Franskit ministeriat Kalaallit Nunaannut uterusuttoq – aamma arferit pillugit
Nunanut allanut niuernermullu ministerip Nicolas Forissierip Kalaallit Nunaata Frankrigillu suleqatigiinnerat periarfissaqarluartoq takusinnaavaa.
Uagutsinnut inuussutissarsiornitsinnullu iluaqutaasunik takusaqarsinnaagatta, soorunami aamma uagut Kalaallit Nunaanniippugut. Soorluttaaq politikkerinut ulluni makkunani oqaatigisara: Tamatsinnut suleqatigiinnikkut iluaqutaasussaq anguniarlugu tamaannarpugut, Frankrigimi nunanut allanut niuernermut aningaasaliinernillu siuarsaanermut ministeritut aallartitaq Nicolas Forissier oqarpoq.
Assi: Morten Okkels
Frankrigip nunanut allanut niuernermut aningaasaliinernillu siuarsaanermut aallartitatut ministeria Future Greenlandimi pingasunngornermi ullaakkut oqalugiarpoq.
Ministerip oqalugiarnermini Frankrigip Kalaallit Nunaatalu piffissami eqqissiviilliorfiusumi ataqatigiinnerat siunissamilu inuussutissarsiornikkut suleqatigiinnerup nukittorsarneqarnissaanik periarfissat eqqartorpai. Ilaatigut aatsitassarsiorneq eqqaaneqarpoq, tassani Frankrigi Kalaallit Nunaallu sapaatip-akunnerata aallartinnerani isumaqatigiissuteqarlutik atsioqatigiipput.
Sermitsiap Nicolas Forissieri Frankrigimut aallartinnagu apeqquteqarfigaa.
Suleqatigiinnikkut tamatsinnut iluaqutaasussaq
Monsieur Ministeri, sooruna Frankrigip Kalaallit Nunaat taama soqutigitigaa?
– Arlalinnik pissuteqarpoq. Ilaatigut nunarsuarmi ajornakusoortumi inuit namminneq aalajangiisinnaatitaanerannik, Europami nunat siuttuisa ilaattut naleqartitatsinnik pingaartitsisariaqarpugut. Tamatuma saniatigut Kalaallit Nunaat Frankrigilu oqaluttuarisaanermi, ilaatigut kulturikkut ilisimatusarnikkullu ataqatigiilluinnarlutillu ikinngutigiilluarput.
Ministerip ingerlariaqqinnginnermini issittumi ilisimatusartoq Paul-Émile Victor oqaluttuarisaanermi maligassiuisutut eqqaavaa. Isummat anguniakkallu piviusorsiornerusut pineqarput, Nicolas Forissier itisiliivoq.
– Uagutsinnut inuussutissarsiornitsinnullu iluaqutaasunik takusaqarsinnaagatta, soorunami aamma uagut Kalaallit Nunaanniippugut. Soorluttaaq politikkerinut ulluni makkunani oqaatigisara: Tamatsinnut suleqatigiinnikkut iluaqutaasussaq anguniarlugu tamaannarpugut.
Qanimut suleqatigiinneq ileqquusoq
Illit nuussutissarsiornermi siuttuunak politikkeriuvutit. Qanoq ilillutit franskinit inuussutissarsiornermik suliaqartunit ilimasaarutivit piviusunngortinneqarsinnaanera qulakkiissaviuk?
- Frankrigimi pisortat suliffeqarfiillu namminersortut qanimut suleqatigiittarnerat ileqqoraarput. Suliffeqarfiit nammineerlutik aalajangiisinnaassuseqarmata ilumoorluinnarpoq, taamaattorli inuussutissarsiornermik suliaqartut tamaanga tikinnerput, periarfissanillu misissuinerput nuannaarutigigaat ilisimavara.
Tamaaniinnissinni ataatsimiittarfiit saniatigut allanik takusassarsiorpisi?
– Qujanartumik umiatsiamik angalaarnissaq angumeraarput. Sulisut ilaasa arferit takuaat, uangali angumerinngitsoorpakka. Illulioriaatsit soqutigingaarpakka, taamaammat illunik naammattunik takuniaavunga, illullu sooq taama qalipaateqarnersut nassuiaanneqarpunga.
Kalaallit Nunaat nammineq inuttut takornariagassatut pingaartinneqartoq
Soorunalimi piffissaq annerpaaq pilersaarutit malillugu ingerlanneqarpoq. Ministerilu Sermitsiamit oqaloqatigineqareernermi kingorna mittarfimmukannginnermini suli arlalialunnik ataatsimiiffissaqarpoq.
– Tassa suliffimma akunnattut ilaat. Assigiinngitsorpassuarnik, aamma inunnit amerlasuunit takuneqajuitsunik, takusassaqartuarpoq. Nunat allat takuniarluarnissaannut iluamik piffissaqarneq ajorpunga. Namminerlu piffissara atorlugu nunat sukumiinerusumik piffissartuutigerusutama allattorsimaffiannik allattaaveqarpunga, tassanilu Kalaallit Nunaat pingaarnerit ilaanniippoq
