Air Greenland Atlantikoq qulaallugu timmisartuussisartussamik isumaqatigiissuteqarpoq

Air Greenlandip timmisartoq nutaaq 2027-mi atulissavaa, tassa A320neo, taannalu Ilulissani mittarfissuarmi atorneqassaaq.

Mittarfiup 2026-p naalernerani atulernissaa pilersaarutaavoq, timmisartullu nutaap upernaakkut timmisartuussinerit amerlanerpaaffianni atorneqartalernissaa naatsorsuutigineqarpoq.

Timmisartoq pisiarinagu suliffeqarfimmit Carlylemit ukiuni arfinilinni attartorneqarpoq.

– Airbusimik timmisartunik nutaamik pisinermi, tigunissaanut maannakkorpiaq ukiuni 6-7-ni utaqqisariaqartarpoq, taamaattumillu aalajangerparput timmisartunik attartorniarluta, ilaatigut Ilulissani mittarfissuartaap ammarnissaanut ilaatigullu aningaasatigut eqaannerusumik ingerlatsiniarluta, aqqut suli nutaajummat, pisortaaneq Jacob Nitter Sørensen nassuiaavoq. 

Timmisartoq aappalaartumik qalipanneqassaaq, Air Greenlandillu ilisarnaataa atussallugu, timmisartorlu A330neo ilisimaneqarluartoq Nuummiit Københavnimut timmisartuussisartoq Tuukkaq assigalugu Danmarkimiissalluni.

Timmisartoq nutaaq aamma ateqalissaaq, tamannali Air Greenlandimit suli saqqummiunneqanngilaq.

– Ilulissanut aqqut nutaaq neriulluarfigeqaarput attartornissamillu isumaqatigiissut angallavigisatsinni periarfissanut nutaanut ammaassisutut takusinnaallugu. Minnerunngitsumik timmisartup anginerup A330neop kiisalu mikinerusup A320neop akornanni naammassisinnaasat naleqqussarsinnaalissavavut, Jacob Nitter Sørensen oqarpoq.

Airbusip assigusup attartorneqarniarnerata iluaqutissartaasa ilaat tassaavoq timmisartortartut saqisullu akuersissutigeriikkatik atorlugit kiffartuussisinnaanerat, Dash8-mi timmisartortartut ilinniarteqqinneqarsimasut aamma inuttaaqataaffigisaannik.