Pisortaaneq Nvidiamit tunuarnermi kingorna: Utersinnaaguma ataqqinaataassaaq
Jensen Huang Nvidiamit tunuarlunilu allalerisimalluni nassuereersoq qarasaasianut atortorissaarusiorfissuup piginneqataassutaasa nalingi appariartupiloorput.
Jensen Huang Nvidiami pisortaanertut sapaatip akunnerani kingullermi sisamanngornermi tunuarpoq. Assimi matumani 2025-mi januaarimi Las Vegasimi ataatsimeersuarnermi peqataasoq takuneqarsinnaavoq. (Toqqorsivimmit assi).
Assi: Patrick T. Fallon/AFP/Ritzau Scanpix
Nvidiami siulersuisut pisortaanerusimasoq Jensen Huang qarasaasianut atortorissaarusiorfissuarmut uterusunnersoq aperippassuk taassuma neqeroorut ataqqinaataasumik akuerissavaa.
Taama Jensen Huang Nvidiamit soraarnermi kingorna siullerpaamik oqaaseqarpoq, Amerikamiut aviisiat The Wall Street Journal taama allappoq.
- Suliffinnit soraarninniilli Nvidiami sulisunit, aningaasaliisartunit, suleqatinit atuisunillu pisortaanertut uteqqullunga kajumissaarneqartupilussuuvunga.
- Uternissara piginneqataasut, sulisutta, suliffeqarfiup USA-llu soqutigisarigaat siulersuisunit aalajangerneqarpat kajumissaarutit taakku eqquutsillugit pisortaaninngoqqinnissara ataqqinaataassaaq, Jensen Huang oqarpoq.
Taanna arnamut Kinamiumut kilitsissiaasutut pasineqartumut allasiorsimalluni novembarimili nassuereerluni Nvidiami atorfimminit sapaatip-akunnerani kingullermi tunuarpoq.
Arnaq taanna Alice Huangimik atilik suliffeqarfimmi Megaspeedimi, Nvidiamit qarasaasianut atortorissaarutinik pisisartumi, Singaporemiittumi pisortaasimavoq.
Alice Huangip Kinamilu naalakkersuisut taassuma Kinamiunut kilitsissiaasimanera ilumuunnginnerarpaat.
USA-mi inatsisinik atortitsinermut ministereqarfik Alice Huangip kilitsissiaasimaneranik misissuilerpoq, Jensen Huangilu inatsisartut ataatsimiittarfianni suliaq pillugu tusarniaanissamut qaaqquneqarpoq.
Decembarip aallaqqaataani tusarniaasoqassaaq.
Nvidiattaaq Jensen Huangip Alice Huangillu attaveqatigiinnerat misissorlugu nalunaarutigaa.
Allalerisimaneq nassuerutigineqareersorlu Jensen Huangip Nvidiami sulisut allat marluk aamma allaleriffigisimagai tusagassiutit arlallit allaaseraat. Nvidiap tamanna oqaaseqarfigerusunngilaa.
Teslap SpaceX-illu pisortaanera, Elon Musk, Jensen Huang NVidiamut uterteqqunneqarnissaa pillugu atsiornernik katersuisoqalersoq, aamma nammineq atsiorumaarluni, tallimanngornermi nalunaarpoq.
Nvidia qarasaasianut atortorissaarutinik silassorissuusianut atorneqartartunik tunisassiortuni nunarsuarmi siuttuuvoq, suliffeqarfillu ukiuni kingullerni alliartupiloorpoq. Jensen Huangilli allassiorsimalluni nassuernerata kingorna Nvidiami piginneqataassutit nalingi appariartupiloorsimapput.
Jensen Huang Nvidiamik 1993-imi pilersitseqataallunilu suliffeqarfimmi ukiuni 33-ni pisortaanerusimavoq.
RITZAU