SERMERSUUMI UTOQQAAT:
Timersornerup kiserliorneq annikillisissinnaavaa
Kommuneqarfik Sermersuumi Suliffeqarnermut Isumaginninnermullu Ingerlatsivimmi misissuinerup takutippaa, utoqqaat timersukulasut kiserliunnginnerusartut. Misissuineq innuttaasuni 67-ileereersimasuni 433-usut akornanni ingerlanneqarpoq takutinneqarporlu timersortarnerup aammalu eqqarsartaatsikkut nalerisimanerup akornanni ersarissumik attuumassuteqartoq.
Foto: Mathias Bojesen/Ritzau Scanpix
Utoqqaat timersortartut qaqutigut kiserliortutut misigisarput ilutigalugulu eqqarsartaatsikkut peqqinnerusut nalunaarusiortoqarpoq. Tamanna aamma utoqqarnut pinngortitamiittartunut atuuttoq, Kommuneqarfik Sermersooq tusagassiuutitigut nalunaarummi allappoq.
Ilanngullugu allaaseraat innuttaasut amerlanerit timimikkut peqqissuusut qaqutigullu kiserliortartut nalunaarusiorneqartut.
- Utoqqaat piginnaasakillisimasut kiserliukulanerusarput aamma qaqutigut pinngortitamukartarput. Utoqqaat peqqissusaat patajaallisarniarlugu kommunip DigiRehab atuutsilersileruttorpaa, sungiusarnissamut pilersaarut digitaliusoq kalaallisut oqaasertalik, utoqqaat angerlarsimaffimmi sungiusartarnissaannut aalanerunissaannullu ikorfartuisussaq, Kommuneqarfik Sermersooq allappoq.
Kommune aamma innuttaasunut 67-inik ukioqalereersimasunut sammisassaqartitsinernik arlalinnik akeqanngitsunik neqerooruteqarpoq. Naluttarfik Malik ataasinngornermit tallimanngornermut utoqqalinersialinnut ulluunerani iserneq akeqanngilaq. Paamiuni haali kiisalu fitness aamma timigissartarfik utoqqarnit akeqanngitsumik atorneqarsinnaavoq aamma Tasiilami sunngiffimmi sammisassat tamarmik akeqanngillat.
