Aningaasanut inatsimmi peqqinnissaqarfik 2 milliardit koruuningajannik aningaasalerneqarpoq. Taakkua saniatigut danskit kalaallillu naalakkersuisui 200 millionit naliginut ukioq manna februaarimi isumaqatigiissuteqarput.
Peqqinnissaqarfiulli ingerlanneqarneranut aningaasat taakkua katikkaluarlugilluunniit naammanngitsut, Aningaasaqarnermut Naalakkersuisoq, Aqqaluaq B. Egede (IA), Inatsisartunut ilaasortanit pingasunngornermi apeqqarissaarfigineqarami oqarpoq.
Aningaasanut inatsimmi peqqinnissaqarfik 2 milliardit koruuningajannik aningaasalerneqarpoq. Taakkua saniatigut danskit kalaallillu naalakkersuisui 200 millionit naliginut ukioq manna februaarimi isumaqatigiissuteqarput.
Peqqinnissaqarfiulli ingerlanneqarneranut aningaasat taakkua katikkaluarlugilluunniit naammanngitsut, Aningaasaqarnermut Naalakkersuisoq, Aqqaluaq B. Egede (IA), Inatsisartunut ilaasortanit pingasunngornermi apeqqarissaarfigineqarami oqarpoq.
Taassuma oqarnera naapertorlugu peqqinnissaqarfiup iluani attuumassuteqanngitsumik misissuisoqarpoq. Misissuineq suli naammassinngikkaluartoq pitsaanngitsumik nutaarsiassaqarpoq.
- Peqqinnissaqarfiup iluani imaannaanngitsukasinnik suli takkuttoqartussaavoq. Aserfallatsaaliinermut aningaasartuutinut. Aammalu suleqatigiissitamik misissuititsivugut pinartunik aningaasaliiffigisariaqartunik. Ilaat ilisimareerpagut.
- Suleqatigiissitaq naammassippat aamma aningaasartuutissat allat takkuttussat ilimasuutigivagut, Aqqaluaq B. Egede, Inatsisartut oqaluttarfiannit oqarpoq.
Naalakkersuisut aningaasaliiffigisariaqartut suut ilisimareerneraat Aqqaluaq B. Egedep itisilinngilai. Taamaattumik Sermitsiap Aningaasaqarnermut aamma Peqqissutsimut Naalakkersuisoqarfiit aningaasartuutaasussatut ilisimaneqareersut pillugit attaveqarfigai. Allaaserisap suliarineqarnerani taakkunanngaanniit akissuteqartoqanngilaq.
Akileraartarnikkut aaqqissuusseqqittoqassasoq
Qinigaaffiup siuliani naalakkersuisoqatigiit akileraartarnikkut aaqqissuusseqqipput. Tamanna 360 millionit koruunit missaannik innuttaasunut pissaqarnerulersitsinermik kinguneqarpoq. Suliarlu taanna nangillugu aaqqissuusseqinneq nutaaq aallartisarneqarpoq.
- Akileraartarnikkut aaqqissuusseqqinnissap alloriarnerata tullia Naalakkersuisuni suliarivarput. Partiit tamaasa aggersarneqarnerannik, peqataatinneqarneranillu tamanna malitseqassaaq. Tassani inuit ataasiakkaat atugaannut, utoqqalinersianut tunngasunut aammalu inuussutissarsiortunut tunngasunut atugassarititaasut akileraartarnikkut nalilersuiffigineqarnissaat naatsorsuutigivarput. Naalakkersuisuninngaanniit Inatsisartut suleqatigalugit suliariumaarparput.
Inatsisartulli isumaqatigiinniarfiginnginneranni suleqatigiissittap maanna sulisup suliai utaqqimaarneqarput.
- Suleqatigiissitanik ilaatigut pilersitsinikuuvugut. Taakkua naammassinneriarpata politikkikkut isumaqatigiinniarnerit ingerlanneqarnissaat Naalakkersuisunit naatsorsuutigivarput, Aqqaluaq B. Egede.
