Qallunaat tv-qarfiata Kalaallit Nunaat samminerujumagaa
TV-qarfiup namminersortup Dk4-p Kalaallit Nunaat sammitillugu aallakaatitassiani annertusarniarlugit pilersaaruteqarpoq, tusagassiuutinut pisortaq Steen W. Pedersen Sermitsiamut oqarpoq.
KNR-ip nutaarsiassanik aallakaatitsinera februaarip 24-aniit Dk4-kkut aallakaatinneqartalerpoq, ataasinngornermiillu tallimanngornermut unnukkut aqqanernut aallakaatinneqartassallunilu aqaguani nalunaaqutaq 9.30 aallakaateqqinneqartassaaq.
Assi: Leiff Josefsen
Qanittukkut Dk4-p KNR-imik suleqateqarnertik saqqummiuppaat, tassani qallunaat tv-qarfiata ullut tamaasa “Nyheder fra Grønland” (kalaallit Nunaannit nutaarsiassat) kalaallit innuttaasunik kiffartuussiviannit suliarineqartoq aallakaatittassavaa.
Dk4-p KNR-imut saaffiginninnerata kingorna suliniut nutaaq tamanna piviusunngorpoq. Tv-kkut isiginnaagassiorneq akisugaluartoq KNR qallunaat kanaliannut isiginnaasassiornerminut akilerneqartassanngilaq.
- Namminersortutut Tv-qarfiugatta Danmarkimi tv-qarfiit naalagaaffimmut atasut aallakaatinneq ajugaannik aallakaatitassiisarnissatsinnik anguniagaqartutut kalaallit tv-qarfiata KNR-ip ullut tamaasa aallakaatittagai sunik imaqarnersut qallunaat paasitinniarlugit tulluartuusoq isumaqarpugut. Soorunami Kalaallit Nunaat Issittorlu Danmarkimi tusagassiuutitigut maannakkut sammineqartupilussuupput, kisianni qallunaat isiginnittaasiannit isigineqarput, Steen W. Pedersen mailikkut ilisimatitsivoq.
Suliniutit aalajangersimasut
Kalaallit Nunaat pillugu sammisaqarneruneq pillugu Aarhusimi Kalaallit Illuutaat pillugu aallakaatitassiaq immiunneqalereersoq ilisimatitsissutigineqarpoq.
- Aamma qanittukkut Aaja Chemnitz (IA sinnerlugu Folketingimut ilaasortaq, aaqq.) sivisuumik itisiliillunilu oqaloqatiginiarlugu tusarnaartitsisarfimmut qaaqqussallugu naatsorsuutigaarput, Steen W. Pedersen oqarpoq.
Kalaallit Nunaanni nutaarsiassat februaarip 24-aniit Dk4-kkut aallakaatinneqartaleramik ataasinngornermiit tallimanngornermut unnukkut 23.00-miit aqaguanilu nal. 9.30-mi aallakaatinneqartassapput. Aallakaatitsiviup “Ugens nyheder fra Grønland” (Kalaallit Nunaanni sapaatip akunnerata ingerlanerani nutaarsiassat) nutaarsiassat pingaarnerit Kalaallit Nunaanneersut pillugit katitikkamik aallakaatinneqartartoq sapaammi unnukkut aallakaatinneqartassaat.
Qallunaat 1,2 millionit missaanniittut isiginnaartartuusut Dk4-p nittartakkamini paasissutissiissutigaa.
