Aatsitassarsioqatigiiffik Tanbreezimi piginneqataasoq taarsigassarsitinneqarnissamik nalunaarfigineqartoq

Australiamiut Amerikamiullu ingerlatseqatigiiffiat Critical Metals Corp., Australiami ingerlatseqatigiiffimmi Tanbreezimi ikinnerussuteqarluni piginneqataasoq Killavaat Alannguani piiaanissamik akuersissuteqartoq Tanbreezimi suliniutip piorsarnissaanut USA-mit EXIM Bankimit 120 million dollarsinik taarsigassarsitinneqarsinnaanerminik nalunaarfigineqarsimalluni nalunaaqqammerpoq.

Ingerlatseqatigiiffiup Tanbreezip pisiarinissaanut sulissuteqartoqartoq, taamaalillunilu aamma sumiiffimmi akuersissummik, tamannali Naalakkersuisunit akuerineqartariaqartoq Critical Metals Corp. siusinnerusukkut nalunaarsimavoq.

Ingerlatseqatigiiffimmut angusaq annertooq

Critical Metals Corp. naapertorlugu sumiiffimmi saffiugassanik qaqutigoortunik niuernikkut tunisassiulernissami 290 million dollarsit atorfissaqartinneqartut naatsorsuutigineqarpoq. Maanna EXIM Bankimit taarsigassarsitinneqarsinnaanermik nalunaarfigineqarneq ingerlatseqatigiiffimmut angusaq annertuujusoq Critical Metals Corp.-imili pisortaq siulersuisunilu siulittaasoq oqarpoq.

– Tamanna saffiugassanik qaqutigoortunik pilersuinermik pilersitsisinnaavoq, Tanbreezilu saffiugassanik qaqutigoortunik mianernartunik pilersuisinnaanermi nunarsuarmi pitsaasumik ingerlatsisoq naalakkersuinermilu siuttunut aningaasaliisartunullu takutippaa, taamaalilluni niuerfimmi Kinap siiuttuunera akerlilerlugu, tusagassiutitigut nalunaarpoq.

Nalunaarfigineqarneq – taarsigassarsinerungitsoq

Critical Metals Corp.-imit tusagassiuutinut nalunaarut Inuussutissarsiornermut Aatsitassaarsiornermullu Naalakkersuisoqarfimmi atuarneqarsimavoq, tamannalu nutaarsiassatsialaanerarlugu, naak taarsigassarsinisssamik qinnuteqarnerusoq erseqqissaraluarlugu EXIM Banki qinnuteqaammut akissuteqarnermigut siunertarisamik nalunaarpoq.

– Critical Metals Corp.-imut ikinnerussuteqarluni Tanbreezimik piginnittut ilaattut naggataarutaasumik taarsigassarsititsinerunngilaq. EXIM Bankimiilli nalunaarutaalluni, Naalakkersuisoqarfimmi pisortaq Jørgen Hammeken-Holm allappoq.

Aningaasalersuisinnaasoq

EXIM Bank Naalakkersuisoqarfik naapertorlugu Naalakkersuisut suleqatiserisimasaannut aningaasaliisinnaasunut assersuutissaavoq. 

– Avannaani Ironbarkimik suliniuteqarnermi assingusumik inissisimasimapput, Jørgen Hammeken-Holm allappoq nangillunilu: 

– Nunani avammut niuerlutillu eqqussuisuni suliniutinut ingammillu saffiugassanik mianernartunik suliutinut Tannbreezimi pisutut aningaaserivinnit aningaasaliisartuniillu aningaasaliinissami naleqquttunik pissarsinissaq iluaqutaasinnaasoq Naalakkersisut nunat saffiugassanik eqqussisartut qangali ilisimatittarsimavaat. Taamaammat EXIM Bankimit nalunaarfigineqarneq nutaarsiassatsialaavoq. Taarsigassarsititsinernili taamaattuni assigiinngitsunik suliniutini malinneqartussanik piumasaqartoqartarmat erseqqissarneqassaaq, taamaalilluni taamatut nalunaarfigineqaraanni imaanngilaq tamanna taarsigassarsitinneqarnissamut uppernarsaataasoq. Ilorraalli tungaanut alloriarneruvoq.

Suliassat naammassineqartussat

GREENMETSIP PISORTAA DREW HORN KALAALLIT NUNAANNI

Amerikamiu Drew Horn Qaqortumi Illorsuarmi aqutsisutut USA-milu nukissiornermut ministereqarfimmi siusinnerusukkut atorfeqarsimasoq, ullumikkut aningaasaliisarnermut ingerlatseqatigiiffimmi GreenMetimi pisortaasoq saffiugassanik qaqutigooortunik pilersuinermi aningaasaliisussarsiorpoq. Drew Horn kingullertigut arlaleriarluni Kalaallit Nunaanniissimavoq, New Yorkimiillu Nuummut toqqaannartumik timmisartuussinermi siullermi aamma ilaalluni.

GreenMetip Tanbreezimik suleqatigiinnissamik isumaqatigiissuteqarlutik aperiilimi saqqummiuppaa. Drew Hornip kingullermik tikeraarnerani attavigisimanagu, taamaalilluni ataatsimeeqatiginissaanik pilersaarusiortoqarsimanngitsoq Inuussutissarsiornermut Aatsitassanullu Naalakkersuisoqarfik oqaluttuarpoq.

Naalakkersuisoqarfilli naapertorlugu ingerlatseqatigiiffiup aningaasaliissutaani aningaasat taamaaqatai suli amigaataasut aamma maluginiagassaavoq.

Tanbreez suli piiaanissamik akuersissuteqartoq, ingerlatseqatigiiffilli piiaavik ammartinnagu aaqqinneqartariaqartunik suli aaqqitassaqartoq Jørgen Hammeken-Holm nangilluni erseqqissaavoq.

– Piiaavik ammartinnagu suliassat tassaaginnaanngillat sananeranut aningaasaliissutit. Piiaavimmi aamma assigiinngitsunik akuersissuteqartariaqarlunilu matunissaanut pilersaarusiortoqartariaqarpoq. Akuersissut naapertorlugu Tanbreezip kingusinnerpaamik 2025-mi decembarip 31-at nallertinnagu piiaanissamik matusinissamillu pilersaarusiartik akueritissavaat. Soorunami Tanbreez piffissaq eqqorlugu akuersinissamut pappilissanik qinnuteqaatinillu tunniussissasoq, saniatigullu aningaasaliinissat inissagai naatsorsuutigaarput. Akisussaaffilli ingerlatseqatigiiffimmiippoq, Naalakkersuisoqarfimmi pisortaq oqarpoq.