Nuunneqarneranniit ukioq ataaseq qaangiuttoq: Paamiut eqqaanni umimmaat peqqissut

Umimmaat 19-it Ivittuuniit Paamiut eqqaannut 2024-mi aasakkut nuussat siammarsimallutillu peqqissuupput.

Kommuneqarfik Sermersuup misissuisitsinerani tamanna paasinarsivoq.

Umimmaat ilaat siorna nuunneqarfimminniit kilometerit 50-it missaannik ungasitsigusimiilersimapput. Tassa Iluilaarsummiit Kangerluarsuup tungaanut siammarsimapput.

Suli piaqqiorsimanngitsut

- Misissuinermi paasinarsivoq, suli piaqqiorsimanngitsut, kisianni marluk ilumittut takuneqarput ungasinngitsukkullu piaqqinissaat ilimanarpoq. Takornartaanngilaq umimmaat eqimattat piaqqiulernissartik sioqqullugu piffissami sivisuumi sumiiffimminni sungiussiniaqqaartarmata, piniarnermut nakkutilliisoq Per Nukaaraq Hansen oqarpoq nangillunilu:

- Umimmaat siaruarsimaqaat, kisianni maannakkut takusinnaavarput eqimattanngoqqissimasut. Kusanaqaat, peqqipput ajunngeqalutillu – suli umimmaat 19-iupput, nuutinneqaramilli taamak amerlatigalutik.

Innuttaasunit aamma malinnaaffigineqartut

Umimmaat ingerlaarnerannik qanoq innerannillu Paamiormiut kommunimut nalunaaruteqartartut, suliniummi aqutsisoq Susanne Bisgaard Rasmussen oqaluttuarpoq. Taamaaliortarnerallu taassuma nuannaarutigaa:

- Qiimmaallannarpoq uppernarsillugulu Paamiormiut eqqaminni nutaanik uumasoqalernera qanoq iluatigitigigaat paasillugu. Amerlasuut uumasoqatigiinnik malinnaalluarput uatsinnullu nalunaaruteqartarlutik. Suliniutip iluatsilluarnissaanut tamanna pingaaruteqarluinnarpoq. Ataatsimoorluta umimmaat paarilluassavagut amerliartornissaannullu pitsaanerpaanik atugassaqartitaanissaat pilersissallugu, Kommuneqarfik Sermersuumi suliniummi aqutsisoq Susanne Bisgaard Rasmussen oqarpoq.

Suliniummi tamaani uumasut assigiinngisitaartuunissaannik pitsanngorsaasoqarnissaa kisimi anguniarneqanngilaq, kisianni aamma sumiiffimmi piniarneq siunissamilu imminut pilersornissamut periarfissanik nutaanik pilersitsiniartoqarpoq.

Umimmaat tamaani qanoq innerat ukiuni aggersuni nangittumik misissorneqartassaaq.