Sisimiuni imangertaq uumasut nakorsaannut tunniunneqartariaqarsimagaluarpoq
Imangertaq Sisimiuni Sanaluttarfimmi sapaatip akunnerata siuliani nassaarineqarpoq. Tassani eqqumiitsuliortut siumorpaat pisaralugulu. Kumaqartorli paasigamikku eqqaavimmut igippaat. Eqqaavimmulli iginnagu uumasut nakorsaanut nassiunneqartussaasimagaluarpoq.
Privatfoto
Imangertaq Sisimiunut takornariaq eqqaavimmut iginneqarani Kalaallit Nunaanni Uumasunut Nakorsaqarfik Inuussutissalerinermullu Oqartussaaffimmut nassiunneqartussaagaluarpoq.
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik naapertorlugu imangertaq oqartussanut nassiunneqaruni, suussusaa, suminngaanneernera peqqissusaatalu qanoq innera misissorneqartussaavoq.
- VFMG-p eqqumaffigeqquaa uumasut nalinginnaasumik nunatsinneersuunngitsut takuneqartut tigusarineqartulluunniit VFMG-mut imaluunniit Pinngortitaleriffimmut nalunaartutigineqartartussaapput, killeqarfiinni uumasut nakorsaat, Stella Ege Kristensen Sermitsiamut oqarpoq.
Taassuma naqissuserlugu oqaatigaa, imangertaannaanngitsoq, aammali uumasuaqqat, timmissat uumasulluunniit miluumasut nunatsinni nalinginnaasumik uumasuungitsut pineqartut.
Imangertaq eqqaavissuami ikuallanneqariissagunartoq
Imangertaq eqqaavimmut iginneqareermat eqqaavissuami ikuallaavimmut apuutereersimassaaq. Tamanna isumaqarpoq uumasup misissorneqarnissaralua pinngitsoortinneqartoq.
- Imangertaq tigorusussinnaagaluaqaarput, tassani suussusaa, suminngaanneernera napparsimanersorluunniit misissorusullugu, killeqarfinni uumasut nakorsaat oqarpoq.
Uumasut inuillu peqqissusaat ukkatarineqartoq
VFMG ilanngullugu oqaatigaa uumasut innuttaasullu peqqissusaasa mianerineqarnissaat pingaaruteqartoq.
- Uumasut nunatsinneersuunngitsut eqqarsaatigalugit inuit uumasullu peqqissusaat mianerinissaat pingaaruteqarpoq, kisianni aamma innuttaasut peqqissusaat illersorniarlugit tuniluuttoqannginnissaanut illersuisoqartussaalluni.
VFMG-ip ilanngullugu paasissutissiissutigaa Sanaluttarfimmi atuisut oqaloqatigineqarsimasut, tassani imangertamut paasissutissat qanorlu pineqarsimaneranut paasissutissat pissarsiariniarlugit.
