Ulloq killitsimanarlunilu pingaarutilik

Ministeriuneq Mette Frederiksen (S) Naalakkersuisullu siulittaasuat Jens-Frederik Nielsen (D) assamminnillutik pakkutaaralutillu siornatigut eqqunngitsuliortoqarsimanera pillugu utoqqatsermata arnarpassuit sanileriiaattut Katuami septembarip 24-ani malunnartitsinermi peqataapput.

Tamanna sioqqullugu Naja Lyberth, Erla Winther aamma Emma Kuko oqaluttuareersimapput.

Ingammik Emma Kukop 16-inik ukioqarluni naartuersereernermi kingorna spiralimik ikkussiffigineqarsimanera inuppassuarnit killinneqaatigineqarpoq. Ukiuni qulingiluani ilisimanagu spiraleqarsimavoq. Immaqa tamanna ullumikkut meerartaarsinnaannginneranik kinguneqarpoq. Inuppassuit aliasunnera anniarneralu paasisinnaavaat. 

Akuerineqarneq 

Erla Wintherip pisimasut aamma oqaluttuarai. 13-inik ukioqarluni spiralilerneqarsimanini. Ukiullu timiminik ilinniarfigisai spiralilerneqarnerup kingunerisaanik anniarnermik suliaritittarnernillu sunnerneqarsimapput. 

– Tamanna akuliunnerullunilu innarliineruvoq, oqarpoq, Mette Frederiksenilu Kalaallit Nunaannukarluni utoqqatseriartorneranut qutsavigaa. – Utoqqatserneq taanna akueraara, taanna oqarpoq.

Erlan Vintherip malunnartitsineq killitsinnartutut pingaarutilittullu misigalugu aaqqissuussap kingorna oqarpoq. 

– Ulloq pingaaruteqarlunilu killitsinnartoq isumaqarpunga. Utoqqatserneq pingaaruteqangaarpoq. Taava qanoq misigisaqarsimanersugut paasivaat. Marlunnik paneqarama iluatsitsivunga, tamannali sioqqullugu pissutsit ilungersunarput. Illissakkut kiliortorneqartarlungalu, suliaritinnikuullungalu nakorsaaterpassuarnik pisarnikuuvunga, sunalu ajoqutaanersoq ilisimaneqanngilaq. Piffissap ilaani spiraleqaatigalunga iisartakkanik naartunaveersaatitorpunga. Tamakku kamaatigisaqaakka.

Taarsiisoqarnissaa pillugu kinguneqartitsineq 

Inuit Ataqatigiit sinnerlugit Folketingimut ilaasortaq Aaja Chemnitz utoqqatsernermi aamma peqataavoq, taassumalu utoqqatsertoqarnera nuannaarutigaa, kisiannili aamma taarsiisoqarnissaa pillugu pingaarutilimmik kinguneqartitsisoqassaaq. 

– Ulloq nuannersuusoq isumaqarpunga, aamma misigissutsinik tamatta ersarissumik misigisatsinnik inissaqartitsineq nuannerpoq. Qiaqatigeeqatigiinnerput eqqarsaatigalugu, aamma tapersersoqatigiiffiusinnaasumik ingerlatsisoqarnera iluaallannartutut misinnarpoq. Aqagumiit taava akiuuteqqissaagut. Naalagaaffimmut ataatsimoorluta eqqartuussivikkut suliassanngortitsinerput pineqartoq aalajangiusimasariaqarparput. Taarsiissutillu piaarnerpaamik tunniunneqarpata pitsaanerussaaq, Aaja Chemnitz oqarpoq, taannalu arnanut eqqugaasunut Danmarkimi malunnartitsinermi oktobarip arfineq-pingajuani Folketingimi pisussami aaqqissuussisuuvoq. 

Oqaatsit iliuutsinik malitseqartariaqartut 

Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoq Naaja H. Nathanielsen Naalakkersuisutut Inatsisartunilu ilaasortat allat assigalugit utoqqatsernermi najuuppoq. Tassunga ulloq oqimaatsutut misinnarpoq, tassami arnarpassuit innarlerneqarsimapput.

– Innarliisoqarsimasoq, kalaallillu kalaaliuneri pissutigalugit innarlerneqarsimasut qularutissaanngilaq. Taamaammat piaartumik taarsiiffiginninnissaq pinngitsoorani pisariaqarpoq. Oqaatsit iliuutsinik malitseqartariaqarput, soorlu oqalugiartunit arlalinnit oqaatigineqartoq. Maanna qaangiiniaqqaassaagut, aatsaallu siumukarutta taamaaliorsinnaavugut. Taarsiissutissanut pilersaarut ukiuni tallimani utaqqisinnaanngilarput. Ukioq ataasiinnarluunniit utaqqisinnaanngilarput. Maannakkut malitseqartariaqarpoq, Naaja H. Nathanielsen oqarpoq.