Grønlandsbankenip takornariaqarneq siuarsarniaraa
Grønlandsbanken aningaaserivimmit tunisassiamik immikkuullarissumik takornariartitsisartunut mikinerusunut aningaasaateqanngitsunut tunngassuteqartumik takornariartitsinerup ineriartortinnissaanut aningaasaliiniarluni aalajangerpoq.
Grønlandsbankenip aningaasaliissutini nutaat, takornariartitsisartunut mikinerusunut tunngassuteqartut, sapaatit-akunnialuinnaat qaangiuppata piariissavai.
Toqqorsivimmiit assi: Leiff Josefsen
100 millionit koruunit takornariartitsisartut tullianik aningaasaliinissaannut iluaqutissatut immikkoortinneqarnissaat Nunami aningaaseriviit annersaata aalajangersimavaa.
- Najukkami takornariaqarneq ineriartornissamut periarfissaqarluarpoq. Kalaallit Nunaanni tamarmi takornariartitsisartunik oqaloqateqarnitsinnit maanna aningaasaliisoqartariaqartoq takusinnaavarput. Attaveqaasersuutinut nutaanut periarfissat atorluartariaqarpavut, tamannalu siuarsarluarniarparput, aningaaserivimmi pisortaq Martin Kviesgaard suliniut nutaaq pillugu oqarpoq, tamannalu aningaaserivimmit qanittukkut ukiumoortumik naatsorsuutit saqqummiunneqarmata saqqummiunneqarpoq.
Aallarnisaanermut aningasat
- Aningaasat taakku tassaapput „Aallarnisaanermut aningaasanik“ taaneqartartut, aningaaseriviup pisortaa Sermitsiamut itisiliilluni oqarpoq.
Taarsigassarsiinermi ataatsimi aningaasat qanoq amerlatigisinnaanersut killiliiffigissavisigit?
- Najukkami takornariartitsisartut mikinerit pingaarnertut sammineqassapput, tassani aningaasaleeqataanermut taarsigassarsiat akikitsut aningaasaliissutit 20 procentii, amerlanerpaamillu 1 million koruunit killigitinneqassapput. Akisussaassuseqarluni aningaasat suliffeqarfinnut immikkut nukittorsaatissaapput, tamatumali saniatigut soorunami amerlasuut nalinginnaasumik aningaasaliissuteqarnissaq pisariaqartissavaat, Martin Kviesgaard itisiliivoq.
Suliniut nutaaq „takornariartitsisut ataasiakkaat tullianik aningaasaliinissaannut nukittorsaataasinnaallunilu namminneq aningaasaataannik nukittorsaataasinnaasoq“ taanna isumaqarpoq.
- Tamanna takornariartitsinermut aningaasaliissutinik amerlanerusunik siuarsaassasoq isumaqarpugut, aningaaseriviup pisortaa oqarpoq.
Ineriartorneq pitsaasoq
2024-mi takornariartitsinermi qanoq taarsigassarsiisimatigivisi?
- Suliffeqarfiit amerlasuut takornariartitsinermik ingerlatsinerat suliaasa ilaannarimmassuk aningaasanik taarsigassarsititsinermut kisitsisit sukumiivallaanngillat. Kisianni aningaasat millionit untritilikkaat arlallit pineqarput.
Ukiuni tallimani kingullerni aningaasat inuussutissarsiornermut taarsigassiissutigineqartut qanoq ineriartorsimappat?
- Ineriartorneq pitsaasuuvoq, attaveqaasersuutit nutaat aningaasaliisoqarnerulernissaanut periarfissiipput.
100 millionit koruunit immikkut ittumik tunissutisiatut isigineqassappat?
- Aap. Aallarnisaanermut aningaasat akisussaaffiupput taamaammallu immikkut ittuullutik, tassami inummut ataatsimut aningaasaatinik tamakkiisunik nakussatsitsisarput.
Aallarnisaanermut aningaasat illoqarfinnut mittarfiliorfiusunut aammali sumiiffinnut qanittumiittunut takornariarpassuaqalersinnaasunut ingerlateqqinneqarsinnaassasut Martin Kviesgaardip naatsorsuutigaa. Sulisitsisut peqatigalugit ukiuni kingullerni inuussutissarsiornermi siuarsaaniarluni aaqqissuisoqartarnikuuvoq.
Soqutigineqarluartoq
- Soqutiginnittoqarluarnera illoqarfinni assigiinngitsuni pisut takutippaat. Takornariartitsinerup iluani assigiinngitsorpassuarnik suliaqartoqarsinnaanera Kalaallit Nunaanni aningaasarsiornermik nutaamik pilersitsisinnaavoq, Martin Kviesgaard naqissusiivoq.
Grønlandsbankenip Aallarnisaanermut aningaasaliineq nutaaq sapaatip-akunnialuisa ingerlaneranni piareersinnaassallugu naatsorsuutigaa.
