisut annerusumik oqaluttuarisinnaasimanngilai.
Panigiit eqqartuussivimmi imminnut qiviarnaveersaarput, anaanaasorlu nassuiaareerami eqqartuussivimmit anivoq.
Eqqartuussiviup 26-nik ukiulik toqutseriarsimasutut pinngitsuutittariaqaraa, sakkortuumillu nakuusersimasutut pineqaatissittariaqaraa eqqartuussissuserisoq Marie Louise Frederiksen oqarpoq. Taama pisoqarpat sivikinnerusumik pineqaatissiisoqarsinnaavoq. Illersuisut unnerluutigineqartup ataasinngornermi nassuiaataa tunngavigaat.
Arnap 26-nik ukiullip anaanani saviup ikkiitsortaanik qunusaarniarsimagaluarlugu ataasinngornikkut oqaluttuaraa. Saviup kiinaanik eqqornera kukkuneruvoq, taanna oqarpoq.
Toqutseriaraluarneq pillugu eqqartuussut pissusissamisoortoq
Eqqartuussisorli Ole Stryhn eqqartuussisooqataasullu toqutseriarsimasutut eqqartuunneqarnissaanik isumaqatigiipput. Arnap 26-nik ukiullip toqutsiniarluni savimmik alla qungasiatigut saassukkaanni toqunnissaa ilimanaateqartorujussuusoq ilisimasariaqaraluarpa. Taamaakkaluartoq savimmik saassussivoq.
Ukiuni sisamani pineqaatissinneqarsimasunut inissiisarfimmiittussanngortitsineq naleqquttuusoq eqqartuussisooqataasut aamma unnerluussisussaatitaasoq Aprilia Jespersen isumaqatigaat.
26-nik ukiulik toqutseriaraluarnerup saniatigut pinerluttuliornerit allat marluk pillugit pisuusutut eqqartuunneqarpoq. Aappaani ullormi tassani anaanami angutaataa kiinaatigut kilerlugu tiitorfimmik immiartorfimmilluunniit milorsimagamiuk nakuusersimasutut unnerluutigineqarpoq.
Aammattaaq 2024-mi pisumi attuumassuteqanngitsumi nikanarsaasimasutut kannguttaatsuliorsimasutullu unnerluutigineqarpoq, tassani 26-nik ukiullip ilisarisimasami atisaqarani assinga Facebookimut ilisimavaa.
Arnap ataasinngornermi nassuiateqarnermini pisimasut nassuerutigisimammagit pisuutinneqarnissaa ilimagineqareersimavoq.
Apeqqulli qitiusoq tassaavoq illersuisup suliaq suliareqqitassanngortissimagaa. Taamaammat savimmik saassussineq toqutseriarnerunersoq toqutseriarnerunnginnersorluunniit Nunatta Eqqartuussisuuneqarfiata aalajangiisussanngorpaa.
