GreenRocip pisortaa: EU-p suliniutitsinnik toqqaanera pitsaassutsimik akuersaarnerullunilu siunissami pingaaruteqarpoq

EU-kommissionip aatsitassat pingaarutillit 13-nik taaneqartut ilaattut GreenRoc Strategic Materialsip Kujataani aqerluusassamik suliniutaanik toqqaaneratigut, EU-mut aatsitassanik pingaarutilinnik pilersuinerit pitsaanerusut qulakkeerneqassapput. 

GreenRocip suliniutaa Amitsumi aatsitassarsiorfiup saniatigut aamma Norgemi aqerluusassamik suliarinneqqaarfimmik pilersitsinermik ilaqarpoq.

 Aningaasalersuineq pillugu siunnersuineq 

Aatsitassarsiornermi suliniutitut pingaarutilittut toqqarneqarneq EU-mi atorfilittat maanna kangiarterlutik Amitsumi aatsitassarsiornermik suliniuteqalernissaannik kinguneqanngilaq. Tamatumattaaq EU-p suliniummut tassunga maannarpiaq aningaasaliineranik isumaqanngilaq.

GreenRocsip EU-mit suliniutitut pingaarutilittut toqqarneqarnerata, aningaasalersuisinnaasunut suliffeqarfinnullu aqerluusassamik pisiortortussanut attaveqalernera kingunerissavaa, tamannalu siunissami annertuumik pingaaruteqarsinnaavoq, GreenRoc Strategic Materialsimi pisortaq Stefan Bernstein oqarpoq. – Suliniutitut pingaarutilittut toqqarneqarneq pitsaassutsikkut naqissusiineruvoq, suliniuterpummi qinnuteqarnermi annertuumik suliaqarnermik immikkullu ilisimasallit naliliinerannik ingerlatsivioreerpoq. EU-p suliniutip aatsitassanik aalajangersimasumik annertussusilinnik avatangiisinut illersorneqarsinnaasumik uppernarsaatitalimmik pilersuisinnaasutut tutsuiginartuunera soorunami qularnaartussaavaa. Toqqarneqarneq EU-p aningaasalersuinermik uatsinnut siunnersuisinnaaneranik taamatuttaarlu uagut aningaasalersuisinnaasullu kiisalu pisiortorsinnaasut akornanni ataatsimeeqatigiinnernik aaqqissuisinnaaneranik ammaassivoq, Stefan Bernstein oqarpoq. 

Aningaasaliisartut kigaallisaartut 

GreenRoci suliniummut periarfissaasinnaasut aningaasalersuinerit assigiinngitsut pillugit EU-kommissionimut siullermeerluni ataatsimiigiaqquneqareerpoq. 

– EU-lli aningasalersuinermut aallaqqaammut ilapittuisuunnginnera oqaatigissallugu pingaaruteqarpoq. Attaveqaatinik ilisimasanillu ilapittuuteqarput, tassami politikikkut oqariartorneq kisiat aallaavigalugu aatsitassarsiornermik suliniutit uku piviusunngornaviannginnerat nalunngilaat, Stefan Bernstein oqarpoq.

Taassuma naak immikkoortumi pineqartumi immikkut ilisimasanik politikikkut erseqqissumik kissaateqartoqaraluartoq EU-mi Kinap annertoorsuarmik ingerlatsineranit avissaarniarnermi aningaasaliisartut kigaalaarnerat siusinnerusukkut Sermitsiamut oqaatigaa. 

Inuit eqqortut oqaaseqartinnerat 

EU-kommissionip nammineq nunallu ilaasortat akornanni attaveqaatit aningaasalersuinissamut pisiortortussanullu atorpai.

– EU anguniagassiisutut annertuumik pingaaruteqarpoq. Ingerlatseqatigiiffittumi suli tunisassiulinngilagut, uagummi niuerfimmi annertuumik ingerlatsisunut saaffiginnikkaangatta, soorlu Europami biiliorfissuarnut, taava inuit eqqortut naapinneq ajorpagut. EU-lli attaveqarnermik isumaginninnerani pisortaanerit oqaloqatigisinnaavagut. 

Naalakkersuisut iluarisimaarinnittut 

Naalakkersuisut naapertorlugit GreenRocimik suliniutip toqqarneqarnera, Kalaallit Nunaata 2023-mi EU-kommisionimik suleqateqarnissamut isumaqatigiissutaanut pissusissamisoortumik ingerlatseqqinneruvoq. 

”Toqqaaneq Kalaallit Nunaata aatsitassanut suliassaqarfimmi pingaaruteqariartuinnarneranik erseqqissaavoq aammalu nunatsinni nunap iluanut tunngatillugu ersarinnerulersitsilluni. Aatsitassat pisariaqartinneqartut pillugit suliassanut kajungernarnerusunik aningaasalersuinermut atugassaqartitsilernissap pisariaqartinneqarnera, ukiuni kingullerni Naalakkersuisut arlaleriarlutik oqaatigisarpaat. Suliassat pitsaasorpassuupput, kisianni nunarsuarmi aningaasalersuinissaq unammillernartuusimalluni, taamatullu nunanit allanit unammillerneqarusunnginnerup aammalu niuerfinni qalliuniarnerup aqqutissaq suliassanut arlalinnut suli sivisunerulersippaat. EU-kommissionip suliassanut immikkut pingaaruteqartunut tapersersuinissamik isumassarsiaa nutaanik aqqutissarsiornissamut piumassuseqarnermik takutitsillunilu nuannersorujussuulluni.” Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq oqarpoq. 

Suliniummut politikikkut tapersersuineq 

Naalakkersuisut tapersersuinerat Stefan Bernsteinimut annertuumik sunniuteqarpoq. – Namminersorlutik Oqartussat Naalakkersuisullu EU-mut tunngatillugu suliniuteqarnermi akuusorujussuupput, sulilumi akuupput. Akuunissamut annertuumik soqutiginninneq suliniutillu ilaannik piviusunngortitsineq kiisalu Kalaallit Nunaanni illersorneqarsinnaasumik aatsitassarsiornikkut suliffissuaqarnerup politikikkut isumaqatigiissutaanera misigaara. Naalakkersuisunit Namminersorlutillu Oqartussanit annertuumik tapersersorneqarneq tamatuma kinguneraa, Stefan Bernstein oqarpoq, pilersaarutillu malillugit suut tamarmik ingerlassappata, ingerlatseqatigiiffiup 2027-mi sanaartornernik ingerlatsilernissaa 2029-milu Amitsumi aatsitassarsiorfik aqerluusassanik tunisassiulissasoq ilassutigaa. 

GreenRocimik suliniut aqerluusassamik, ilaatigut biilit innaallagiamik ingerlatillit batteriivinut atorneqartartunik qalluinissamik siunnerfeqarpoq. GreenRocip (aamma Greenland Graphitemik nunatsinni ingerlatseqatigiiffimmik piginnittup) piiaasinnaanermut qinnuteqaatertik juunip 27-iata tungaanut tamanut tusarniaassutigalugu nassiuteqqammerpaa.