Ukaleq Sondrelu VM-imi kalaallini siullersaallutik stafetertut
Kalaallit Nunaat stafetimi VM-ertoqarnerani singlemix-imi siullermeerluni peqataatitaqarpoq.
Ukaleq aamma Sondre Slettemark kalaallinit Schweizimi tapersersorneqarluarput.
Foto: Grønlands Biathlon Forbund
Qatanngutigiit Ukaleq aamma Sondre Slettemark Schweizimi Lenzerheidemi VM-ertoqarnerani single mix-stafetimi Kalaallit Nunaat sinnerlugu peqataapput. Single mix-imi unamminermi ujakkaartartut tamarmik marloriarlutik ujakkaassapput.
– Siorna World Cupimi Østersundimi ingerlanneqartumi ataasiarluta akuleriilluni stafetimik unammisoqarmat ilaanikuuvugut, tassanili siuttuusunit kaajallannermik ataatsimik qaangertikkatta unamminermiit peertariaqarnikuuvugut. Taamaammat massakkut qaangerneqarata apuuffissatsinnut apuunnissarput anguniagaavoq, Sondre Slettemark Kalaallit Nunaanni Biathlonertartut Kattuffiat naapertorlugu oqarpoq.
Stafetimi Frankrig ajugaavoq, tulleralugit Norge Tysklandilu. Ukaleq aamma Sondre Slettemark 13,5 kilometerit arpareerlugit 40-nillu ooqattaasareerlutik ajugaasuniit 3,37 minutsinik kinguaqqapput.
Iligiit nuannaarnersaat
Taakkua marluk normu 23-nngorput, qiimaannarlutillu:
– Ujaminnanngitsuni nuannaarnerpaagunarpugut. Tassa 10.000-inik isiginnaartoqarluni qatanngutip stafetimik arpaqatiginera immikkut illuinnartuuvoq. Kalaallit Nunaannut sinniisuusutut misiginartarpoq, ingammik ulluni makkunani, Ukaleq Slettemark oqarpoq.
- Tamatumalu saniatigut sisoraatinik oqilaniuttartut arfineq-marluk Kalaallit Nunaanneersut qiimmassarniarluta tikipput. Apuuttarfik 10.000-inik inoqaraluartoq tusaajuminarlutillu takujuminarput. Nuanneq, ilanngullugu oqarpoq.
Sondre Slettemark maanna Sverigemi inuusuttut nunarsuarmi pissartanngorniunnissaannut peqataajartorpoq, tamannalu ukioq manna pingaarnertut anguniagaraa, Kalaallit Nunaanni Biathlonertartut Kattuffiat ilisimatitsivoq. Ukaleq Slettemark Estlandimi IBU Cupimi marsip arfernani aallartittussami peqataannginnermini Norgemut sungiusariarluni aallarpoq.
Aamma nunani allani tusagassiortut oqaloqatiginissaannut piffissaqarsimapput. Sverigemi Dagens Nyheterimi allaaserisaq uani takuuk, tassani qatanngutigiit piffissami immikkut ittumi nunartik sinnerlugu unamminertik oqaluttuaraat.
