MOTOORI
Kapisilinniarneq aallartilluarpoq
Kapisilinniarneq piniartunut saniatigooralugulu pinialuttartunut ingerlatsivinni arlalinni ammarpoq. Kapisilinniarsinnaanermut akuersissutillit kisimik Kapisillit eqqaanni aalisarsinnaasut aamma kuummi aalisarneq nunaqavissunut kisimi atuuttoq Kalaallit Nunaanni Aalisarnermut Piniarnermullu Nakkutilliisoqarfiup eqqaasitsissutigaa
Kapisillit kuuanni qissattaaserluni qarsorsallu kisiisa atorlugit aalisartoqarsinnaanera Kalaallit Nunaanni Aalisarnermut Piniarnermullu Nakkutilliisoqarfiup eqqaasitsissutigaa. Kapisilinniarnissamut akuersissuteqarnissaq aamma piumasaqaataavoq.
Assi: Peter Lindstrom/Visit Greenland
Sumiiffinni arlalinni saniatigooralugu inuussutissarsiutigalugulu
kapisilinniarneq aggustip septembarillu qaammataani ammarput.
Kujataata Kitaa Kapisilinnilu aggustip aallaqqaataani ammarpoq, Tunumi
aggustip 15-ianni, Avannaatalu Kitaani septembarip aallaqqaataani ammarluni.
Pisassat 30 tonsit
Kapisilinniarsinnaanermut akuersissummik kommunini imaluunniit
Sullissivik.gl aqqutigalugu qinnuteqartoqarsinnaavoq. Kapisillit kuuanni
aalisarniaraanni aqutsiveqarfimmi Kapisilinni akuersissuteqarnissaq
piumasaqaataavoq.
Kapisilinniarsinnaanermut nalunaarut nutaaq malillugu aalisarsinnaaneq ammarneqarpoq. Saniatigooralugu inuussutissarsiutigalugu aalisartut pisaminnik nalunaarsuisarnissaat immikkut ittumik piumasaqaatigineqarpoq.
Assi: Rudy Hemmingsen/Scanpix
2025-mi pisassiissutit tamarmiusut 30 tonsiupput. Ukunani
agguataarneqaqqallutik: Avannaata Kitaani 10,8 tonsit – taakkunannga
saniatigooralugu aalisartunut 3,24 tonsit inuussutissarsiutigalugulu
aalisartunut 7,56 tonsit. Kujataata Kitaani 16,2 tonsit – taakkunannga
saniatigooralugu aalisartunut 4,86 tonsit inuussutissarsiutigalugulu
aalisartunut 11,34 tonsit. Tunumi pisassiissutit 3 tonsiupput – taakkunannga
saniatigooralugu aalisartunut 1,5 tonsiullutik inuussutissarsiutigalugulu
aalisartunut 1,5 tonsiullutik.
Kapisilinni pissutsit immikkut ittut
Kapisillit kuuanni aalisarnermut immikkut piumasaqaateqartoq,
Namminersorlutik Oqartussat Kapisilinniarneq pillugu nalunaarutaanni 31. juuli
2025-meersumi allassimavoq.
Kapisilinni taamaallaat nammineq atugassanik aalisartoqarsinnaallunilu,
Kalaallit Nunaanni innuttaasutut nalunaarsorsimanissaq akuersissuteqarnissarlu
piumasaqaataavoq. Taamaattumik Kapisillit eqqaanni nunaqavissut kisimik
aalisarsinnaapput.
Qissattaaserluni qarsorsallu kisiisa atorlugit aamma aalisartoqarsinnaavoq,
Kapisillillu kuuata paavanit 1.000 meterinit qaninnerusumi qassutinik
suugaluartunilluunniit atornissaat inerteqqutaalluni.
Kapisilittat nalunaarsortarnissaat Kalaallit
Nunaanni Aalisarnermut Piniarnermullu Nakkutilliisoqarfiup aamma eqqaasitsissutigaa – aamma aalisaatit pisaqanngikkaluarpataluunniit.
Pisaqarsimannginneq pillugu paasissutissat aamma pingaaruteqarmata. Pisanut
nalunaarsuiffik uani aaneqarsinnaavoq.
