GM OLDBOYS 2025
Angutit utoqqasaat isikkamik arsaallutik pissartanngorniunneranni ajugaaniutivinneq ullumi ingerlanneqassaaq
Ukioq manna Oldboys GM-imut aaqqissuussisut, GSS, angallannermik pissuteqartumik pilersaarummik allanngortitsipput. B-67 aamma N-85 NUA akornanni ajugaaniutivinneq ullumi tallimanngornermi ingerlanneqassaaq.
Angutit utoqqasaat isikkamik arsaattartut 2025-mi pissartanngorniunneranni sila ajunngilaq. Isiginnaartarfimmi issiaffigineqarsinnaasunik ulikkaarpoq, ullumikkut unamminernut isiginnaarusukkuit, ullumikkummi ukioq manna silami arsarnermi pissartanngorniunnermi ullumikkut ulloq kingulliuvoq.
Asseq: GM-mik aaqqissuisut GSS
Pilersaarutaaqqaartut malillugit finalit ingerlanneqartussaagaluarput aqagu arfininngornermi, kisianni taamaassanngilaq.
Sermitsiamit paasisavut naapertorlugit aaqqissuisut GSS, pilersaarutit allanngortissimagaat angallannermi pissutsit eqqarsaatigalugit, tassa holdit peqataasut ullumi tallimanngornermi unamminerit naammassippata aggerfimminnut angerlamut aallarsinnaaniassammata.
Taamaattumik ullumi tallimanngorneq ullut unammiffiusut kingullersaraat, tassani 7.-inngorniunneq, 5.-inngorniunneq, bronzinnanniunneq aammalu minnerunngitsumik finali ingerlanneqassapput.
Allaaserisap suliarineqarnerani GSS (Nuuk) aamma S-68 (Sisimiut) 7. -nngorniullutik unammipput, nal. 16:00 5.-inngorniutissapput N-48 (Ilulissat) aamma NÛK 1 (Nuuk).
Bronzinnanniunneq aallartissaaq nal. 17:30, NÛK 2 (Nuuk) aamma SAK (Sisimiut) akornanni.
Finali aallartissaaq unnugu nal. 19:30, tassani unammissapput B-67 (Nuuk) aamma N-85 NUA (Narsaq).
Aaqqissuisut GSS Youtube-kkut toqqaannartumik aallakaatitsipput taamaattumik kikkut tamarmik unamminernut malinnaarusuttut kanalimut isersinnaapput.
Nuummi sila aporfiunngilaq, Nuummilu innuttaasut silami arsamik isiginnaarusuttut, tassa angutit utoqqasaannik isikkamik arsaattunik nunatsinni pissartanngorniunnermi unamminerit kingulliit isiginnaariaannaavaat.
