Timmisartumut ilaasoq pinnersarnermi tarrarsuummi hashimik nassaarfigineqartoq

Tallimanngormat Danmarkimit timmisartumut ilaallutik tikittut inuit marluk Nuup mittarfiani ilanngaaserisunit unitsinneqarput. Taakku hashimik Kalaallit Nunaannut eqqusseriaraluarput.

- Ilanngaaserisut inuit aalajangersimasut nassataanni hashimik nassaarput, politiillu misissuillutillu suliamik suliaqartussat piffimmut ornigutsippagut, pigaartut pisortaat Aputsiaq Hansen Sermitsiamut oqarpoq.

Inuup ataatsip nassataani hashi 200 grami nassaarineqarpoq. Inuup aappaata hashi pinnersarnermi tarrarsuummut toqqorsimavaa, tassanilu 300 gram nassaarineqarpoq.

Pinerluuteqartut tamarmik unnerluutigineqartut, pigaartut pisortaat oqaluttuarpoq.

Hashi allakkatigut nassiunneqartoq

Politiittaaq ullormi unnuamilu kingullermi hashimut tunngasumik allamik suliaqartut, pigaartut pisortaat oqaluttuarpoq.

Ilanngaaserisut allakkanik misissuinerminni pasinartumik malugisaqarput.

Danmarkimit Kalaallit Nunaannut nassiussani hashi nassaarineqarpoq. Politiit suliaq misissorpaat taamaammallu hashi qanoq annertutigisoq nassaarineqarsimanersoq oqaaseqarsinnaanatik.

- Suli paasiniaavugut, tamannalu tunuliaqutaralugu paasissutissat isertuukkallarpagut, pasisavummi tigusareqqaartussaavagut, Aputsiaq Hansen oqarpoq.

Ataatsimut isigalugu ulloq unnuarlu politiinut ulapaarfiusimasoq, pigaartut pisortaat oqaluttuarpoq. Pisunut arlalinnut ornigussimapput, ilaatigut angerlarsimaffinni eqqissiviilliornernut, tillinniarnernut, aserorterinernut persuttaanernullu. Pisut amerlanersaat imigassartorsimanermi pipput.