Imangertaq Sisimiunut takornariartoq
Sisimiuni Sanaluttarfik sapaatip akunnerata naanerani ilimaginngisamik pulaarneqarpoq. Arfininngornerup ualigaa sanaluttarfik takornarianit sanalukkanit pisinianit pulaarneqarpoq. Takornariallu ingerlareersut, "takornariaq" ataaseq kiserngoruppoq.
Assi nammineq pigisaq
Sanaluttarfimmi Sisimiuniittumi kaffisunnialaarpoq. Takornariat takornariartaammit umiarsuamit tikerartut ingerlaqqammerput. Sanaluttarfik ulapaarfioreersoq nipaallivoq.
Eqqumiitsuliortut kaffisuleruttorlutik natermi aalasoqartoq malugilerpaat.
- Takornariat aniasimatsiartut kaffisuutilerluta tungitsinnut ingerlasoq ilatta takuleramiuk "Una sunaana?"
- Isumaqarluta aasiangaatsiarsuaq tungitsinnukartoq. Ilisarnarsiartuaalerami imangertaanera, Pavia Olsen Sanaluttarfimmi eqqumiitsuliortoq oqaluttuarpoq.
Sanaluttarfik Sisimiut
Foto: Tôrtia Reimer-Johansen
Imangertaq plastikkumut, tomatit puukuannut qattaaqqamut ilineqarpoq. Tassani paasiniarpaat sutortarnersoq.
- Paatsiveerukkatsigu, sutortarpami? Takornariat apersorlugit paasivarput sullinernik nerinerusartoq. Nillikujukkamilu niviugaarutereerluta, Pavia Olsen Sermitsiamut oqaluttuarpoq.
Imangertaq Sanaluttarfimmi unnuivoq. Imangertalli amiani kumaqartoq paasileramikku, tunillanneqarnissaminnut ersileramik eqqaavimmut igippaat.
Imangertat nunatsinni nalinginnaasumik uumasuunngillat. Pavia Olsenilu isumaqarpoq imangertaq takornariap nammattagaaniit katassimanissaa.
- Ilimagaara takornariat nammattagaanniit nakkarsimassasoq.
